ప్రియురాలితో సహా-జీవనం.. చేసిన తప్పును కప్పపుచ్చుకునేందుకు 40ముక్కలుగా నరికేసిన ప్రియుడు..!

జార్ఖండ్‌లో దారుణం వెలుగుచూసింది. రాంచీలో లైవ్-ఇన్ పార్టనర్ హత్య కేసులో అనేక కొత్త విషయాలు వెలుగులోకి వచ్చాయి. హత్యకు ముందు తన ప్రియురాలిపై అఘాయిత్యానికి ఒడిగట్టి, ఆపై కండువాతో ఆమె గొంతు బిగించి హత్య చేశాడు. పట్టుబడకుండా ఉండేందుకు మృతదేహాన్ని 40 ముక్కలుగా నరికేశాడు. ముక్కలను సంచిలో తీసుకువెళ్లి అడవిలో పాతిపెట్టాడు. ఇక అక్కడి నుంచి గుట్టుచప్పుడు కాకుండా తన భార్య, కొడుకు నివసించే బెంగళూరులోని తన ఇంటికి తిరిగి వచ్చాడు నిందితుడు.

అయితే మృతురాలి తల్లి ఫిర్యాదు మేరకు దర్యాప్తు చేపట్టిన పోలీసులు మర్డర్ మిస్టరీని ఛేదించారు. నవంబర్ 24న జార్ఖండ్‌లోని రాంచీలో అస్థిపంజరం లభ్యమైంది. నిజానికి, ఒక కుక్క తన నోటిలో మానవ చేయితో తిరుగుతోంది. ఇది చూసిన స్థానికులు కుక్క చేయి తెచ్చిన ప్రదేశానికి వెళ్లారు. ఆ ప్రదేశంలో మట్టిని తొలగించడంతో అక్కడ ఒక మానవ శవం పడి ఉంది. అది కూడా ముక్కలుగా నరికివేసి ఉండటంతో స్థానికులు షాక్ అయ్యారు. వెంటనే పోలీసులకు సమాచారం అందించారు. దీంతో పోలీసులు ఘటనాస్థలానికి చేరుకుని దర్యాప్తు చేపట్టారు. అక్కడ లభించిన మహిళ ఆధార్ కార్డు ఉన్న బ్యాగ్ ఆధారంగా సాంకేతిక నిఘా సహాయంతో పోలీసులు ఈ కేసును ఛేదించారు.

ఎట్టకేలకు నిందితుడిని అదుపులోకి తీసుకున్న పోలీసులు రిమాండ్‌కు తరలించారు. అయితే తనకు, తన స్నేహితురాలికి ఏడాదిన్నరగా ఎఫైర్ ఉందని నిందితుడు పోలీసుల ముందు ఒప్పుకున్నాడు. ఆ తర్వాత వేరే పెళ్లి చేసుకున్నానని, దాన్ని తన ప్రియురాలు వ్యతిరేకించడంతో ఆమెను చంపానన్నాడు. పోలీసులకు దొరక్కుండా ఉండేందుకు ఆమె శవాన్ని 40 ముక్కలుగా నరికివేసినట్లు పోలీసుల ముందు అంగీకరించాడు.

జరియాగఢ్ పోలీస్ స్టేషన్ పరిధిలోని భగవాన్ పంజ్ టోంగ్రీలో ఈ ఘటన జరిగినట్లు పోలీసులు తెలిపారు. జోజోదాగ్ గ్రామానికి చెందిన నరేష్ భెంగ్రా అనే వ్యక్తి గంగి అనే అమ్మాయితో అక్రమ సంబంధం పెట్టుకున్నాడు. ఆమె వాస్తవానికి రాంచీ జిల్లాలోని లాపుంగ్ పోలీస్ స్టేషన్ పరిధిలోని మాల్గో తంగ్రాటోలి గ్రామ నివాసి. నరేష్ తల్లి ఇల్లు కూడా అదే గ్రామంలో ఉంది. ఆమె తల్లి ఇంటికి వెళ్ళినప్పుడు, గంగి, నరేష్ ప్రేమలో పడ్డారు. ఆ తర్వాత ఇద్దరూ ఏడాదిన్నర పాటు లివ్-ఇన్-రిలేషన్ షిప్ లో ఉన్నారు. ఏడాదిన్నర పాటు సహజీవనం చేసిన గంగి తమిళనాడుకు పనికి వెళ్లగా, నరేష్ బెంగళూరుకు వచ్చి జీవించడం ప్రారంభించాడు. ఈ క్రమంలో నరేష్‌కు మరో అమ్మాయితో సంబంధం ఏర్పడింది. ఆమెను పెళ్లి చేసుకున్నాడు. వారిద్దరికీ ఒక కొడుకు కూడా ఉన్నాడు.

నరేష్ రెండో పెళ్లి చేసుకున్నాడని తెలియగానే గంగి అతనిపై తీవ్ర ఆగ్రహాంతో ఊగిపోయింది. ఆమె బెంగళూరుకు వచ్చిందని తెలుసుకున్న నరేష్ భయపడ్డాడు. గంగి తన భార్యకు అంతా చెబితే తన జీవితం పాడైపోతుందని నరేష్ అనుకున్నాడు. ఏదో ఒక సాకుతో గంగిని కొన్ని రోజులకు వెనక్కి పంపాలని ఆలోచించాడు. మాయ మాటలు చెప్పి అతను రైలులో గంగిని హతియాకు తీసుకువచ్చాడు. నవంబర్ 8వ తేదీ సాయంత్రం అతను గంగిని భగవాన్ పంజ్ టోంగ్రీకి తీసుకెళ్లాడు. ఇక్కడ వారిద్దరూ ఇదో విషయంలో గొడవలు పడ్డారు.

అనంతరం గంగిని కండువాతో గొంతుకు ఉరేసి నరేష్ హత్య చేశాడు. అనంతరం మృతదేహాన్ని గొడ్డలితో 40 ముక్కలుగా నరికి, వాటిని ఆడవి ప్రాంతంలో పాతిపెట్టి బెంగళూరులోని ఇంటికి వెళ్లాడు. నవంబర్ 24న కొంతమంది స్థానికులు టోంగ్రీలో మానవ అస్థిపంజరాన్ని చూసి జరియాగఢ్ పోలీస్ స్టేషన్‌కు సమాచారం అందించారని SDPO తెలిపారు. పోలీసులు నిందితుడిని అరెస్ట్ చేసి జైలుకు తరలించారు. ఈ కేసులో తదుపరి చర్యలు కొనసాగుతున్నాయి.

మరిన్ని క్రైమ్ వార్తల కోసం ఇక్కడ క్లిక్ చేయండి..