కరోనా డాక్టర్ల డ్యాన్సింగ్ బ్రేక్ ! రిలాక్సింగ్ మూడ్ !

బెంగుళూరు లోని విక్టోరియా ఆసుపత్రిలో కరోనా రోగులకు నిరంతరం సేవలందిస్తున్న డాక్టర్లు తమకు కాస్త బ్రేక్ దొరికేసరికి చిన్న పిల్లల్లా మారిపోయి రిలాక్స్ అవుతున్నారు. కొందరు పాత సినిమాల్లోని పాటలకు స్టెప్పులు వేస్తూ స్ట్రెస్ నుంచి బయటపడుతున్నారు. ఇటీవల ముగ్గురు వైద్యులు తమ పీపీఈ కిట్లతోనే.. 1960 ప్రాంతం నాటి హిందీ మూవీలోని ‘లిఖి జో ఖత్ తుఝే’ సాంగ్ కి డ్యాన్స్ చేశారు. సుమారు 40 సెకండ్ల  ఈ వీడియో సోషల్ మీడియాలో వైరల్ అవుతోంది. ఇలాంటి డాక్టర్లంతా తమ ఇళ్లకు, తమ కుటుంబాలకు రోజుల తరబడి దూరంగా ఉంటున్నారు. కొంతమంది వారం రోజులైతే,, మరికొందరు సుమారు 15  రోజుల వరకు కూడా తమ ఇళ్ల ముఖం చూడలేకపోతున్నారు. అందువల్లే వీరు అటు కరోనా రోగుల్లో మానసికంగా, శారీరకంగా ఉత్సాహం నింపేందుకు, వారికి ఉల్లాసం కలిగించేందుకు తమ వంతు ప్రయత్నాలు చేస్తున్నారు. మహిళా రోగులకు మెహెంది పోటీలు, పిల్లలకు పెయింటింగ్ కాంపిటీషన్లు నిర్వహించడం వంటివి చేపడుతున్నారు. ఈ హాస్పిటల్ లో 18 మంది పిల్లలు కూడా చికిత్స పొందుతున్నారు. కొంతమంది డాక్టర్లు తమ స్టాఫ్ కి ఫుడ్ కూడా తయారు చేయడం విశేషం. కర్నాటకలో మొత్తం 3,796 కరోనా కేసులు నమోదయ్యాయి. వీటిలో 388 కొత్త కేసులు.