వ్యూహం వేరు.. రాజకీయం వేరు.. బోత్ ఆర్ నాట్ సేమ్ ప్రశాంత్ జీ!

ఎన్నికల వ్యూహకర్త ప్రశాంత్ కిషోర్ తన సొంత జన్ సూరజ్ పార్టీతో బీహార్ ఎన్నికల్లో పోటీ చేసి ఘోరంగా విఫలమయ్యారు. గతంలో అనేక పార్టీలకు విజయం అందించిన పీకే, ఈ ఎన్నికల్లో ఒక్క సీటు గెలవకపోగా, కనీసం ఆధిక్యం కూడా కనబరచలేకపోయారు. అనేక పార్టీలకు విజయం అందించిన ప్రశాంత్ కిషోర్ సొంత రాజకీయ ప్రస్థానం నిరాశపరిచింది. జన సూరజ్ పార్టీకి కనీసం ఒక్క ఆధిక్యం కూడా లేకపోవడం రాజకీయ వర్గాల్లో చర్చనీయాంశంగా మారింది.

అందరికీ శకునం చెప్పే బల్లి కుడితిలో పడి చచ్చింది అనే సామెత మాదిరి తయారైంది జన సూరజ్ పార్టీ అధినేత ప్రశాంత్ కిషోర్ పరిస్థితి. గత రెండు దశాబ్దాలుగా అనేక పార్టీలకు ఎలక్షన్ స్ట్రాటజిస్టుగా పని చేసి, పార్టీల భారీ మెజారిటీతో అధికారంలోకి వచ్చేలా ప్రణాళికలు రచించారు ప్రశాంత్ కిషోర్. ఇక తాను స్వయంగా రాజకీయాల్లోకి దిగి జన సూరజ్ పార్టీ స్థాపించి, సొంత రాష్ట్రం బీహార్ ఎన్నికల్లో అన్ని స్థానాల్లో పోటీకి దిగారు. అయితే అనూహ్యంగా ఈ ఎన్నికల్లో ఒక్క స్థానంలో కూడా గెలవకపోగా కనీసం ఆధిక్యాన్ని కూడా కనబరచలేకపోతోంది. మొత్తం 243 స్థానాల్లో ప్రశాంత్ కిషోర్ సహా.. ఏ ఒక్క చోట కూడా జన సూరజ్ పార్టీ ఓట్లు సాధించలేకపోయింది. అందరికీ స్ట్రాటజీలు ప్లే చేసే పీకే తన విషయం వచ్చేసరికి చతికిలా పడిపోయాడు పాపం అంటున్నారు రాజకీయ విమర్శకులు.

బీహార్ అసెంబ్లీ ఎన్నికలు ప్రశాంత్ కిషోర్ కు రాజకీయ విపత్తుగా మారాయి. ఆయన పార్టీ జన్ సూరజ్ పార్టీ ఒకప్పుడు గేమ్-ఛేంజర్ గా, త్రిముఖ పోటీలో పోటీదారుగా ప్రశంసలు అందుకుంది. కానీ ఈ ఎన్నికల్లో ఆ పార్టీ ఘోర పరాజయాన్ని చవిచూసింది. బీహార్ లోని 243 స్థానాల్లో పికె పార్టీ ఏ ఒక్కదానిలోనూ ఆధిక్యంలో లేదు. ఆయన అభ్యర్థులందరూ పేలవమైన స్థితిలో ఉన్నారు. బీహార్ రాజధాని పాట్నాలోని కుమ్రార్ నియోజకవర్గం విజయం కోసం అత్యంత గట్టిగా ఎదురుచూస్తున్న అభ్యర్థి, కానీ అక్కడ కూడా పీకే పార్టీ మూడవ స్థానంలో వెనుకబడి ఉంది.

బీహార్ ఎన్నికల్లో ఎన్డీఏ కూటమి అఖండ విజయం దిశగా సాగుతుండగా, ప్రశాంత్ కిషోర్ తీసుకున్న సాహసోపేతమైన నిర్ణయం ఇప్పుడు చర్చనీయాంశమవుతున్నాయి. ఎన్నికలకు ముందు, బీహార్ ముఖ్యమంత్రి నితీష్ కుమార్ పార్టీ జనతాదళ్ యునైటెడ్ (జెడియు) 25 సీట్లకు మించి గెలవదని ప్రశాంత్ కిషోర్ పేర్కొన్నారు. నితీష్ కుమార్ పార్టీ 25 సీట్లకు మించి గెలిస్తే, తాను రాజకీయాలను విడిచిపెడతానని పీకే సవాల్ విసిరారు. తత్ఫలితంగా, ప్రశాంత్ కిషోర్ తన మాటకు కట్టుబడి రాజకీయాల నుండి రిటైర్ అవుతారా అనే ప్రశ్నలు ఇప్పుడు తలెత్తుతున్నాయి. తన పార్టీ జన్ సూరజ్‌కు వచ్చే సీట్ల సంఖ్యను కూడా పీకే వెల్లడించారు. తన పార్టీ 150 కంటే ఎక్కువ సీట్లు లేదా 10 కంటే తక్కువ సీట్లు గెలుచుకుంటుందని ఆయన పేర్కొన్నారు.

టీవీ ఛానెళ్లకు ఇచ్చిన ఇంటర్వ్యూలలో, అనేక బహిరంగ సభలలో, ప్రశాంత్ కిషోర్.. “ఎట్టి పరిస్థితుల్లోనూ NDA ప్రభుత్వం ఏర్పడదని రాతపూర్వకంగా రాసుకోండి. నవంబర్ తర్వాత నితీష్ కుమార్ బీహార్ ముఖ్యమంత్రిగా పదవి నుంచి తప్పుకుంటారు. కొత్త ముఖ్యమంత్రి నియమితులవుతారు” అని ఆయన అన్నారు. తన అంచనాలు విఫలమైతే తాను రాజకీయాల నుండి తప్పుకుంటానని PK రెండుసార్లు అన్నారు. జన్ సూరజ్ గెలిచినా, JDU గురించి తన అంచనాలు నిజం కాకపోయినా, తాను రాజకీయాల నుండి తప్పుకుంటానని కూడా ఆయన స్పష్టం చేశారు. అయితే ప్రస్తుతం NDA తిరిగి అధికారంలోకి రావడమే కాకుండా, గతసారి కంటే మెరుగ్గా తీరు కనబరుస్తున్నట్లు కనిపిస్తోంది. ఇప్పటికే 200 సీట్ల మార్క్ దాటేసింది. ఒక్క జెడియు 80 సీట్లు గెలుచుకుంటుందని ట్రెండ్స్ సూచిస్తున్నాయి. ప్రశాంత్ కిషోర్ తన ఖాతాను కూడా తెరవలేదు.

జన్ సూరజ్ పార్టీ ఏర్పాటు చేయడానికి ముందు ప్రశాంత్ కిషోర్ మే 5, 2022 నుండి అక్టోబర్ 2, 2024 వరకు 6,000 కిలోమీటర్లు పాదయాత్ర చేశారు. ఆయన 5,000 గ్రామాలకు చేరుకుని 5,000 సమావేశాలు నిర్వహించారు. బీహార్ అంతటా తిరుగుతూ గ్రామగ్రామాన విస్తృతంగా ప్రచారం చేశారు. ఆయన మే 2022 నుండి 1,280 రోజుల పాటు బీహార్ మొత్తాన్ని గాలించినా ఫలితాలు అంతంత మాత్రంగానే ఉన్నాయి. ప్రశాంత్ కిషోర్ తన ఎన్నికల ప్రచారాన్ని రోడ్డు మార్గంలోనే నిర్వహించారు. అక్టోబర్ 21 నుండి ప్రతిరోజూ సగటున 200 కి.మీ. ప్రయాణించానని పీకే చెప్పారు. ఆయన రోజూ 8 నుండి 10 అసెంబ్లీ నియోజకవర్గాలను చుట్టేశారు.

ప్రశాంత్ కిషోర్ అక్టోబర్ 2022 నుండి క్రమం తప్పకుండా బీహార్‌లో పర్యటించారు. ఆయనతో పాటు తన బృందం క్షేత్రస్థాయిలో ప్రచారం నిర్వహించింది. వారు ప్రజలతో వారి సమస్యలు, ఆదాయం, ఉపాధి, విద్య గురించి చర్చించారు. ఈ బృందంలో ఐటీ నిపుణులు, మాజీ జర్నలిస్టులు, సామాజిక కార్యకర్తలు ఉన్నారు. కన్సల్టెన్సీ కంపెనీ JSPT ప్రొఫెషనల్ బృందాన్ని నిర్వహించింది. పాట్నా సహా మొత్తం 38 జిల్లాల్లో సుమారు 1,300 మంది నిపుణులతో కూడిన ఇరవై ఐదు ప్రత్యేక బృందాలు పనిచేశాయి. ప్రతి జిల్లాలో మూడు ప్రధాన బృందాలను ఏర్పాటు చేసుకున్నారు ప్రశాంత్ కిశోర్.

ఆరు సంవత్సరాలలో ఆరుగురు ముఖ్యమంత్రులను నియమించిన ఈ వ్యక్తి బీహార్‌ను గెలవాలని బయలుదేరారు. అయితే ఒక్క సీటు కూడా గెలవలేకపోయాడు. కోటి మందికి పైగా సభ్యులున్న జన్ సురాజ్ పార్టీ, పది లక్షల ఓట్లను కూడా సంపాదించలేకపోయింది. పార్టీ నిలబెట్టిన 238 సీట్లలో 233 సీట్లలో డిపాజిట్లు గల్లంతయ్యాయి. అంటే వాటిలో 98% శాతం స్థానాల్లో కనీస ఓట్లు కూడా కరువయ్యాయి. జన్ సూరజ్ పార్టీకి దాదాపు 2% ఓట్లు వస్తాయని అంచనా వేశారు. కానీ అసదుద్దీన్ ఒవైసీ కి చెందిన AIMIM, మాయావతి BSP దీని కంటే మెరుగ్గా పనిచేశాయి. ఎన్నికలకు ముందు ప్రశాంత్ కిషోర్ గొప్ప వాదనలు చేశారు, కానీ ఎన్నికల ఫలితాలతో అవి బద్దలయ్యాయి.

మరిన్ని జాతీయ వార్తల కోసం ఇక్కడ క్లిక్ చేయండి..