ఉపాధి హామి పనుల్లో భాగంగా తవ్వకాలు.. తళుక్కున మెరుస్తూ కనిపించాయ్.. ఏంటా అని చూడగా

కర్ణాటకలోని బెళగావి జిల్లా, సావదత్తి తాలూకా ఇంచల్ గ్రామంలో ఉపాధి పనుల సందర్భంగా 14 పురాతన బంగారు నాణేలు బయటపడ్డాయి. సుమారు 800-1000 ఏళ్ల నాటివని అంచనా వేస్తున్న ఈ నాణేలను కార్మికులు నిజాయితీగా అధికారులకు అప్పగించారు. వీటి విలువ సుమారు రూ.8,20,000 ఉంటుందని అంచనా. పురావస్తు నిపుణుల పరిశీలన తర్వాత వీటి చారిత్రక ప్రాధాన్యం తెలుస్తుంది.

Workers Digging Soil

Ram Naramaneni |
Updated on: Sep 05, 2026 | 3:22 PM

కర్ణాటకలోని బెళగావి జిల్లాలో అరుదైన బంగారు నిధి బయటపడింది. సావదత్తి తాలూకాలోని ఇంచల్ గ్రామంలో జరుగుతున్న ఉపాధి పనుల సందర్భంగా మొత్తం 14 పురాతన బంగారు నాణేలు లభించాయి. బీబీజీ రాంజీ పనుల్లో నిమగ్నమైన కూలీలు ఈ నాణేలను గుర్తించారు. కూలీలు తమ నిజాయితీని చాటుకుంటూ, లభించిన ఈ పురాతన నాణేలను తమ వద్దే ఉంచుకోకుండా గ్రామ పంచాయతీ కార్యాలయం ద్వారా అధికారులకు అప్పగించారు. అధికారులు ఈ నాణేల వివరాలను వెల్లడించారు. ఒక్కో నాణెం సగటున 3.92 గ్రాముల బరువు ఉందని, మొత్తం 14 నాణేల బరువు 54.8 గ్రాములు ఉందని తెలిపారు.

ఈ నాణేలన్నింటిపైనా ఒకే తరహా డిజైన్ ఉందని, ఒకవైపు ఏనుగు బొమ్మ, మరోవైపు పురాతన కాలానికి చెందిన డిజైన్ ఉన్నట్లు గుర్తించారు. తహసీల్దార్ అంచనా ప్రకారం, ఈ 14 నాణేల మొత్తం విలువ సుమారు రూ.8,20,000 ఉండవచ్చు. ప్రాథమిక అంచనాల ప్రకారం, ఈ నాణేలు సుమారు 800 నుంచి 1000 సంవత్సరాల క్రితం నాటివని అధికారులు భావిస్తున్నారు. అయితే, ఈ నాణేలు ఏ కాలానికి చెందినవి, వాటి చారిత్రక ప్రాధాన్యం ఏమిటనేది పురావస్తు నిపుణులు క్షుణ్ణంగా పరిశీలించిన తర్వాతే స్పష్టమవుతుంది. ఈ అరుదైన ఆవిష్కరణ స్థానికంగా చర్చనీయాంశంగా మారింది. ఈ రోజు బయట ఎక్కడైనా 10 రూపాయలు కనిపిస్తేనే చప్పిడి కాకుండా జేబులు వేసుకుని వెళ్లిపోతున్నారు. అలాంటిది బంగారం దొరికినా అధికారులకు ఇవ్వడం మాములు విషయం కాదు.