Air India: ఇంకా నయం ముందే గుర్తించారు… టేకాఫ్‌కు ముందు ఎయిరిండియా విమానంలో సాంకేతిక లోపం

ఎయిర్‌ ఇండియా విమానాలు తరచుగా ప్రమాదాలకు గురి కావడం తీవ్ర కలకలం రేపుతోంది. ఈ మధ్య టెక్నికల్‌ ఇష్యూస్‌ వరుసగా వెలుగు చూస్తున్నాయి. తాజాగా ఢిల్లీలో ఎయిరిండియా విమానంలో సాంకేతిక లోపం తలెత్తింది. ముందుగానే సమస్యను గుర్తించడంతో టేకాఫ్‌ నిలిపివేశారు. ఢిల్లీ నుంచి ముంబై వెళ్లాల్సిన ఎయిరిండియా విమానంలో టెక్నికల్‌ సమస్యను గుర్తించారు. బుధవారం సాయంత్రం ఢిల్లీలోని ఐజిఐ విమానాశ్రయం నుండి 160 మంది ప్రయాణికులతో బయలుదేరిన ఎయిర్ ఇండియా ఎక్స్‌ప్రెస్ విమానం సాంకేతిక లోపం కారణంగా టేకాఫ్‌ను నిలిపివేశారు. విమానం వేగ పరిమితులను ప్రదర్శించే కాక్‌పిట్ స్క్రీన్‌లలో లోపం గుర్తించిన తర్వాత పైలట్ టేకాఫ్‌ను నిలిపివేయాలని నిర్ణయించుకున్నట్లు తెలుస్తోంది.

ఢిల్లీ నుండి వచ్చిన తమ విమానాలలో ఒకదాని సిబ్బంది ఒక చిన్న సాంకేతిక సమస్య కారణంగా భద్రతకు ప్రాధాన్యతనిస్తూ టేకాఫ్‌ను నిలిపివేయడానికి నిర్ణయించుకున్నారని ఎయిర్ ఇండియా ఎక్స్‌ప్రెస్ ప్రతినిధి తెలిపారు. ప్రయాణీకులందరినీ సురక్షితంగా దింపి, తరువాత ముంబైకి ప్రత్యామ్నాయ విమానంలో పంపించామని తెలిపారు. “ప్రయాణికుల భద్రతే తమకు అత్యంత ముఖ్యమని పునరుద్ఘాటిస్తూనే అసౌకర్యానికి చింతిస్తున్నాము” అని ప్రతినిధి ఒక ప్రకటనలో తెలిపారు.

అంతకుముందు, కాలికట్ నుండి దోహాకు వెళ్లే ఎయిర్ ఇండియా ఎక్స్‌ప్రెస్ విమానం (IX 375) బుధవారం (జూలై 23) సాంకేతిక సమస్య కారణంగా కాలికట్ అంతర్జాతీయ విమానాశ్రయానికి ముందుజాగ్రత్తగా తిరిగి వచ్చింది. సిబ్బంది మరియు పైలట్లు సహా 188 మందితో కూడిన ఈ విమానం ఉదయం 9:07 గంటలకు బయలుదేరింది, కానీ తిరిగి తిరిగి 11:12 గంటలకు సురక్షితంగా ల్యాండ్ అయిందని అధికారులు ధృవీకరించారు.

తిరిగి రావడం అత్యవసర ల్యాండింగ్ కాదని, క్యాబిన్ ఎయిర్ కండిషనింగ్ వ్యవస్థ పనిచేయకపోవడం వల్ల ఏర్పడిన భద్రతా చర్య అని విమానాశ్రయ అధికారులు స్పష్టం చేశారు.

సాంకేతిక సమస్య కారణంగా టేకాఫ్ అయిన తర్వాత విమానాలలో ఒకటి కేరళలోని కోజికోడ్‌కు తిరిగి వచ్చిందని ఎయిర్ ఇండియా ఎక్స్‌ప్రెస్ ప్రతినిధి తెలిపారు. ప్రాధాన్యతా క్రమంలో ప్రత్యామ్నాయ విమానాన్ని ఏర్పాటు చేసాము. ఆలస్యం సమయంలో అతిథులకు రిఫ్రెష్‌మెంట్‌లు అందించామని తెలిపారు.