రాజకీయ ప్రక్షాళనపై సుప్రీంకోర్టు సీరియస్..బీజేపీ, కాంగ్రెస్ సహా 9 పార్టీలకు జరిమానా
దేశంలో నేరగ్రస్త రాజకీయాలకు చెక్ పెట్టేందుకు నడుం బిగించిన సుప్రీంకోర్టు దీనిపై మరింత దృష్టి సారించింది. బీహార్ అసెంబ్లీ ఎన్నికల సందర్భంగా గత ఏడాది తాము జారీ చేసిన ఉత్తర్వులను పాటించకుండా ధిక్కరించినందుకు తొమ్మిది పార్టీలకు జరిమానా విధించింది.
Updated on: Aug 10, 2021 | 6:40 PM
దేశంలో నేరగ్రస్త రాజకీయాలకు చెక్ పెట్టేందుకు నడుం బిగించిన సుప్రీంకోర్టు దీనిపై మరింత దృష్టి సారించింది. బీహార్ అసెంబ్లీ ఎన్నికల సందర్భంగా గత ఏడాది తాము జారీ చేసిన ఉత్తర్వులను పాటించకుండా ధిక్కరించినందుకు తొమ్మిది పార్టీలకు జరిమానా విధించింది. బీజేపీ, కాంగ్రెస్ పార్టీలకు, మరో 5 పార్టీలకు లక్ష రూపాయల చొప్పున, సీపీఎం. ఎన్సీపీలకు 5 లక్షల చొప్పున జరిమానా విధించింది. ఎన్నికల్లో పోటీ చేసే తమ అభ్యర్థుల క్రిమినల్ రికార్డులను విధిగా ప్రచురించాలని ఆయా పార్టీలను కోర్టు లోగడ ఆదేశించింది. అయితే ఇవి ఆ ఉత్తర్వులను పాటించక పోవడం కోర్టు ధిక్కారమే అవుతుందంటూ కొన్ని పిటిషన్లు దాఖలయ్యాయి.వీటిని విచారించిన కోర్టు మంగళవారం ఈ చర్య తీసుకుంది. భవిష్యత్తులో తమ అభ్యర్థుల నేర ఛరిత్రను తమ వెబ్ సైట్లలో ప్రచురించడానికి అన్ని చర్యలూ తీసుకోవాలని సూచించింది. అలాగే ఓటర్లకు సులభంగా అందుబాటులో ఉండేట్టు ఓ మొబైల్ యాప్ ను క్రియేట్ చేయాలని ఎన్నికల సంఘాన్ని ఆదేశించింది. పాలిటిక్స్ లో నేరగాళ్లకు చోటులేకుండా చూసేందుకు ఇది అత్యున్నత న్యాయస్థానం తీసుకున్న అత్యంత ప్రధాన చర్య అంటున్నారు. బీహార్ ఎన్నికల్లో పోటీ చేయగోరిన అభ్యర్థులు 48 గంటల్లో గానీ, తమ నామినేషన్ల దాఖలుకు రెండు వారాల్లోగా గానీ తమ నేరాల చిట్టాను బహిర్గతపరచాలని కోర్టు నాడు ఆదేశించినప్పటికీ.. ప్రస్తుతం దీన్ని 48 గంటలకు కుదించింది.
తమ అభ్యర్థుల నేర చరిత్రను ప్రకటించని పార్టీల ఎన్నికల చిహ్నాలను రద్దు చేయాలని కోరుతూ దాఖలైన పిటిషన్ ని కూడా కోర్టు విచారించింది. క్రిమినల్ కేసులున్నవారిని అభ్యర్థులుగా ఎందుకు ఎంపిక చేశారో సంజాయిషీ ఇవ్వాలని సైతం కోర్టు కోరింది. ఇందుకు కారణాలను ఆయా పార్టీలు తమ వెబ్ సైట్లలో పేర్కొనాలని ఆదేశించింది. కాగా బీహార్ ఎన్నికల సందర్భంలో తమ క్యాండిడేట్ల క్రిమినల్ చరిత్రను వెల్లడించనందుకు బేషషరతుగా తమను క్షమించాలంటూ సీపీఎం, నేషనలిస్ట్ కాంగ్రెస్ పార్టీ .. కోర్టును కోరాయి. కోర్టు ఆదేశాల మేరకు వీటి ఎన్నికల చిహ్నాలను రద్దు చేస్తామని ఎన్నికల కమిషన్ వెల్లడించింది.
మరిన్ని ఇక్కడ చూడండి : Taliban Live Video: తాలిబన్లు ఘాతుకం.. బిగుతుగా డ్రెస్ వేసుకుందని మహిళ హతం..
