ఆత్మవిశ్వాసం అంటే ‘అరుపులు’ కాదు.. అది ‘నిశ్శబ్ద శక్తి’! ఈ 5 పనులు చేస్తే మీరే లీడర్!

ముఖ్యంగా నాయకత్వ బాధ్యతల్లో ఉన్న మహిళలకు స్థిరత్వం అనేది ఒక గొప్ప ఆయుధం. వర్టిసెస్ పార్ట్‌నర్స్ వ్యవస్థాపకులు అర్చన ఖోస్లా బర్మన్ సూచించిన 5 శక్తివంతమైన రోజువారీ సూత్రాలేంటో తెలుసుకుందాం. చాలామంది ఆత్మవిశ్వాసాన్ని తప్పుగా అర్థం చేసుకుంటారు. ఏదో ఒక పెద్ద సందర్భంలో మనల్ని మనం నిరూపించుకోవడమే కాన్ఫిడెన్స్ అనుకుంటారు. కానీ, అసలైన ఆత్మవిశ్వాసం అనేది ఒత్తిడిలో ఉన్నప్పుడు మీరు ఎలా స్పందిస్తారు, నిర్ణయాలు ఎలా తీసుకుంటారు అనే దానిపై ఆధారపడి ఉంటుంది. అది రోజువారీ సాధన ద్వారా మాత్రమే వస్తుంది. మీ వ్యక్తిత్వాన్ని, వృత్తిపరమైన ఎదుగుదలను మార్చే ఆ 5 అలవాట్లు ఇవే..

ఒక ‘హద్దు’ నిర్ణయించుకోండి

చాలామంది మహిళలు అందరికీ నచ్చాలని, అందరికీ సహాయపడాలని ప్రయత్నిస్తుంటారు. కానీ, మీ సమయానికి, మీ మానసిక ప్రశాంతతకు విలువ ఇవ్వడం చాలా ముఖ్యం. అది ఒక చిన్న విషయమైనా కావచ్చు—సమయానికి మీటింగ్ ముగించడం లేదా ఏదైనా పనికి వెంటనే ‘అవును’ అనకుండా “ఆలోచించి చెబుతాను” అని చెప్పడం. ఇలా మీ పరిమితులను గౌరవించుకోవడం వల్ల మీపై మీకు గౌరవం పెరుగుతుంది.

తొందర వద్దు..

నేటి వేగవంతమైన ప్రపంచంలో ఈమెయిల్స్ లేదా మెసేజ్‌లకు వెంటనే రిప్లై ఇవ్వాలనే ఒత్తిడి ఉంటుంది. కానీ, వెంటనే స్పందించడం కంటే, ఆలోచించి సరైన రీతిలో స్పందించడం ముఖ్యం. ఒక నిమిషం ఆగి మాట్లాడటం వల్ల మీ భావోద్వేగాలు అదుపులో ఉంటాయి. ఇది మీ సహోద్యోగుల దృష్టిలో మీ క్రెడిబిలిటీని పెంచుతుంది.

సమయం తీసుకోండి..

ఏదైనా క్లిష్టమైన సమస్య లేదా కష్టమైన నిర్ణయం ఎదురైనప్పుడు మన మెదడు వెంటనే అక్కడి నుంచి తప్పించుకోవాలని చూస్తుంది. కానీ, ఆ అసౌకర్యాన్ని భరించి, మరో ఐదు నిమిషాలు ఆ సమస్యను విశ్లేషించండి. డేటాను మరోసారి చూడండి. కష్ట సమయాల్లో కూడా మీరు నిలబడగలరనే నమ్మకం మీలో బలమైన ఆత్మవిశ్వాసాన్ని నింపుతుంది.

మిమ్మల్ని మీరు తగ్గించుకోకండి..

చాలా మంది మహిళలు మాట్లాడేటప్పుడు తెలియకుండానే “బహుశా నేను చెప్పేది తప్పేమో”, “క్షమించండి కానీ..” వంటి పదాలు వాడుతుంటారు. ఇది సామాజికంగా అలవాటైన విషయం. అయితే, ఇలా మిమ్మల్ని మీరు ఎక్కడ తగ్గించుకుంటున్నారో గమనించండి. ఈ అవగాహన కలిగినప్పుడు, భవిష్యత్తులో మీ అభిప్రాయాలను మరింత స్పష్టంగా, నమ్మకంగా చెప్పగలుగుతారు.

చెక్​ చేసుకోండి..

రోజంతా పని ముగిశాక “నేను ఈరోజు సరిగ్గా పని చేశానా?” అని భావోద్వేగంతో ఆలోచించకండి. దానికి బదులుగా నిదానంగా చెక్​ చేసుకోండి..

• ఈరోజు నేను ఏ నిర్ణయాన్ని నీతిగా తీసుకున్నాను?
• ఒత్తిడిలో కూడా ఎక్కడ నిలకడగా ఉన్నాను?
• ఏ బాధ్యతను నేను సమర్థవంతంగా నిర్వహించాను? భావోద్వేగాల మీద ఆధారపడే ఆత్మవిశ్వాసం ఎప్పుడూ ఊగిసలాడుతుంది, కానీ సాక్ష్యాల మీద ఆధారపడే నమ్మకం స్థిరంగా ఉంటుంది.

విజయం అనేది తీవ్రమైన హడావిడిలో లేదు, అది మీలోని నిలకడలో ఉంది. ఈ 5 సూత్రాలను పాటిస్తే, మీ ఆత్మవిశ్వాసం కేవలం మాటల్లోనే కాదు, మీ ప్రవర్తనలోనూ కనిపిస్తుంది.