Vegan vs Meat: వీగన్ Vs మాంసాహారం: కవల సోదరుల ఆర్నెళ్ల ప్రయోగం.. చివరికి రిజల్ట్ చూస్తే షాకే..
కొందరు మాంసాహారమే ఆరోగ్యానికి మంచిదంటే మరికొందరు పూర్తిగా మొక్కల ఆధారంగా అందే పదార్థాలనే తింటున్నారు. దీన్నే వీగన్ డైట్ పేరుతో పాపులర్ చేస్తున్నారు. ఇక డైట్ పాటించాలనుకునే వారికి ఇప్పటికీ తేలిని చిక్కుముడి ఈ రెండిట్లో ఆరోగ్యానికి ఏది మంచిదని. ఈ ప్రశ్నకు సమాధానం కనుగొనేందుకు ఓ ఇద్దరు కవల సోదరులు ఆర్నెళ్ల పాటు చెరో డైట్ పై ప్రయోగం చేశారు. చివరకు ఏం తేల్చారో మీరే చదవండి.
Updated on: Apr 10, 2025 | 8:09 PM
ఆరోగ్యకరమైన జీవనశైలి కోసం ఏ ఆహారం ఉత్తమమైనదనే చర్చ ఎప్పటి నుంచో నడుస్తోంది. వీగన్ డైట్ లేదా మాంసాహార డైట్.. రెండింటిలో ఏది మంచిది. ఈ ప్రశ్నకు సమాధానం కనుగొనేందుకు ఇద్దరు కవల సోదరులు ఒక ప్రత్యేకమైన ప్రయోగానికి శ్రీకారం చుట్టారు. ఆరు నెలల పాటు ఒక సోదరుడు పూర్తిగా శాఖాహార వీగన్ ఆహారాన్ని తీసుకోగా.. మరొకరు మాంసాహార ఆహారాన్ని మాత్రమే తీసుకున్నారు. ఈ ప్రయోగం ఫలితాలు ఇంట్రెస్టింగ్ విషయాలను వెల్లడించాయి. మీరు కూడా మీ ఆరోగ్యానికి ఏ డైట్ మంచిదా అని ఆలోచిస్తుంటే వెంటనే ఈ విషయాలు తెలుసుకోండి.
ప్రయోగం ఎలా చేశారంటే..
ఈ ఆరు నెలల ప్రయోగంలో, కవల సోదరులు తమ ఆహారపు అలవాట్లను మార్చి, శరీరంలోని మార్పులను సైంటిఫిక్ గా పరిశీలించారు. వీగన్ డైట్ను అనుసరించిన వ్యక్తి మాంసం, పాల ఉత్పత్తులు, గుడ్లను పూర్తిగా వదిలేసి కూరగాయలు, పండ్లు, గింజలు, ధాన్యాలతో సరిపెట్టుకున్నాడు. మరోవైపు, మాంసాహార డైట్లో ఉన్న సోదరుడు మాంసం, చేపలు, గుడ్లతో పాటు కొన్ని కూరగాయలను కూడా తీసుకున్నాడు. ఈ కాలంలో వారి రక్త పరీక్షలు, శరీర బరువు, శక్తి స్థాయిలు ఇతర ఆరోగ్య సూచికలను నిశితంగా గమనించారు.
ఫలితాలు ఏం చెబుతున్నాయి?
ప్రయోగం ముగిసే సమయానికి ఇద్దరి ఆరోగ్యంలో గణనీయమైన తేడాలు కనిపించాయి. వీగన్ డైట్లో ఉన్న సోదరుడు విటమిన్ బి12 స్థాయిలలో కొంత తగ్గుదలను ఎదుర్కొన్నప్పటికీ, విటమిన్ సి, విటమిన్ ఇ, ఫైబర్ వంటి పోషకాలు అధికంగా ఉన్నట్లు గుర్తించారు. ఇది అతని రోగనిరోధక శక్తిని మెరుగుపరచడంతో పాటు గుండె ఆరోగ్యానికి కూడా సానుకూలంగా పనిచేసింది. మరోవైపు, మాంసాహార డైట్లో ఉన్న సోదరుడు విటమిన్ బి12, ఐరన్, ప్రోటీన్ స్థాయిలలో బలమైన ఫలితాలను చూపించాడు, కానీ అతని శరీరంలో కొలెస్ట్రాల్ స్థాయిలు కొంత పెరిగాయి.
ఏ డైట్ గెలిచింది?
ఈ ప్రయోగం ఒకే ఆహార విధానం అందరికీ ఉత్తమమని నిర్ధారించలేదు, బదులుగా వ్యక్తిగత అవసరాలు జీవనశైలిపై ఆధారపడి ఆహారం ఎంపిక చేసుకోవాలని సూచిస్తుంది. వీగన్ డైట్ యాంటీఆక్సిడెంట్లు, ఫైబర్లో బలంగా ఉండగా, మాంసాహార డైట్ ప్రోటీన్, విటమిన్ బి12 వంటి అంశాల్లో మెరుగైన ఫలితాలను ఇచ్చింది. నిపుణులు సూచించినట్లు, సమతుల్య ఆహారం అంటే రెండు డైట్ల ఉత్తమ అంశాలను కలపడం శరీరానికి అన్ని రకాల పోషకాలను అందించడంలో సహాయపడుతుంది.
మీకు ఏది సరైనది?
ఈ కవల సోదరుల ప్రయోగం ఆహారం ఎంపిక విషయంలో ఒకే సమాధానం లేదని స్పష్టం చేస్తుంది. మీ శరీర అవసరాలు, ఆరోగ్య లక్ష్యాలు వైద్య సలహా ఆధారంగా డైట్ను ఎంచుకోవడం ముఖ్యం. మీరు వీగన్ డైట్ను పరిగణనలోకి తీసుకుంటే విటమిన్ బి12 సప్లిమెంట్స్ గురించి ఆలోచించండి, అదే విధంగా మాంసాహారం తీసుకునేవారు కొలెస్ట్రాల్ స్థాయిలపై శ్రద్ధ వహించాలి.
