Video: జేబులో ఉల్లిపాయ ఉంటే వడదెబ్బ తగలదా..? కేంద్రమంత్రి వైరల్ వీడియో వెనుక అసలు నిజం ఇదీ..

ఎండలు దంచికొడుతున్నాయి. కూలర్లు, ఏసీలు లేకుండా ప్రజలు ఉండలేని పరిస్థితి.. కానీ ఒక కేంద్ర మంత్రి మాత్రం ఏసీ లేకుండానే, కేవలం జేబులో ఒక ఉల్లిపాయ పెట్టుకుని తిరుగుతున్నారు. ఏంటి.. వినడానికి వింతగా ఉందా? జేబులో ఉల్లిపాయ ఉంటే వడదెబ్బ తగలదా? ఇది పెద్దలు చెప్పిన మాటలా లేక దీని వెనుక ఏదైనా సైన్స్ ఉందా? ఈ ఉల్లిపాయ రహస్యం ఏంటో ఇప్పుడు తెలుసుకుందాం..

Jyotiraditya Scindia Onion Tips

Krishna S |
Updated on: Apr 28, 2026 | 3:14 PM

దేశవ్యాప్తంగా ఎండలు మండిపోతున్నాయి. భానుడి భగభగలకు జనం అల్లాడిపోతుంటే, కేంద్ర మంత్రి జ్యోతిరాదిత్య సింధియా పంచుకున్న ఒక ఆసక్తికరమైన చిట్కా ఇప్పుడు సోషల్ మీడియాలో హాట్ టాపిక్‌గా మారింది. 51 డిగ్రీల ఎండలో కూడా తాను కారులో ఏసీ వాడనని, కేవలం జేబులో ఒక ఉల్లిపాయ ఉంచుకుని వేడిని తట్టుకుంటానని ఆయన చేసిన ప్రకటన చర్చకు దారితీసింది. సోషల్ మీడియాలో వైరల్ అవుతున్న వీడియోలో.. మంత్రి తన జేబులోంచి ఒక ఉల్లిపాయను తీసి చూపిస్తూ.. ‘‘మీ జేబులో ఒక ఉల్లిపాయ ఉంచుకోండి, వడగాల్పుల నుండి సురక్షితంగా ఉండండి’’ అని సూచించారు. మన పెద్దల కాలం నాటి ఈ సంప్రదాయ చిట్కాను ఆయన స్వయంగా పాటిస్తుండటం అందరినీ ఆశ్చర్యపరిచింది.

ఉల్లిపాయలో ఉన్న ఆ శక్తి ఏంటి..?

భారతీయ ఆహారంలో ఉల్లిపాయలకు ప్రత్యేక స్థానం ఉంది. ముఖ్యంగా వేసవిలో పచ్చి ఉల్లిపాయలను తినడం వల్ల అనేక ప్రయోజనాలు ఉన్నాయి.

హైడ్రేషన్: ఉల్లిపాయల్లో నీటి శాతం ఎక్కువగా ఉండి శరీరాన్ని డీహైడ్రేషన్ నుండి కాపాడుతుంది.

క్వెర్సెటిన్: ఇందులో ఉండే ఈ ప్రత్యేక ఫ్లేవనాయిడ్ ఆక్సీకరణ ఒత్తిడిని తగ్గిస్తుంది.

చలువ చేసే గుణం: పచ్చి ఉల్లిపాయలు శరీరానికి తేలికపాటి చల్లదనాన్ని ఇస్తాయి.

శాస్త్రం ఏం చెబుతోంది..?

అయితే ఉల్లిపాయను తినడం వేరు, జేబులో ఉంచుకోవడం వేరు. జేబులో ఉల్లిపాయ ఉంటే వడదెబ్బ తగలదు అనే నమ్మకానికి ఎలాంటి శాస్త్రీయ ఆధారాలు లేవని వైద్య నిపుణులు స్పష్టం చేస్తున్నారు.

వేడిని గ్రహిస్తుందా?: ఉల్లిపాయలు గాలిలోని వేడిని లేదా శరీర ఉష్ణోగ్రతను గ్రహించగలవని చెప్పడానికి ఎక్కడా నిరూపితం కాలేదు.

వడదెబ్బ ఎలా తగులుతుంది?: శరీరం తన ఉష్ణోగ్రతను తాను క్రమబద్ధీకరించుకోలేనప్పుడు వడదెబ్బ తగులుతుంది. ఇది శరీర అంతర్గత ప్రక్రియ. జేబులో ఉండే ఉల్లిపాయ దీనిని ప్రభావితం చేయలేదు.

జానపద నమ్మకం: ఇదొక పురాతన జానపద నమ్మకం మాత్రమే. పూర్వ కాలంలో ప్రయాణికులు ఎండలో వెళ్లేటప్పుడు ఉల్లిపాయను వెంట తీసుకెళ్లేవారు.. అది బహుశా దారిలో తినడానికి ఉపయోగపడుతుందని కావచ్చు.

వైద్యుల సలహా ఇదీ..

కేవలం ఉల్లిపాయపైనే ఆధారపడకుండా, తీవ్రమైన ఎండల నుండి రక్షణ పొందడానికి నిపుణులు ఈ క్రింది సూచనలు చేస్తున్నారు..

నీరు ఎక్కువగా తాగాలి: ఓఆర్ఎస్, కొబ్బరి నీళ్లు వంటి ద్రవ పదార్థాలు తీసుకోవాలి.

బయటకు వెళ్లినప్పుడు: మధ్యాహ్నం 12 నుండి 4 గంటల మధ్య ప్రయాణాలు తగ్గించాలి.

సరైన దుస్తులు: లేత రంగు కాటన్ దుస్తులు ధరించాలి.

ఏసీ, కూలర్ వాడకం: ఉష్ణోగ్రత అధికంగా ఉన్నప్పుడు శరీర ఉష్ణోగ్రతను నియంత్రించే సాధనాలను ఉపయోగించడమే క్షేమదాయకం.

జ్యోతిరాదిత్య సింధియా చెప్పిన ఉల్లిపాయ చిట్కా సంప్రదాయం పట్ల ఆయనకున్న గౌరవాన్ని చాటుతున్నప్పటికీ, ఆరోగ్యపరంగా మాత్రం శాస్త్రీయ జాగ్రత్తలే మేలని నిపుణులు గుర్తు చేస్తున్నారు. ఉల్లిపాయను జేబులో పెట్టుకోవడమే కాకుండా, ఆహారంలో భాగంగా తీసుకోవడం ద్వారా మరిన్ని ప్రయోజనాలు పొందవచ్చు.