మహిళలు జిమ్‌కి వెళితే ఏం జరుగుతుందో తెలుసా? ఈ లాభాలు తెలిస్తే అస్సలు మానరు

చాలామంది మహిళలు జిమ్‌కు వెళ్లడం అంటే కేవలం బాడీ బిల్డింగ్ కోసమే అని భావిస్తారు. కానీ, స్ట్రెంత్ ట్రైనింగ్ అనేది మహిళల శరీరంలో ఒక శక్తివంతమైన ‘హార్మోన్ థెరపీ’లా పనిచేస్తుంది. ఇది ఈస్ట్రోజెన్, ప్రొజెస్టిరాన్, ఇన్సులిన్ మరియు కార్టిసాల్ వంటి కీలక హార్మోన్లను నియంత్రించడంలో సహాయపడుతుంది.

నేటి కాలంలో మహిళలు ఎదుర్కొంటున్న ప్రధాన ఆరోగ్య సమస్యల్లో హార్మోన్ల అసమతుల్యత ఒకటి. పీసీఓఎస్ (PCOS), థైరాయిడ్ సమస్యలు లేదా మెనోపాజ్.. కారణం ఏదైనా సరే, దీనివల్ల క్రమరహిత పీరియడ్స్, జుట్టు రాలడం, ఆకస్మికంగా బరువు పెరగడం, మూడ్ స్వింగ్స్ వంటి ఇబ్బందులు తప్పవు. అయితే, వీటన్నింటికీ ఒక అద్భుతమైన పరిష్కారం ‘స్ట్రెంత్ ట్రైనింగ్’ అని వైద్య నిపుణులు చెబుతున్నారు. 30, 40 ఏళ్లు పైబడిన మహిళలు కేవలం కండరాల కోసం కాకుండా, తమ హార్మోన్ల ఆరోగ్యం కోసం బరువులు ఎత్తడం ప్రారంభించాలని ఆయన సూచిస్తున్నారు.

హార్మోన్ల ప్రయోజనాలు..

* ఈస్ట్రోజెన్ & ప్రొజెస్టిరాన్ సమతుల్యత- బరువులు ఎత్తడం వల్ల శరీరంలో సహజంగా ప్రొజెస్టిరాన్ పెరుగుతుంది మరియు అదనపు ఈస్ట్రోజెన్ బయటకు పంపబడుతుంది. దీనివల్ల పీరియడ్స్ సమయంలో వచ్చే వికారం, మూడ్ స్వింగ్స్, పీఎంఎస్ (PMS) లక్షణాలు తగ్గుతాయి. * ఇన్సులిన్ రెసిస్టెన్స్ నివారణ- శరీరంలో కండరాల శాతం పెరిగితే, గ్లూకోజ్ నిల్వ సామర్థ్యం పెరుగుతుంది. దీనివల్ల రక్తంలో చక్కెర స్థాయిలు అకస్మాత్తుగా పెరగవు. ఇన్సులిన్ అదుపులో ఉంటే మెదడు పనితీరు మెరుగుపడటమే కాకుండా ఆకలి కూడా నియంత్రణలో ఉంటుంది. * కార్టిసాల్ నియంత్రణ- వ్యాయామం చేయడం వల్ల మన నాడీ వ్యవస్థ దృఢంగా మారుతుంది. ఇది ఒత్తిడి హార్మోన్ అయిన ‘కార్టిసాల్’ను తగ్గించి, శరీరాన్ని ఇన్ఫ్లమేషన్ (వాపు) నుండి కాపాడుతుంది. * టెస్టోస్టెరాన్ బూస్ట్- మహిళల్లో కూడా తక్కువ మొత్తంలో టెస్టోస్టెరాన్ అవసరం. స్ట్రెంత్ ట్రైనింగ్ వల్ల ఇది పెరిగి, మానసిక చురుకుదనం, ఆత్మవిశ్వాసం మరియు లైంగిక వాంఛ మెరుగుపడతాయి.

“మీరు కేవలం అందం కోసం కాకపోయినా, మీ హార్మోన్ల ఆరోగ్యం కోసమైనా బరువులు ఎత్తండి” అని నిపుణులు సూచిస్తున్నారు. సరైన శిక్షకుడి పర్యవేక్షణలో వారానికి కనీసం 2-3 సార్లు స్ట్రెంత్ ట్రైనింగ్ చేయడం వల్ల మహిళలు తమ శారీరక, మానసిక ఆరోగ్యాన్ని అద్భుతంగా మెరుగుపరుచుకోవచ్చు.