బరువు తగ్గాలనుకుంటే ఆ పని మాత్రం అస్సలు చేయద్దు! చేస్తే డేంజర్‌‌ జోన్‌లో ఉన్నట్టే

కానీ ఇది ఎంతవరకు నిజం? అసలు ఉదయం పూట శరీరానికి అందాల్సిన ఇంధనం అందకపోతే మన అవయవాలు ఎలా స్పందిస్తాయి? పొద్దున్నే టిఫిన్ మానేయడం వల్ల మీరు నిజంగా సన్నబడతారా లేక లేనిపోని రోగాలను కొని తెచ్చుకుంటున్నారా? జపాన్ నుంచి అమెరికా వరకు జరిగిన అనేక పరిశోధనలు ఈ విషయంలో సంచలన విషయాలను వెల్లడించాయి. బరువు తగ్గడం పక్కన పెడితే.. ఈ అలవాటు వల్ల మీ మెదడు పనితీరు కూడా మందగించే ప్రమాదం ఉంది. ఆ ఆసక్తికరమైన సైంటిఫిక్ విషయాలు ఇప్పుడు తెలుసుకుందాం..

బ్రేక్‌ఫాస్ట్ మానేస్తే..

అవును.. వినడానికి ఆశ్చర్యంగా ఉన్నా ఇది నిజం. చాలా సందర్భాల్లో బ్రేక్‌ఫాస్ట్ మానేయడం వల్ల బరువు తగ్గకపోగా.. మరింత పెరిగే అవకాశం ఉందని పరిశోధనలు చెబుతున్నాయి. పొద్దున్నే ఏమీ తినకపోవడం వల్ల మధ్యాహ్నం సమయానికి కడుపులో ఆకలి సెగలు పుడుతుంటాయి. ఈ తీవ్రమైన ఆకలి వల్ల మధ్యాహ్నం భోజనంలో మనకు తెలియకుండానే ఎక్కువ క్యాలరీలు ఉన్న ఆహారాన్ని, జంక్ ఫుడ్‌ను ఆరగిస్తాం. ఉదయం ఆహారం తీసుకోకపోవడం వల్ల రక్తంలో చక్కెర స్థాయిలు ఒక్కసారిగా పడిపోతాయి.

ఆ తర్వాత మధ్యాహ్నం భారీ భోజనం చేయడం వల్ల ఇన్సులిన్ అకస్మాత్తుగా పెరుగుతుంది. ఈ హెచ్చుతగ్గులు శరీరంలో కొవ్వు నిల్వలు పెరగడానికి ప్రధాన కారణమవుతాయి. రాత్రంతా నిద్రపోయిన తర్వాత మన శరీరానికి శక్తి అవసరం. అది అందకపోతే శరీరం ‘సర్వైవల్ మోడ్’లోకి వెళ్తుంది. అంటే శక్తిని ఆదా చేయడం కోసం మెటబాలిజం రేటును తగ్గించేస్తుంది. ఫలితంగా మీరు ఎంత తక్కువ తిన్నా సరే క్యాలరీలు త్వరగా ఖర్చు అవ్వవు.

కేవలం ‘ఇంటర్మిటెంట్ ఫాస్టింగ్’ (16/8 పద్ధతి) పాటించే వారు మాత్రమే బ్రేక్‌ఫాస్ట్ మానేసి బరువు తగ్గే అవకాశం ఉంది. అంటే ఉదయం టిఫిన్ మానేసి, కేవలం మధ్యాహ్నం నుంచి రాత్రి ఎనిమిది గంటల లోపు మాత్రమే భోజనం చేస్తూ, రోజంతా తీసుకునే మొత్తం క్యాలరీలను కచ్చితంగా లెక్కిస్తే ఫలితం ఉంటుంది. అయితే ఇది అందరికీ సరిపడదు. ముఖ్యంగా గ్యాస్ట్రిక్ సమస్యలు ఉన్నవారు, షుగర్ వ్యాధిగ్రస్తులు ఇలా చేయడం వల్ల తీవ్ర అనారోగ్య పాలయ్యే ప్రమాదం ఉంది.

బ్రేక్‌ఫాస్ట్ అంటేనే రాత్రంతా మనం ఉన్న ఉపవాసాన్ని విరమించడం అని అర్థం. ఉదయం పూట పోషక విలువలూ ఉన్న ఆహారం తీసుకోవడం వల్ల కలిగే లాభాలు చాలా ఉన్నాయి. ఉదయం గ్లూకోజ్ అందడం వల్ల ఏకాగ్రత, జ్ఞాపకశక్తి పెరుగుతాయి. ఆఫీసులో లేదా చదువులో చురుగ్గా ఉండవచ్చు. సరైన ప్రోటీన్ ఉండే టిఫిన్ తీసుకుంటే రోజంతా నీరసం రాకుండా ఉంటుంది. క్రమం తప్పకుండా బ్రేక్‌ఫాస్ట్ చేసేవారిలో కొలెస్ట్రాల్, రక్తపోటు అదుపులో ఉంటాయని అధ్యయనాలు స్పష్టం చేస్తున్నాయి.

బరువు తగ్గాలంటే..

నిజంగా సన్నబడాలి అనుకుంటే బ్రేక్‌ఫాస్ట్ మానేయడం కంటే.. ఏం తింటున్నారనే దానిపై దృష్టి పెట్టాలి. మైదా ఇడ్లీలు, పంచదార ఎక్కువగా ఉండే సెరియల్స్ కంటే ఓట్స్, రాగి జావ, మొలకలు వంటివి మేలు చేస్తాయి. ప్రోటీన్ ఎక్కువగా ఉండే గుడ్లు, పప్పు ధాన్యాలు తింటే ఎక్కువ సేపు ఆకలి వేయకుండా ఉంటుంది. పండ్లు, కూరగాయలు చేర్చుకోవడం వల్ల జీర్ణక్రియ బాగుంటుంది.

బ్రేక్‌ఫాస్ట్ మానేయడం అనేది బరువు తగ్గడానికి శాశ్వత పరిష్కారం కాదు. నిజానికి ఇది అతిగా తినడానికి దారితీసి కొవ్వు పేరుకుపోయేలా చేస్తుంది. కాబట్టి పోషకాలతో కూడిన మితమైన టిఫిన్ చేయడం, రోజంతా చురుగ్గా కదలడం, క్రమం తప్పకుండా వ్యాయామం చేయడం ద్వారానే ఆరోగ్యకరంగా బరువు తగ్గవచ్చు.