అది లగ్జరీ కాదు సెల్ఫ్ కేర్..! GenZల సరికొత్త లైఫ్‌స్టైల్ వెనుక దాగిన సీక్రెట్‌

మారుతున్న కాలంతో పాటు మనుషుల ఆలోచనా ధోరణి, జీవనశైలిలో భారీ మార్పులు వస్తున్నాయి. ముఖ్యంగా నేటి యువత (జెన్-జెడ్) విషయానికి వస్తే, గత తరాలు విలాసాలుగా భావించిన అంశాలను వీరు తమ ‘సెల్ఫ్ కేర్’ (స్వయం సంరక్షణ)లో భాగంగా చూస్తున్నారు. ఒకప్పుడు మాచా టీ తాగడం, ఖరీదైన మేకప్ వాడటం లేదా మ్యూజిక్ కాన్సర్ట్స్‌కు వెళ్లడం వంటివి కేవలం ధనవంతుల సరదాలుగా ఉండేవి. కానీ ఇప్పుడు యువతకు ఇవి కేవలం ఎంజాయ్‌మెంట్ మాత్రమే కాదు, మానసిక ప్రశాంతతను ఇచ్చే చికిత్సలు. భవిష్యత్తు కోసం వర్తమానాన్ని పూర్తిగా త్యాగం చేయాలనే పాత తరం ఆలోచనలకు భిన్నంగా, ఈ క్షణాన్ని ఆస్వాదించాలనే కొత్త ధోరణి ఇప్పుడు కనిపిస్తోంది.

లిప్‌స్టిక్ ఎఫెక్ట్

ఆర్థికంగా ఒత్తిడిలో ఉన్నప్పుడు లేదా పెద్ద పెద్ద ఆస్తులు కొనడం భారమైనప్పుడు, చిన్న చిన్న వస్తువుల ద్వారా సంతోషాన్ని వెతకడాన్ని ‘లిప్‌స్టిక్ ఎఫెక్ట్’ అంటారు. ఉదాహరణకు, ఒక కప్పు మాచా టీ తాగడం వల్ల కలిగే ప్రశాంతత లేదా మేకప్ వేసుకోవడం వల్ల వచ్చే ఆత్మవిశ్వాసం జెన్-జెడ్‌కు ఒక థెరపీలా పనిచేస్తాయి. ప్రస్తుత ఆర్థిక పరిస్థితుల్లో ఇళ్లు, కార్లు కొనడం కష్టంగా మారడంతో, యువత తమ దృష్టిని వస్తువుల నుండి అనుభవాల వైపు మళ్లించింది. అందుకే ఫేవరెట్ సింగర్ కాన్సర్ట్‌కు వెళ్లడాన్ని కేవలం వినోదంగా కాకుండా, జీవితాంతం గుర్తుండిపోయే జ్ఞాపకంగా భావిస్తున్నారు. డబ్బును దాచి పెట్టడం కంటే, దాంతో సంతోషకరమైన క్షణాలు సృష్టించుకోవడమే మిన్న అనేది వీరి వాదన.

బాధ్యతాయుతమైన ఖర్చు

జెన్-జెడ్ ప్రతి పైసాను వృథా చేస్తున్నారనుకోవడం పొరపాటే. వారు ‘కాన్షియస్ స్పెండింగ్’ అనే పద్ధతిని అనుసరిస్తున్నారు. అంటే తమ ఆదాయంలో కొంత భాగాన్ని సిప్ (SIP), ఇన్సూరెన్స్ వంటి వాటి ద్వారా భవిష్యత్తు కోసం భద్రపరుస్తూనే, మిగిలిన మొత్తాన్ని తమ మానసిక ఆరోగ్యం కోసం ఖర్చు చేస్తున్నారు. గత తరాలు వీటిని వృథా ఖర్చులు అని పిలిచినా, నేటి యువతకు ఇవి ఒత్తిడిని తగ్గించే సాధనాలు. “నా సంతోషం కోసం ఈ చిన్న ఖర్చులు చేయడానికి నాకు పూర్తి అర్హత ఉంది” అనే స్పష్టత వీరిలో కనిపిస్తోంది. ఆత్మవిశ్వాసాన్ని పెంచే మేకప్ అయినా, మనసును శాంతపరిచే మాచా టీ అయినా.. వారి దృష్టిలో ఇవి జీవన వేగంలో దొరికే చిన్నపాటి విరామాలు.