బాలీవుడ్ సెలబ్రిటీల ఫేవరెట్ బ్రేక్‌ఫాస్ట్ ఏంటో తెలుసా? రైస్ కంజి గురించి ఈ విషయాలు తెలుసా

మన దేశంలో ఒక్కో ప్రాంతంలో ఒక్కో రకమైన అల్పాహారం ఫేమస్. ఉత్తరాదిన పరాటా, దక్షిణాదిన ఇడ్లీ-దోశలు రాజ్యమేలుతుంటే.. తూర్పు భారత దేశంలో ముఖ్యంగా ఒడిశాలో ‘రైస్ కంజి’ అమృతంలా భావిస్తారు. దీనినే అక్కడ ‘పఖాలా’ అని కూడా పిలుస్తారు. ప్రస్తుతం ఈ ప్రాచీన వంటకం బాలీవుడ్ స్టార్స్ అయిన ఆర్‌. మాధవన్, నీతూ కపూర్ వంటి వారికి ఫేవరెట్ బ్రేక్‌ఫాస్ట్‌గా మారిపోయింది. వేసవి తాపాన్ని తగ్గించడమే కాకుండా, పేగుల ఆరోగ్యానికి మేలు చేసే ఈ ‘ప్రోబయోటిక్’ వంటకం విశేషాలు చూద్దాం.

కావలసిన పదార్థాలు

• ఉడికించిన అన్నం (రాత్రి మిగిలిన అన్నం అయితే మరీ మంచిది)
• పెరుగు లేదా మజ్జిగ
• ఉల్లిపాయ ముక్కలు
• ఉప్పు
• పోపు కోసం : ఆవాలు, కరివేపాకు, కొద్దిగా నూనె

తయారీ విధానం

• రాత్రి ఉడికించిన అన్నంలో నీళ్లు పోసి, ఒక మట్టి పాత్రలో ఉంచి మూత పెట్టాలి. దీనిని 10 నుండి 12 గంటల పాటు అలాగే వదిలేయాలి.
• ఉదయాన్నే ఆ అన్నంలో సరిపడా పెరుగు, సన్నగా తరిగిన ఉల్లిపాయ ముక్కలు మరియు రుచికి తగినంత ఉప్పు వేసి బాగా కలపాలి.
• ఒక చిన్న పాన్‌లో ఆవాలు, కరివేపాకు వేసి తాలింపు పెట్టుకుని ఆ మిశ్రమంలో కలిపితే రుచికరమైన రైస్ కంజి సిద్ధం.

ఆరోగ్య ప్రయోజనాలు

• ఎండల వల్ల పెరిగే శరీర వేడిని తగ్గించడంలో ఈ కంజి అద్భుతంగా పనిచేస్తుంది.
• ఇది తేలికగా జీర్ణమవుతుంది. గ్యాస్, అసిడిటీ వంటి సమస్యలతో బాధపడేవారికి ఇది ఒక దివ్యౌషధం.
• ఇందులో కేలరీలు తక్కువగా ఉండి, కడుపు నిండుగా అనిపించేలా చేస్తుంది. ఇది బరువు తగ్గాలనుకునే వారికి మంచి ఎంపిక.
• పని ఒత్తిడిలో ఉండేవారికి మరియు బిజీగా ఉండే ఉద్యోగులకు ఇది అతి తక్కువ సమయంలో తయారయ్యే పోషక ఆహారం.

ఒకప్పుడు పల్లెటూరి వంటకంగా భావించిన రైస్ కంజి, నేడు తనలోని ఆరోగ్య రహస్యాలతో ప్రపంచవ్యాప్తంగా గుర్తింపు పొందుతోంది. ఈ వేసవిలో మీరు కూడా సెలబ్రిటీల బాటలో నడిచి, ఉదయాన్నే ఈ ఆరోగ్యకరమైన ఆహారాన్ని రుచి చూడండి. ఒక్కసారి దీనిని అలవాటు చేసుకుంటే, ఇక వదిలిపెట్టరు!