శీతాకాలం అసలైన శక్తిని పొందడం ఎలా? మీ ఆరోగ్యాన్ని కాపాడుకునే వినూత్న చిట్కాలు!

మనం ఎంతో ఇష్టంగా తినే పసుపు లేదా ఉసిరి కేవలం తీసుకోవడం వల్ల మాత్రమే ప్రయోజనం ఉండదు. ఆ ఆహారంలోని విటమిన్లు, యాంటీ ఆక్సిడెంట్లు మన రక్తంలో కలవాలంటే వాటిని కొన్ని ప్రత్యేకమైన పదార్థాలతో కలిపి తీసుకోవాలి. లేదంటే మనం తిన్న ఆహారం కేవలం రుచిని ఇచ్చి వెళ్ళిపోతుంది తప్ప, ఆరోగ్యాన్ని అందించదు. ఈ శీతాకాలపు సూపర్ ఫుడ్స్ నుండి గరిష్ట లాభాలను పొందేందుకు కొన్ని చిన్న చిన్న చిట్కాలు పాటించాలని నిపుణులు సూచిస్తున్నారు.

పసుపు – మిరియాల కలయిక..

మన పూర్వీకులు పసుపును ప్రతి వంటలో వాడేవారు. పసుపులో ‘కర్కుమిన్’ అనే అద్భుతమైన యాంటీ ఇన్‌ఫ్లమేటరీ పదార్థం ఉంటుంది. కానీ ఒక చేదు నిజం ఏమిటంటే.. కర్కుమిన్ మన శరీరంలో చాలా నెమ్మదిగా శోషించబడుతుంది. దీనిని వేగవంతం చేయడానికి పసుపుతో పాటు కొంచెం నల్ల మిరియాల పొడిని కలిపి తీసుకోవాలని నిపుణులు చెబుతున్నారు. మిరియాల్లో ఉండే ‘పైపెరిన్’ అనే పదార్థం, పసుపులోని కర్కుమిన్ గ్రహించే శక్తిని ఏకంగా రెండు వేల రెట్లు పెంచుతుంది. అందుకే పసుపు పాలు తాగేటప్పుడు చిటికెడు మిరియాల పొడి కలపడం మర్చిపోవద్దు.

ఉసిరి – ఐరన్..

శీతాకాలంలో లభించే అద్భుతమైన ఫలం ఉసిరి. ఇందులో విటమిన్ సి పుష్కలంగా ఉంటుంది. కేవలం రోగ నిరోధక శక్తికే కాకుండా, మనం తినే ఆహారంలోని ఐరన్ (ఇనుము) శరీరానికి అందేలా చేయడంలో ఉసిరి కీలక పాత్ర పోషిస్తుంది. మీరు తీసుకునే ఆకుకూరలు లేదా పప్పు దినుసులతో పాటు ఉసిరిని ఏదో ఒక రూపంలో తీసుకోవడం వల్ల, ఆ ఆహారంలోని ఐరన్ ను శరీరం సులభంగా గ్రహిస్తుంది. దీనివల్ల రక్తహీనత వంటి సమస్యలు దరిచేరవు.

కొవ్వు పదార్థాలు..

చాలామంది విటమిన్ ఏ, డి, ఈ, కే వంటి పోషకాలను సప్లిమెంట్ల రూపంలో తీసుకుంటారు. కానీ ఇవన్నీ ‘ఫ్యాట్ సొల్యూబుల్’ విటమిన్లు. అంటే ఇవి రక్తంలో కలవాలంటే కొంచెం కొవ్వు పదార్థం అవసరం. అందుకే శీతాకాలంలో క్యారెట్ హల్వా చేసేటప్పుడు నెయ్యి వాడటం లేదా కూరల్లో కొంచెం నూనె వాడటం వల్ల మనకు అవసరమైన విటమిన్లు శరీరానికి అందుతాయి. నెయ్యిని శత్రువులా చూడకుండా, మితంగా వాడటం వల్ల పోషకాల శోషణ మెరుగుపడుతుంది. ఎన్డీటీవీ కథనం ప్రకారం, ఆహారం వండే పద్ధతిలోనే మన ఆరోగ్యం దాగి ఉంది.

మన ఆరోగ్యానికి కావల్సిన నిధి మన వంటింట్లోనే ఉంది. కానీ దానిని ఎలా వాడాలో తెలుసుకోవడమే అసలైన నేర్పు. ఈ శీతాకాలంలో మీరు తీసుకునే పసుపు, ఉసిరి వంటి పదార్థాలను సరైన కాంబినేషన్లలో తీసుకుంటూ పూర్తి ఆరోగ్యాన్ని సొంతం చేసుకోండి. కేవలం తినడమే కాదు, అది ఒంటికి పట్టేలా చూసుకోవడం ముఖ్యం.