Rasam: అబ్బా.. ఇలా చేస్తే అన్నం పక్కన పెట్టి ఉత్త రసమే తాగేస్తారు..

ప్రతి రోజు ఇంట్లో సులభంగా తయారుచేసుకోగలిగే, ఎంతో రుచికరమైన రసం రెసిపీని తెలుసుకుందాం. ఈ రసం అన్నంలో పోసుకుని తింటుంటే, అన్నం కంటే రసాన్నే ఎక్కువగా ఇష్టపడతారు. ముఖ్యంగా నెల్లూరు ప్రాంతంలోని వారికి ఎన్ని వంటకాలు ఉన్నా, భోజనం చివరలో కొద్దిగా రసం లేనిదే ముద్ద దిగదు. ఈ రసాన్ని చాలా తక్కువ సమయంలో, సింపుల్‌గా ప్రిపేర్ చేసుకోవచ్చు.

తయారీ విధానం:

మొదటగా, నిమ్మకాయ సైజు అంత చింతపండును ఒక గిన్నెలో తీసుకుని, కొద్దిగా నీళ్లు పోసి శుభ్రంగా కడగాలి. శుభ్రం చేసుకున్న చింతపండులో ఒక గ్లాసు నీళ్లు పోసి, బాగా పండిన ఒక టమాటాను వేసి పది నిమిషాలు నానబెట్టాలి. చింతపండు బాగా నానుతుంది.

రసం పొడి తయారీ:

చింతపండు నానిన సమయంలో, రసం పొడిని సిద్ధం చేసుకోవాలి. ఒక మిక్సీ జార్ తీసుకుని, ఒక టీస్పూన్ మిరియాలు, ఒకటిన్నర టీస్పూన్ జీలకర్ర (ఇతర పదార్థాల కంటే జీలకర్ర కొద్దిగా ఎక్కువగా ఉండాలి, అప్పుడే రసం రుచిగా ఉంటుంది), ఒక టీస్పూన్ ధనియాలు, ఒక చిటికెడు మెంతులు, మూడు ఎండుమిరపకాయలు, పది వెల్లుల్లి రెమ్మలు వేసి మిక్సీలో పొడిగా చేసుకోవాలి. రోట్లో దంచుకుంటే రుచి ఇంకా మెరుగుపడుతుంది. ఈ పొడిని ఎక్కువ మొత్తంలో చేసుకుని సీసాలో నిల్వ ఉంచుకోవచ్చు. ప్రతిరోజు రసం పెట్టుకోవాలనుకున్నప్పుడు రెండు టేబుల్‌స్పూన్లు ఆయిల్‌లో వేయించి రసం సిద్ధం చేసుకోవచ్చు.

రసం తయారీ: ఇప్పుడు రసం పొడిని పక్కన పెట్టి, ముందుగా నానబెట్టుకున్న చింతపండు, టమాటా మిశ్రమాన్ని చేతితో మెత్తగా అయ్యేంతవరకు బాగా పిసికాలి. చింతపండు, టమాటా బాగా పిసికిన తర్వాత గుజ్జులా మారుతుంది. స్టవ్ పైన ఒక గిన్నె పెట్టి, రెండు టేబుల్‌స్పూన్ల నూనె వేసి వేడి చేయాలి. నూనె వేడెక్కిన తర్వాత, రెండు ఎండుమిరపకాయలను తుంచి వేసుకోవాలి. అలాగే ఒక రెమ్మ కరివేపాకు కూడా వేసి, ఆ తరువాత మనం ముందుగా మిక్సీకి వేసి పెట్టుకున్న రసం పొడి మొత్తాన్ని వేయాలి. మంటను సిమ్‌లో పెట్టి, రసం పొడిని ఒక నిమిషం పాటు వేయించుకోవాలి. ఈ పొడి తొందరగానే వేగుతుంది. వేయించుకునేటప్పుడే, అర టీస్పూన్ పసుపు కూడా వేసి వేయించుకోవాలి. అన్ని పదార్థాలను పచ్చివిగా వేసాం కాబట్టి నూనెలో కొద్దిగా వేగితేనే రుచి బాగుంటుంది. పొడి మాడిపోకుండా జాగ్రత్త పడాలి, లేదంటే రుచి మారిపోతుంది. పొడి ఆయిల్‌లో బాగా వేగిన తర్వాత, ముందుగా పిసికి పక్కన పెట్టుకున్న చింతపండు గుజ్జు మొత్తాన్ని వేసుకోవాలి. దీంట్లోనే రుచికి సరిపడా ఉప్పు వేసి, నీళ్లు కలుపుకోవాలి. నీళ్లు కలిపేటప్పుడు పులుపు సరిపోయిందా లేదా అని ఒకసారి రుచి చూసుకోవాలి. పులుపుకు తగ్గట్టుగా నీళ్లు కలుపుకోవాలి. పులుపు తక్కువైనా, ఎక్కువగా ఉన్నా రసం రుచిగా ఉండదు. ఇక్కడ సుమారు రెండున్నర గ్లాసుల నీళ్లు కలుపుతున్నారు. అన్ని కలిపిన తర్వాత, మంటను మీడియం ఫ్లేమ్‌లో పెట్టి రసాన్ని జస్ట్ ఒక పొంగు రానివ్వాలి. రసం ఎక్కువ మరగకూడదు. ఒక పొంగు వచ్చిన వెంటనే స్టవ్ ఆఫ్ చేయాలి. స్టవ్ ఆఫ్ చేసి, సన్నగా తరిగిన కొత్తిమీర చల్లుకుని బాగా కలిపేసుకోవాలి. వేడివేడి అన్నంలో ఈ రసం పోసుకుని తింటే ఎంతో రుచికరంగా ఉంటుంది. ఎన్ని కూరలు ఉన్నా ఈ రసం చాలామందికి అదనపు వంటకంలా ఉండాల్సిందే. ఈ రసాన్ని తప్పకుండా ప్రయత్నించండి.

Also Read: వేసవిలో ఉదయాన్నే ఒక కప్పు.. రోజంతా బాడీ కూల్.. కూల్..