10,000 అడుగుల మ్యాజిక్.. రోజూ నడిస్తే మీ శరీరంలో జరిగే అద్భుత మార్పులు ఇవే..

ఆరోగ్యం కోసం ఏదైనా చేయాలి అనుకుంటున్నారా..? కానీ సమయం లేదా? అయితే మీకోసం ఒక సింపుల్ సొల్యూషన్ ఉంది. అదే వాకింగ్. రోజుకు పది వేల అడుగులు వేయడం వల్ల మీ గుండె, మనస్సు, బరువులో వచ్చే అద్భుతమైన మార్పులు ఏంటో తెలిస్తే.. మీరు ఈరోజే షూస్ వేసుకుని బయలుదేరుతారు. ఆ విశేషాలేంటో ఈ స్టోరీలో తెలుసుకుందాం..

Benefits Of Walking 10000 Steps

Krishna S |
Updated on: Jan 14, 2026 | 1:51 PM

నేటి ఆధునిక జీవితంలో జిమ్‌కు వెళ్లి గంటల తరబడి వర్కౌట్లు చేసే సమయం అందరికీ ఉండకపోవచ్చు. కానీ ఆరోగ్యంగా ఉండటానికి ప్రకృతి మనకు ప్రసాదించిన అత్యంత సులభమైన, ఉచిత మార్గం నడక. ప్రస్తుతం ఫిట్‌నెస్ ప్రపంచంలో రోజుకు 10,000 అడుగులు అనేది ఒక మంత్రంలా మారిపోయింది. ఈ లక్ష్యాన్ని చేరుకోవడం వల్ల శరీరానికి కలిగే అద్భుత ప్రయోజనాల గురించి ఇప్పుడు తెలుసుకుందాం..

బరువు నియంత్రణలో నడక మ్యాజిక్

మీరు బరువు తగ్గాలని ప్రయత్నిస్తున్నారా? అయితే 10,000 అడుగుల లక్ష్యం మీకు అద్భుతంగా పని చేస్తుంది. మీ నడక వేగం, బరువును బట్టి రోజుకు సుమారు 300 నుండి 500 కేలరీలు ఖర్చవుతాయి. నిరంతర కదలిక వల్ల శరీర మెటబాలిజం పెరుగుతుంది. గంటల తరబడి కూర్చుని ఉండటం కంటే, అడుగులు వేయడం వల్ల శరీరంలోని మొండి కొవ్వు క్రమంగా కరుగుతుంది.

గుండెకు శ్రీరామరక్ష

గుండె జబ్బులు, స్ట్రోక్ వంటి ముప్పుల నుండి తప్పించుకోవడానికి నడక మించిన మందు లేదు. క్రమం తప్పకుండా నడవడం వల్ల రక్తపోటు, కొలెస్ట్రాల్ స్థాయిలు అదుపులో ఉంటాయి. రక్తంలో చక్కెర స్థాయిలను స్థిరంగా ఉంచడం ద్వారా టైప్-2 డయాబెటిస్ ప్రమాదాన్ని నడక తగ్గిస్తుంది. ఇది గుండె కండరాలను బలోపేతం చేసి, శరీరమంతటా ఆక్సిజన్ సరఫరాను మెరుగుపరుస్తుంది.

మనసుకు ప్రశాంతత.. మానసిక ఉల్లాసం

నడక కేవలం శరీరానికే కాదు, మనసుకు కూడా ఔషధంలా పనిచేస్తుంది. నడిచేటప్పుడు మెదడులో ఎండార్ఫిన్లు విడుదలవుతాయి. ఇవి ఒత్తిడి, ఆందోళన, నిరాశను తగ్గిస్తాయి. ప్రతిరోజూ నడిచే వారిలో నిద్రలేమి సమస్య తగ్గుతుంది. ముఖ్యంగా పార్కులు వంటి పచ్చని ప్రదేశాలలో నడవడం వల్ల ఏకాగ్రత పెరుగుతుంది.