Life Lesson: సమస్యను మరో కోణంలో చూస్తే పరిష్కారం దొరుకుతుంది.. ఈ కథ మీకు కొత్త పాఠం నేర్పుతుంది!

చాలా కాలం క్రితం ఒక ప్రశాంతమైన రాజ్యంలో ఈథన్ అనే 25 ఏళ్ల యువకుడు నివసించేవాడు. అతను గ్రామాల మధ్య వస్తువులను రవాణా చేస్తూ, వాటిని పట్టణ మార్కెట్‌లో విక్రయించి జీవనం సాగించేవాడు. అతని వ్యాపారానికి ఒక బలమైన గోధుమ రంగు గుర్రం ఎంతో కీలకం. అదే అతని వస్తువులను మోసేది, బండిని లాగేది. ఒకరోజు ఉదయం ఈథన్ తన గుర్రాన్ని సిద్ధం చేయడానికి అశ్వశాలకు వెళ్లాడు. కానీ అక్కడ గుర్రం కనిపించలేదు. గేటు తెరిచి ఉండటంతో అది ఎక్కడికైనా వెళ్లిపోయిందని భావించాడు. ఇంటి వెనుక, గ్రామ వీధుల్లో, నది దగ్గర, పొలాల వద్ద వెతికాడు. ప్రయాణికులను, రైతులను కూడా అడిగాడు. అయినా గుర్రం ఆచూకీ తెలియలేదు. రోజులు గడుస్తున్నా గుర్రం తిరిగి రాకపోవడంతో ఈథన్ తీవ్రంగా ఆందోళన చెందాడు. గుర్రం లేకపోతే తన వ్యాపారం దాదాపు ఆగిపోతుంది. మరో గుర్రాన్ని కొనడానికి అతని దగ్గర తగినంత డబ్బు కూడా లేదు.

ఒక సాయంత్రం మరోసారి విఫలమైన వెతుకులాట తర్వాత ఈథన్ తన ఇంటి బయట కూర్చుని బాధపడ్డాడు. చివరకు అతని గుర్రం తిరిగి వస్తే దాన్ని మార్కెట్‌లో కేవలం ఒక వెండి నాణేనికి అమ్ముతానని వాగ్దానం చేశాడు. ఆ సమయంలో గుర్రం తిరిగి వస్తుందనే ఆశ కూడా అతనికి పెద్దగా లేదు. అయితే మూడు రోజుల తర్వాత అనూహ్యమైన సంఘటన జరిగింది. ఉదయాన్నే తన ఇంటి తలుపు తెరిచి చూసిన ఈథన్‌కు, గేటు దగ్గర తన గుర్రం కనిపించింది. అది అలసిపోయి ఉన్నప్పటికీ సురక్షితంగా తిరిగి వచ్చింది. ఈథన్ ఎంతో సంతోషించి గుర్రానికి నీళ్లు, ఆహారం అందించాడు. కానీ కొద్దిసేపటికే అతనికి తాను చేసిన వాగ్దానం గుర్తొచ్చింది. కనీసం 100 వెండి నాణేల విలువ చేసే గుర్రాన్ని ఒక్క నాణేనికి అమ్మితే తనకు భారీ నష్టం వస్తుంది. మాట తప్పకూడదు.. కానీ నష్టాన్ని కూడా భరించలేడు. ఈ పరిస్థితి నుంచి బయటపడేందుకు ఈథన్ కొత్త మార్గం కోసం ఆలోచించడం ప్రారంభించాడు.

ఈథన్ తన వాగ్దానాన్ని మరోసారి గుర్తు చేసుకున్నాడు. తాను గుర్రాన్ని ఒక వెండి నాణేనికి అమ్ముతానని చెప్పాడు. కానీ గుర్రంతో పాటు మరే ఇతర వస్తువును అమ్మకూడదని ఎక్కడా చెప్పలేదు కదా! అప్పుడే అతనికి తన ఇంటి ప్రాంగణంలో తిరుగుతున్న పిల్లి కనిపించింది. వెంటనే ఒక ఆలోచన వచ్చింది. గుర్రాన్ని ఒక వెండి నాణేనికి, పిల్లిని 99 వెండి నాణేలకు విక్రయించాలని నిర్ణయించుకున్నాడు. అయితే రెండింటినీ కలిపే అమ్మాలని షరతు పెట్టాడు. మరుసటి రోజు గుర్రం, పిల్లితో కలిసి ఈథన్ రాజ్యంలోని రద్దీగా ఉండే మార్కెట్‌కు వెళ్లాడు. అక్కడ గుర్రాన్ని చూపిస్తూ ‘మంచి ఆరోగ్యకరమైన గుర్రం అమ్మకానికి ఉంది. ధర కేవలం ఒక వెండి నాణెం మాత్రమే!’ అని ప్రకటించాడు. ఆ ధర విన్న వ్యాపారులు ఆశ్చర్యపోయారు. గుర్రం విలువ అడిగిన ధర కంటే చాలా ఎక్కువగా ఉండటంతో చాలామంది దాన్ని కొనడానికి ముందుకొచ్చారు.

ఇవి కూడా చదవండి

'ఇది కూడా గడిచిపోతుంది..' ఎలాంటి కష్టాన్నైనా ఎదుర్కొనే మంత్రం ఇదీ

పుల్లపుల్లగా, కారం కారంగా టమాటో పచ్చడి.. వేడి అన్నంలో తింటే..

పైకి కనిపించేదంతా నిజం కాదు.. పిచ్చుక గూటిలో వింత గుడ్డు కథ!

పులి.. మేక.. గడ్డి.. రైతు నది ఎలా దాటాలి? మీ తెలివికి అగ్నిపరీక్ష

ఒక వ్యాపారి గుర్రాన్ని కొనడానికి ముందుకొచ్చి ఒక వెండి నాణెం ఇవ్వబోతుండగా ఈథన్ ఒక షరతు పెట్టాడు. గుర్రం ధర ఒక వెండి నాణెం మాత్రమేనని, అయితే దాని పక్కన ఉన్న పిల్లి ధర 99 వెండి నాణేలని చెప్పాడు. అంతేకాదు, గుర్రం, పిల్లి రెండింటినీ కలిపే విక్రయిస్తానని స్పష్టం చేశాడు. ‘నాకు గుర్రం మాత్రమే కావాలి. పిల్లి ఎందుకు?’ అని ఆ వ్యాపారి ప్రశ్నించాడు. అందుకు ఈథన్ ‘గుర్రం, పిల్లి రెండింటినీ విడివిడిగా అమ్మలేను. రెండూ కలిపి 100 వెండి నాణేలు చెల్లించాలి’ అని సమాధానమిచ్చాడు. ఈ విచిత్రమైన బేరాన్ని చూసి అక్కడున్నవారు నవ్వుకున్నారు. పిల్లికి 99 వెండి నాణేల ధర పెట్టడం అందరికీ ఆశ్చర్యంగా అనిపించింది. అయినప్పటికీ, ఈథన్ తన నిర్ణయాన్ని మార్చుకోలేదు. చివరకు మరో ప్రయాణ వ్యాపారి ముందుకొచ్చాడు. గుర్రాన్ని పరిశీలించిన అతనికి 100 వెండి నాణేలకు అది కొనడం సమంజసంగానే అనిపించింది. పిల్లి అదనంగా వస్తున్నప్పటికీ, గుర్రం తనకు అవసరం కావడంతో ఆ మొత్తాన్ని చెల్లించడానికి అంగీకరించాడు.

అలా ఈథన్ తన గుర్రాన్ని ఒక వెండి నాణేనికి, పిల్లిని 99 వెండి నాణేలకు విక్రయించాడు. మొత్తం 100 వెండి నాణేలు సంపాదించాడు. అంతేకాదు, గుర్రాన్ని ఒక వెండి నాణేనికి అమ్ముతానని ఇచ్చిన మాటను కూడా నిలబెట్టుకున్నాడు.

ఈ కథ మనకు నేర్పే పాఠం ఏమిటి?

ఈథన్ కథలోని ముఖ్యమైన విషయం సమస్య వచ్చినప్పుడు ఆందోళన చెందడం కాకుండా, దాన్ని మరో కోణంలో చూడటానికి ప్రయత్నించడం. కొన్నిసార్లు మనం ఒకే పరిష్కారంపై దృష్టి పెట్టి, ఇతర అవకాశాలను గుర్తించలేకపోతాం. అలాంటి సమయంలో ప్రశాంతంగా ఆలోచించడం, సృజనాత్మకంగా వ్యవహరించడం ఎంతో ఉపయోగపడతాయి. క్లిష్టమైన పరిస్థితుల్లో తొందరపడి నిర్ణయాలు తీసుకోకండి. సమస్యను విభిన్న కోణాల్లో పరిశీలించండి. తెలివి, ఓర్పు, సృజనాత్మక ఆలోచనతో నష్టాన్ని తగ్గించుకునే మార్గాన్ని కనుగొనవచ్చు.