తెరుచుకున్న ప్రేమసౌధం.. ‘తాజ్‌మహల్’

దేశ, విదేశీ పర్యాటకులు, ప్రేమ జంటలకు ఓ శుభవార్త. ప్రేమకు ప్రతిరూపంగా భావించే తాజ్‌మహల్ దర్శనానికి అనుమతినిచ్చింది ప్రభుత్వం. ఆగ్రాలోని అంతర్జాతీయ ప్రసిద్ధ పర్యాటక కేంద్రం తాజ్‌మహల్ ఆరు నెలల తర్వాత ఇవాళ తెరుచుకుంది. సోమవారం నుంచి తాజ్ మహల్ సందర్శనకు పర్యాటకులను అనుమతించినట్లు ఏఎస్ఐ అధికారులు తెలిపారు. దేశంలో కరోనా విజృంభణ కారణంగా లాక్‌డౌన్‌కు ముందే మార్చి 17న తాజ్‌మహల్ సందర్శకులను నిలిపివేశారు. తాజ్‌మహల్ చరిత్రలో ఇన్ని రోజులు మూసివేయడం ఇదే తొలిసారి. ఇక, అన్ లాక్ ప్రక్రియలో భాగంగా తాజ్‌మహల్ ను తిరిగి తెరిచేందుకు అనమతినిచ్చారు. పక్కాగా, కొవిడ్ నిబంధనలు పాటించాలని సూచించారు. తాజ్‌మహల్ సందర్శనకు వచ్చే పర్యాటకుల కోసం శానిటైజేషన్, థర్మల్ స్క్రీనింగ్ వంటి ఏర్పాట్లు చేశారు. ఒక రోజులో గరిష్ఠంగా 5,000 మంది పర్యాటకులను మాత్రమే తాజ్ సందర్శనకు అనుమతిస్తున్నట్లు అధికారులు తెలిపారు.

కాగా, తాజ్‌మహల్ సందర్శనకు పర్యాటకులను అనుమతిస్తున్నప్పటికీ… గ్రూప్ ఫోటోలు తీసుకునేందుకు మాత్రం అనుమతించడంలేదు. సందర్శకులు ఆరు అడుగుల భౌతిక దూరం పాటించాల్సి ఉంటుంది. లైసెన్స్ పొందిన టూర్ గైడ్స్ ని మాత్రమే లోనికి అనుమతించనున్నట్లు అధికారులు పేర్కొన్నారు. అయితే, తాజ్‌మహల్ సందర్శనకు వచ్చే పర్యాటకులు ముందుగానే ఆన్‌లైన్‌లో నమోదు చేసుకోవాల్సి ఉంటుంది. స్వదేశీ పర్యాటకులు రూ.50 ఎంట్రీ ఫీజును చెల్లించాల్సి ఉండగా… విదేశీ పర్యాటకుల టికెట్ ధరను రూ.1100గా నిర్ణయించారు. కొవిడ్ నిబంధనలు పాటించనివారికి జరిమానాలు కూడా ఉంటాయని అధికారులు తెలిపారు.