హీరో నుంచి విలన్‌గా మారాడు.. ఆయన నటుడు మాత్రమే కాదు అద్భుతమైన వ్యక్తి కూడా
తెలుగులో ఎంతో మంది అద్భుతమైన నటులు ఉన్నారు . వందల సినిమాలు చేసిన నటులు చాలా మంది ఉన్నారు. వారిలో ఈ నటుడు ఒకరు. హీరోగానే కాదు విలన్ గానూ నటించి మెప్పించారు ఆయన. ఇంతకూ ఆయన ఎవరో తెలుసా .?
Updated on: Nov 05, 2026 | 6:10 AM
ప్రముఖ నటుడు ఎర్ర శశిగిరిరావు, గిరిబాబుగా సుపరిచితుడు. ఆయన గురించి దర్శకుడు శివనాగేశ్వరరావు పంచుకున్న వ్యక్తిగత జ్ఞాపకాలు, అనుభవాలు గిరిబాబు వ్యక్తిత్వాన్ని, నటనా ప్రస్థానాన్ని మరింత లోతుగా ఆవిష్కరిస్తాయి. తన సినిమా వాళ్ళకి “మనం” సినిమా లాంటిది, ఇది మూడు తరాల యెర్రా వారి మనం అని శివనాగేశ్వరరావు అన్నారు. మెడ్రాస్ వెళ్లి వేషాల కోసం ప్రయత్నిస్తున్న యువకుడు శశిగిరిరావు, ఆ తర్వాత జగమేమాయ చిత్రంతో గిరిబాబుగా పరిచయమయ్యారు. దర్శకుడిగా శివనాగేశ్వరరావు గారు మెడ్రాస్‌కి వెళ్ళే నాటికి గిరిబాబు హీరోగా, ఆ తర్వాత పూర్తిస్థాయి విలన్‌గా స్థిరపడిపోయారు. శివనాగేశ్వరరావు దర్శకత్వంలో దాదాపు ఏడెనిమిది సినిమాల్లో ఆయన విలన్‌గా నటించారు. విజయనిర్మల దర్శకత్వంలో వచ్చిన భోగిమంటలు, ఇంటికో రుద్రమ్మ, అంతం కాదారంభం వంటి చిత్రాలలో కూడా గిరిబాబు నటించారు. గిరిబాబు తన వృత్తి పట్ల అంకితభావం అపారం. శిశింద్రీ క్లైమాక్స్ చిత్రీకరణ సమయంలో, గిరిబాబు నోటితో ఒక హుక్‌ను పట్టుకునే ఫీట్ చేయాల్సి వచ్చింది. డూప్‌తో చేయించిన తర్వాత క్లోజ్ షాట్ల కోసం ఈయన చేయిస్తుండగా, దాదాపు మూడు అడుగుల ఎత్తు నుంచి కింద పడిపోయారు. హిప్ పట్టేసినా, పెయిన్ కిల్లర్ మందులు వేసుకుని మరుసటి రోజు చిత్రీకరణకు హాజరయ్యారు. “రాకపోతే ఎలాగయ్యా? అంత సెటప్ పెట్టుకొని” అంటూ డెడికేషన్ చూపించారు. హ్యాండ్స్ అప్ సినిమా షూటింగ్ సమయంలో, చంద్రమోహన్‌ను “ఏ పేపర్?” అని అడిగినప్పుడు, చంద్రమోహన్ “ఈనాడు” అనగానే గిరిబాబు “ఏనాడు చూడలేదే” అని స్క్రిప్ట్‌లో లేని డైలాగ్స్ పలికి, తన హాస్య చతురతను నిరూపించుకున్నారట.
గిరిబాబు వ్యక్తిత్వంలో కుటుంబం, స్వగ్రామం పట్ల ప్రేమ స్పష్టంగా కనిపిస్తుంది. ఆయనకు విమానం అంటే భయం (ఫ్లైట్ ఫోబియా) ఉంది, అందుకే మద్రాస్ నుంచి హైదరాబాద్‌కు రైలులో లేదా రోడ్డు మార్గంలో ప్రయాణించడానికి ఇష్టపడతారు. విదేశీ ప్రయాణాలకు కూడా ఆయన దూరంగా ఉంటారు. ఒకసారి శైలజా కృష్ణమూర్తి సినిమా షూటింగ్ కోసం విశాఖపట్నం వెళ్ళినప్పుడు, శివనాగేశ్వరరావు గారితో కలిసి రైలులో ప్రయాణించారట. ఆ సమయంలో గిరిబాబు తన ఇంటి నుంచి తెచ్చిన భోజనాన్ని, కొన్ని డ్రింక్స్‌ను శివనాగేశ్వరరావు గారితో పంచుకున్నారట. గిరిబాబు భార్య వంటల గురించి ఆయన ప్రశంసించడం, ఆవిడ సిగ్గుపడటం లాంటి సన్నివేశాలు వారి మధ్యనున్న వ్యక్తిగత అనుబంధానికి నిదర్శనం అన్నారు. గిరిబాబు కుమారులు రఘుబాబు, బోసుబాబు. రఘుబాబు మొదట గిరిబాబుకు పీఏగా పనిచేసి, అతని డేట్స్‌ను చూసుకునేవారు. తర్వాత రఘుబాబు బిజీ ఆర్టిస్ట్‌గా మారగా, బోసుబాబు సాధారణ ఆర్టిస్ట్‌గా కొనసాగారు. భూ కైలాస్ సినిమాలో గిరిబాబు, రఘుబాబులతో పాటు రఘుబాబు తాతగారు ఎర్ర నాగయ్య (గిరిబాబు తండ్రి) కూడా నటించారు. అప్పటికి 90 ఏళ్లు దాటిన నాగయ్య గారు, తన అమాయకత్వం, రాధశ్యంతో దర్శకుడిని ఆకట్టుకున్నారు. ఇలా మూడు తరాలు ఒకే సినిమాలో నటించడం “ఎర్ర శశిగిరిరావు గారి ఫ్యామిలీ ప్యాక్”గా గిరిబాబు సగర్వంగా చెప్పుకుంటారు.
రావి నూతల గ్రామం గిరిబాబుకు చాలా ఇష్టం. షూటింగ్ లేకపోతే మూడు రోజులు కూడా అక్కడకు వెళ్ళిపోతారు. గ్రామంలోని మర్రిచెట్టు కింద కూర్చుని గ్రామ రాజకీయాలు, మంచి చెడు విషయాలను చర్చించుకుంటారు. సంక్రాంతి పండగకు భోగి, సంక్రాంతి, కనుమ మూడు రోజులు తనకిష్టమైన తనికెళ్ళ భరణి, బ్రహ్మానందం వంటి నలుగురైదుగురిని హైదరాబాద్ నుంచి రావినూతలకు తీసుకెళ్ళి అద్భుతమైన ఆతిథ్యం ఇస్తారు. గిరిబాబు కేవలం నటుడిగానే కాకుండా దర్శకుడిగా, కథా రచయితగా కూడా తన ప్రతిభను చాటుకున్నారు. పాత సినిమాల గురించి అడిగితే, వాటి నటీనటులు, కథలతో సహా అన్ని వివరాలను చెప్పగల అద్భుతమైన జ్ఞాపకశక్తి ఆయన సొంతం. మనుషులను ప్రేమించే తత్వం, హాస్యం, అంకితభావం కలగలిపిన వ్యక్తిత్వం గిరిబాబు సొంతం అని అన్నారు.
మరిన్ని సినిమా వార్తల కోసం ఇక్కడ క్లిక్ చేయండి
