బాలీవుడ్‌లో విషాదం.. యంగ్ కాస్టింగ్ డైరెక్టర్ మృతి

బాలీవుడ్ సినీ ఇండస్ట్రీలో వరుస విషాదాలు చోటు చేసుకుంటున్నాయి. బుధవారం పాటల రచయిత అన్వర్ సాగర్ మరణించిన విషయం తెలిసిందే. తాజాగా ఇప్పుడు బాలీవుడ్ యంగ్ కాస్టింగ్ డైరెక్టర్ క్రిష్ కపూర్(28) మృతి చెందారు. మెదడులో రక్తస్రావం జరిగి మే 31న ముంబైలో తుదిశ్వాస విడిచినట్లు అతని కుటుంబ సభ్యులు ధృవీకరించారు. కాగా క్రిష్ రోడ్డు ప్రమాదంలో మరణించాడని వార్తలు రాగా.. అతని మామయ్య సునీల్ భళ్లా ఖండించారు. సబర్బన్ మీరా రోడ్డులో ఉన్న తన ఇంట్లో క్రిష్ ఒక్కసారిగా కుప్పకూలిపోయాడు. వెంటనే ఆస్పత్రికి తరలించగా మెదడులో రక్తస్రావం ఏర్పడి మరణించాడని సునీల్ వెల్లడించారు. అయితే ఈ వార్త ఆలస్యంగా వెలుగు చూసింది. అతి చిన్న వయసులో క్రిష్ కపూర్ మృతి చెందడం బాలీవుడ్‌లో తీవ్ర విషాదాన్ని నింపింది. క్రిష్ కపూర్‌కి భార్య, ఏడేళ్ల పాప ఉన్నారు. క్రిష్ కపూర్ ‘జలేబీ’, ‘వీరే కి వెడ్డింగ్’ వంటి సినిమాలకు కాస్టింగ్ డైరెక్టర్‌గా పని చేశారు.

Read More: బాలీవుడ్‌ మరో విషాదం.. ఆయన ఇక లేరు