వీళ్లు మాములు దొంగలు కాదు..పోలీస్ స్టేషన్‌లోనే లూఠీ చేశారు..

ఇప్పుడు మీకు గజదొంగలు కాదు వాళ్ల బాబులను పరిచయం చేయబోతున్నాం. ఎవడైనా దొంగతనం చేస్తే, పోలీస్ స్టేషన్‌లో పెడతారు. ఇక అదే పోలీస్ స్టేషన్‌లో దొంగతనం చేస్తే..వారిని ఎక్కడ పెట్టాలి. మహారాష్ట్రలో కొల్హాపూర్‌ జిల్లాలోని ఓ పోలీస్‌స్టేషన్‌లో ఇటువంటి విచిత్ర ఘటనే చోటు చేసుకుంది. ఖాకీలను ఈ ఘటన నిద్రలో కూడా వెంటాడుతోంది. ఎందుకంటే దొంగలు చిన్న, చిన్న సామాన్లు చోరీ చెయ్యలేదు. స్టోర్ రూమ్ నుంచి ఏకంగా 180 సెల్‌ఫోన్లను కొట్టేశారు. కొల్హాపూర్ దగ్గర్లోని జైసింగ్‌పూర్‌ పీఎస్‌లో ఈ దొంగతనం జరిగింది. రకరకాల కేసుల్లో స్వాధీనం చేసుకున్న ఫోన్లను స్టోర్ రూమ్‌లో ఉంచారు పోలీసులు. పోయిన గురువారం రాత్రి పక్కా స్కెచ్ వేసుకున్న దుండగులు, ఆ గదిలోకి ప్రవేశించి ఉన్నదంతా ఊడ్చుకెళ్లారు. చేసేదేం లేక కేసు నమోదు చేసి విచారణ చేస్తున్నారు అదే స్టేషన్ పోలీసులు.