Hardik Pandya: వన్డే టీమ్ నుంచి హార్ధిక్ పాండ్యా ఔట్! కారణం ఏంటంటే..?

భారత క్రికెట్ జట్టుకు మరో ఎదురుదెబ్బ తగిలింది. స్టార్ ఆల్‌రౌండర్ హార్దిక్ పాండ్యా గాయం కారణంగా ఆఫ్ఘనిస్తాన్‌తో జరగనున్న మూడు మ్యాచ్‌ల వన్డే సిరీస్‌కు దూరమైనట్లు విశ్వసనీయ సమాచారం. జూన్ 13 నుంచి ప్రారంభమయ్యే ఈ సిరీస్‌లో భారత్ ధర్మశాల, లక్నో, చెన్నై వేదికలుగా ఆఫ్ఘనిస్తాన్‌తో తలపడనుంది. సమాచారం ప్రకారం.. హార్దిక్ పాండ్యా ఇటీవల బీసీసీఐ సెంటర్ ఆఫ్ ఎక్సలెన్స్ (సీఓఈ) నుంచి ఫిట్‌నెస్ క్లియరెన్స్ పొందాడు. అంతేకాకుండా సిరీస్‌కు బయలుదేరే రెండు రోజుల ముందు తన ఫిట్‌నెస్ నివేదికను కూడా బీసీసీఐకి సమర్పించాడు. అయితే సీఓఈలో చివరి శిక్షణ సెషన్ అనంతరం అతని ఫిట్‌నెస్‌కు సంబంధించి కొన్ని సమస్యలు తలెత్తినట్లు తెలుస్తోంది.

ఇదే సమయంలో సీనియర్ ఆటగాడు రోహిత్ శర్మ కూడా ఐపీఎల్ 2026 సందర్భంగా ఎదురైన హామ్‌స్ట్రింగ్ సమస్య నుంచి పూర్తిగా కోలుకునే ప్రయత్నాల్లో ఉన్నాడు. ముంబై ఇండియన్స్ తరఫున ఆడుతున్న సమయంలోనే రోహిత్, హార్దిక్ ఇద్దరూ గాయాల బారిన పడిన విషయం తెలిసిందే. మరోవైపు భారత స్టార్ బ్యాటర్ విరాట్ కోహ్లీ కూడా ఈ సిరీస్‌కు దూరమయ్యాడు. రాయల్ ఛాలెంజర్స్ బెంగళూరు టైటిల్‌ను నిలబెట్టుకున్న ఐపీఎల్ 2026 ఫైనల్ సందర్భంగా కోహ్లీ కండరాల గాయానికి గురయ్యాడు. అతని గాయం తీవ్రతపై ఇంకా స్పష్టత రాలేదని బీసీసీఐ ప్రధాన సెలెక్టర్ అజిత్ అగార్కర్ వెల్లడించారు.

కోహ్లీ ఇంగ్లాండ్‌తో జరగనున్న వన్డే సిరీస్ నాటికి కోలుకునే అవకాశాలు ఉన్నప్పటికీ, ప్రస్తుతం కచ్చితమైన కాలపరిమితిని చెప్పలేమని ఆయన పేర్కొన్నారు. కోహ్లీ స్థానంలో యువ ఓపెనర్ యశస్వి జైస్వాల్‌ను భారత వన్డే జట్టులోకి ఎంపిక చేశారు. కీలక ఆటగాళ్లు గాయాలతో దూరమవుతున్న నేపథ్యంలో ఆఫ్ఘనిస్తాన్ సిరీస్‌లో యువ ఆటగాళ్లపై అదనపు బాధ్యతలు పడనున్నాయి. భారత జట్టు ప్రదర్శనపై అభిమానుల్లో ఆసక్తి నెలకొంది.

మరిన్ని క్రికెట్ వార్తల కోసం ఇక్కడ క్లిక్ చేయండి