పక్కా పల్లెటూరి స్టైల్‌లో నోరూరించే కమ్మనైన గోంగూర పచ్చడి.. చివరకు అదే హైలెట్..

ఆంధ్రుల ఆహార సంస్కృతిలో గోంగూర పచ్చడికి ప్రత్యేకమైన స్థానం ఉంది.. అందుకే.. దీన్ని ఆంధ్రమాత, పుంటికూర అంటూ ఇష్టంగా పిలుచుకుంటారు.. గోంగూరలో విటమిన్-సి, మెగ్నీషియం, యాంటీ ఆక్సిడెంట్లు, ముఖ్యమైన పోషకాలు సమృద్ధిగా ఉంటాయి. వేడి వేడి అన్నంలో ఈ గోంగూర పచ్చడి వేసుకుని తింటే.. రుచి అద్భుతంగా ఉంటుంది. ఫ్రిడ్జ్‌లో నిల్వ చేసుకుంటే 10 రోజులకు పైగా తాజాగా ఉండే ఈ పల్లెటూరి స్టైల్ గోంగూర పచ్చడి తయారీ విధానాన్ని ఈ కథనంలో తెలుసుకోండి..

గోంగూర పచ్చడి కోసం కావలసిన పదార్థాలు:

• గోంగూర: 2 నుండి 4 కట్టలు (శుభ్రం చేసి కడిగినది)
• టమాటాలు: 2 (మీడియం సైజ్)
• పచ్చిమిరపకాయలు: 10 నుండి 15 (గోంగూర పులుపుకు తగినట్లు)
• వేరుశనగ గుళ్లు (పల్లిలు): 2 టేబుల్ స్పూన్లు
• ఉల్లిపాయ: 1 (పెద్ద ముక్కలుగా తరిగినది)
• వెల్లుల్లి రెబ్బలు: 8 నుండి 10
• ఉప్పు: రుచికి సరిపడా
• తాలింపు పదార్థాలు: ఆవాలు, జీలకర్ర, మినప్పప్పు, శనగపప్పు (మొత్తం కలిపి 1 టేబుల్ స్పూన్)
• ఎండుమిరపకాయలు: 4 నుండి 6
• కరివేపాకు: 2 రెమ్మలు
• ఇంగువ: చిటికెడు
• నూనె: తగినంత

తయారీ విధానం:

పల్లీలు వేయించడం: మొదట బాణలిలో (పాన్) వేరుశనగ గుళ్లను చిన్న మంటపై దోరగా వేయించి, మిక్సీ జార్‌లోకి తీసుకుని చల్లారనివ్వాలి.

గోంగూర, టమాటా మగ్గించడం: అదే కడాయిలో ఒక టేబుల్ స్పూన్ నూనె వేసి టమాటా ముక్కలు, పచ్చిమిరపకాయలు, గోంగూర వేయాలి. మూత పెట్టి చిన్న మంటపై గోంగూరలోని తేమ (చెమ్మ) పూర్తిగా ఆరిపోకుండా సాఫ్ట్‌గా మగ్గించి చల్లారనివ్వాలి.

పచ్చడి గ్రైండింగ్: మొదట మిక్సీ జార్‌లోని పల్లీలను మెత్తగా పొడి చేయాలి. ఆ తర్వాత మగ్గించిన గోంగూర-టమాటా మిశ్రమం, పొట్టు తీసిన వెల్లుల్లి రెబ్బలు, రుచికి సరిపడా ఉప్పు వేసి రోట్లో దంచినట్లుగా (కచ్చాపచ్చాగా) కోర్స్‌గా గ్రైండ్ చేసుకోవాలి.

ఉల్లిపాయలు కలపడం: గ్రైండ్ చేసిన పచ్చడిని ఒక బౌల్‌లోకి తీసుకుని, అదే మిక్సీ జార్‌లో ఉల్లిపాయ ముక్కలు వేసి పల్స్ మోడ్‌లో ఒక్కసారి కచ్చాపచ్చాగా తిప్పి పచ్చడిలో బాగా కలపాలి.

చివరకు అసలైన ఫినిషింగ్ టచ్ కమ్మని తాలింపు:

బాణలిలో 3 నుండి 4 టేబుల్ స్పూన్ల నూనె వేసి వేడిచేయాలి. అందులో తాలింపు గింజలు, దంచిన వెల్లుల్లి, ఎండుమిరపకాయలు, కరివేపాకు, ఇంగువ వేసి దోరగా వేయించాలి.

చివరగా తాలింపులో తయారుచేసి పెట్టుకున్న గోంగూర పచ్చడి వేసి చిన్న మంటపై 5 నిమిషాల పాటు నూనెలో మగ్గనిచ్చి స్టవ్ ఆపేయాలి. అనంతరం అన్నంలో సర్వ్ చేసుకోవచ్చు.. కొంచెం నెయ్యి వేసుకుని తింటే దీని రుచి అద్భుతంగా మారిపోతుంది.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..