సిరియాలో యుధ్ధ మేఘాలు.. ట్రంప్ మండిపాటు

టర్కీ-సిరియా మధ్య మెల్లగా యుధ్ద మేఘాలు కమ్ముకుంటున్నాయి. సిరియాలో క్రమేపీ టర్కీ సైనిక దళాలు ప్రవేశిస్తున్నాయి. ఎనిమిదేళ్లుగా ఈ రెండు దేశాల మధ్య జరుగుతున్న అంతర్యుధ్ధం ముదిరి పాకాన పడేట్టు కనిపిస్తోంది. తమ దేశ(సిరియా) సరిహద్దుల్లోని దాదాపు 36 లక్షల మంది శరణార్థులను తిప్పి పంపివేయడానికి సిరియా చేస్తున్న యత్నాలను టర్కీ ఖండిస్తోంది. సరిహద్దుల్లో ఓ సేఫ్ జోన్ ఏర్పాటు చేయాలన్న తమ ప్రతిపాదనకు సిరియా అడ్డుకుంటోందని టర్కీ అధ్యక్షుడు రిసెప్ తయ్యప్ ఎర్డోగాన్ ఆరోపిస్తున్నారు. ఈ బోర్డర్లో కొన్ని వారాలుగా సాగుతున్న తమ దేశ సైనిక కార్యకలాపాలకు గ్రీన్ సిగ్నల్ ఇచ్చిన ఆయన.. ఎలాంటి ముందస్తు హెచ్చరికా లేకుండా తమ భద్రతా దళాలు సిరియాలో ప్రవేశిస్తాయని పేర్కొన్నారు. ‘ ఆక్రమణ ఏ సమయంలోనైనా జరగొచ్చు ‘ అని వార్నింగ్ ఇచ్చారు. ఇక మన ‘ పెద్దన్న ‘ అమెరికా అధ్యక్షుడు ట్రంప్ రంగంలోకి దిగారు. సిరియాపై మీరు మరీ దూకుడుగా వ్యవహరిస్తున్నారని టర్కీని దుమ్మెత్తిపోశారు. టర్కీ సైనికులకు, కుర్దుల ఆధ్వర్యంలోని సిరియన్ డెమొక్రటిక్ దళాలకు మధ్య ‘ బఫర్ ‘ (వారధి) గా వ్యవహరిస్తున్న సుమారు రెండు డజన్ల సైనిక దళాలను పెంటగాన్ (అమెరికా రక్షణ వ్యవస్థ) ఉపసంహరించుకోవడంతో టర్కిష్ దళాలు ముందుకు చొచ్ఛుకువచ్ఛే ప్రయత్నం చేస్తున్నాయి. తమ దేశ సైనికులు ఇక అక్కడ ఉండబోరని ట్రంప్ తాజాగా ఆశ్చర్యకరమైన ప్రకటన చేశారు. టర్కీ-సిరియా దేశాల మధ్య రగులుతున్న ఉద్రిక్తతపట్ల ట్రంప్ ప్రభుత్వం అనుసరిస్తున్న వైఖరిపై ఇటు రిపబ్లికన్లు, అటు డెమొక్రాట్లు విమర్శల వర్షం కురిపిస్తుండడంతో ఈయన వెనక్కి తగ్గక తప్పని పరిస్థితి ఏర్పడింది. టర్కీ ఒకవేళ హద్దు మీరి వ్యవహరిస్తే ఆ దేశ ఆర్ధిక పరిస్థితిని సమూలంగా తుడిచిపెట్టేస్తామని ట్రంప్ తీవ్రంగా హెచ్ఛరించారు. ఏమైనా ‘ ఒక ముగింపు అంటూ లేని ‘, ‘ తమాషా యుధ్ధాలకు స్వస్తి చెబుదాం అని ట్రంప్ ట్వీటించారు.