Moral Story: ప్రపంచంలో అత్యంత కష్టమైన పని ఏది? రాయల సభలో తెనాలి వేసిన చిక్కుముడి!

ఒకప్పుడు విజయనగర సామ్రాజ్యాన్ని పాలించిన శ్రీకృష్ణదేవరాయలు ఆస్థానంలో తెనాలి రామకృష్ణ అపారమైన తెలివితేటలకు, హాస్య చతురతకు ప్రసిద్ధి చెందారు. ఆయన తెలివికి నిదర్శనంగా నిలిచిన సంఘటనలలో ఒకటి ప్రపంచంలో అత్యంత కష్టమైన పని గురించి జరిగిన చర్చ. ఇది ఇప్పుడు సోషల్ మీడియాలో వైరల్‌గా మారింది.ఇంతకూ ఆ చర్చలో ఏముందంటే.. ఒక శుభోదయం, రాజ సభలో మంత్రులు, ఇతర సభాసదులు ప్రపంచంలో అత్యంత కష్టమైన పని ఏది అనే అంశంపై తీవ్రమైన చర్చలో నిమగ్నమై ఉన్నారు.

ఈ క్రమంలో కొంతమంది యుద్ధం చేయడమే అత్యంత కష్టమైన పని అని వాదించగా. మరికొందరు రాజ్యాన్ని సమర్థవంతంగా పరిపాలించడమే అన్నింటికన్నా కష్టమని చెప్పారు. అత్యధికులు మహారాజును పొగడుతూ, రాజ్య భారాన్ని భుజాలపై మోసే ఆయన పనే ఈ లోకంలోకెల్లా కష్టతరమైనదని అన్నారు. మహారాజు కూడా నిజమే కావచ్చు. రాజు పని నిజంగా కష్టమైనదే అని వారి వాదనను అంగీకరించారు.

అయితే, సభలో మౌనంగా ఉన్న తెనాలి రామకృష్ణను మహారాజు తన అభిప్రాయం అడిగారు. తెనాలి రామకృష్ణ నమ్రతతో, తన అభిప్రాయం భిన్నంగా ఉందని తెలిపారు. మహారాజు పని కష్టమే అయినప్పటికీ, దానికన్నా కష్టమైన మరొక పని ఉందని తెనాలి రామకృష్ణ అన్నాడు. ఆ పని మరేదో కాదు, ఒక తల్లి పనే ప్రపంచంలో అత్యంత కష్టమైనదని ఆయన స్పష్టం చేశారు. ఈ మాటలు సభలోని వారందరినీ ఆశ్చర్యపరిచాయి. రాజు సైతం తల్లి పని అంటే ఇంటి పట్టున ఉండి పిల్లల్ని చూసుకోవడమేగా, అది అంత కష్టమా? అని ప్రశ్నించారు.

తన వాదనను నిరూపించమని తెనాలి రామకృష్ణను మహారాజు కోరగా, రామకృష్ణ అందుకు సిద్ధమని, కానీ దానికి ఒక చిన్న ప్రయోగం చేయాల్సి ఉంటుందని సూచించారు. మహారాజు అంగీకరించడంతో, తెనాలి రామకృష్ణ ఒక తల్లిని, ఆమె ఐదేళ్ల కొడుకును సభకు పిలిపించమని కోరారు. ఆ పిల్లవాడు ఏది అడిగినా ఇస్తానని మహారాజు చేత మాట ఇప్పించారు.

కొడుకు సభకు రాగానే మహారాజు చెప్పు బాబు, నీకేం కావాలి? అని అడిగారు. ఆ పిల్లవాడు నిర్మొహమాటంగా నాకు ఏనుగు కావాలి అని చెప్పాడు. వెంటనే మహారాజు భటులను పిలిచి రాజ గజశాల నుండి ఒక ఏనుగును తీసుకురమ్మని ఆజ్ఞాపించారు. అయితే, పిల్లవాడు ఊహించని కోరిక కోరాడు: ఈ ఏనుగుని ఒక సంచిలో పెట్టి ఇవ్వండి. నేను ఇంటికి మోసుకెళ్తాను. ఈ అసాధ్యమైన కోరికతో మహారాజు ఖంగుతిన్నారు. సంచిలోనా? ఏనుగంత పెద్దది సంచిలో ఎలా పడుతుంది? ఇది అసాధ్యం అని అన్నారు.

అప్పుడు తెనాలి రామకృష్ణ మహారాజును ఉద్దేశించి, అదే మహారాజా, ఇప్పుడు మీకు అర్థమైందా? ఒక్క పిల్లవాడి అసాధ్యమైన కోరికే మిమ్మల్ని ఇంతలా తికమక పెట్టింది. కానీ ఆ తల్లి ప్రతిరోజూ ఇలాంటి వందల కోరికలను భరిస్తుంది. పిల్లవాడు ఏడిస్తే ఓదార్చాలి, మారాం చేస్తే సముదాయించాలి, అర్థం లేని కోరికలు కోరితే వాటికి సమాధానం వెతకాలి. ఇవన్నీ ఒక్కటే, ఎవరి సాయం లేకుండానే. రాజుకు మంత్రులు సహాయం చేస్తారు, సైన్యం సహాయం చేస్తుంది. కానీ తల్లికి సహాయం చేసేది ఎవరు మహారాజా? అని వివరించారు.

ఈ మాటలతో మహారాజు కళ్ళు తెరిచారు. నిజమే తెనాలి. నేను ఒక్క పిల్లవాడి కోరిక ముందే తడబడ్డాను. ఈమె అయితే ప్రతిరోజు ఇలాంటివి ఎన్నో భరిస్తుంది. అమ్మా, నన్ను క్షమించు. ఒక తల్లి కష్టాన్ని నేను ఇంతవరకు గుర్తించలేదు అని పశ్చాత్తాపం చెందారు. ఆ తల్లికి కానుకలు ఇచ్చి గౌరవించారు. తెనాలి రామకృష్ణ తెలివి ఏనుగుని సంచిలో పెట్టలేకపోయినా, ఒక గొప్ప సత్యాన్ని సభ ముందు నిలబెట్టగలిగింది. రాజ సింహాసనం మీద కూర్చున్నా, సైన్యాన్ని నడిపించినా, ఒక తల్లి ప్రేమతో, ఓపికతో చేసే పనితో ఏదీ సాటి రాదని, ప్రపంచంలో అత్యంత గొప్ప పని అమ్మ పనే అని ఈ కథ ద్వారా మహారాజుకు, సభకు, ప్రజలకు చాటిచెప్పబడింది.

మరిన్ని హ్యూమన్ ఇంట్రెస్ట్ వార్తల కోసం ఇక్కడ క్లిక్ చేయండి.