బియ్యం నీటితో యాంటీ ఏజింగ్ చిట్కాలు.. యవ్వనంగా కనిపించాలంటే ఇలా చేయాల్సిందే..!

మనం బియ్యాన్ని ఉడికించినప్పుడు లేదా నానబెట్టినప్పుడు మిగిలే నీటిని చాలా మంది పెద్దగా పట్టించుకోరు. కానీ అదే బియ్యం నీరు చర్మ సంరక్షణలో అద్భుతంగా ఉపయోగపడుతుంది. ఇందులో సహజంగా యాంటీఆక్సిడెంట్లు, ఖనిజాలు, చర్మానికి అవసరమైన పోషకాలు పుష్కలంగా ఉంటాయి. ఇది చర్మాన్ని ఆరోగ్యంగా ఉంచుతుంది. మొటిమలు, మచ్చలు, వాపులు వంటి సమస్యలను తగ్గిస్తుంది.

ఎందుకు మంచిదంటే..?

బియ్యంలో ఉండే యాంటీఆక్సిడెంట్లు ముఖ్యమైన ఎంజైములు చర్మంలోని మెలనిన్ స్థాయిని నియంత్రిస్తాయి. దీని వల్ల నలుపు మచ్చలు, చర్మ రంగు అసమానతలు తగ్గుతాయి.

• ఇది చర్మానికి సహజంగా కాంతిని తేవడంలో సహాయపడుతుంది.
• బియ్యం నీటిలో ఉండే తేమను పెంచే గుణం వల్ల ఎండిపోయిన లేదా ఎర్రగా ఉన్న చర్మానికి ఉపశమనం లభిస్తుంది.
• ముఖంపై వచ్చే ముడతలు, వృద్ధాప్య లక్షణాలను తగ్గించి చర్మాన్ని మెత్తగా, యవ్వనంగా ఉంచుతుంది.
• చర్మ రంధ్రాల పరిమాణాన్ని తగ్గించి చర్మాన్ని మృదువుగా ఉంచుతుంది.
• బియ్యం నీరు మొటిమలకు కారణమయ్యే బ్యాక్టీరియా పెరుగుదలను అరికడుతుంది.

తయారీ విధానం

• నానబెట్టిన బియ్యం నీరు.. అర కప్పు బియ్యాన్ని మూడు కప్పుల నీటిలో అరగంట నానబెట్టండి. ఆ నీటిని వడగట్టి ఫ్రిజ్‌లో పెట్టుకోండి.
• ఉడికించిన బియ్యం నీరు.. అర కప్పు బియ్యాన్ని ఒక కప్పు నీటితో మామూలుగా ఉడికించండి. మిగిలిన నీటిని వడగట్టి చల్లబరచి నిల్వ ఉంచండి.
• పులియబెట్టిన బియ్యం నీరు.. నానబెట్టిన బియ్యాన్ని గదిలో 24 నుంచి 48 గంటల వరకు అలాగే ఉంచండి. అప్పుడు కొద్దిగా ఫెర్మెంటేషన్
• జరుగుతుంది. తర్వాత వడగట్టి ఫ్రిజ్‌లో నిల్వ చేసుకోవచ్చు.

ఎలా వాడాలి..?

• జిడ్డు చర్మం.. ఒక టేబుల్ స్పూన్ బియ్యం నీటిలో కొన్ని చుక్కలు టీ ట్రీ ఆయిల్ కలిపి ముఖానికి రాయండి. 15 నిమిషాల తర్వాత చల్లని నీటితో కడగండి.
• పొడి చర్మం.. ఒక టేబుల్ స్పూన్ బియ్యం నీటిలో తేనె కలిపి ముఖానికి పట్టించండి. 20 నిమిషాల తర్వాత కడగండి.
• మిశ్రమ చర్మం.. ఒక టేబుల్ స్పూన్ బియ్యం నీటిలో అర టీ స్పూన్ అలోవెరా జెల్ కలిపి వాడండి.
• సున్నితమైన చర్మం.. బియ్యం నీటిని చల్లబరచి నేరుగా ముఖానికి అప్లై చేయండి. 10 నిమిషాల తరువాత కడిగేస్తే సరిపోతుంది.

జాగ్రత్తలు

• బియ్యం నీటిని ఎక్కువ రోజులు నిల్వ ఉంచితే అది పులిసి హానికరమైన బ్యాక్టీరియా పెరిగే అవకాశం ఉంది.
• వడకట్టకుండా వాడితే చర్మ రంధ్రాలు మూసుకుపోయే ప్రమాదం ఉంటుంది.
• బియ్యం నీరు వాడే ముందు చిన్న భాగంలో పరీక్షించి వాడటం ఉత్తమం.

(NOTE: పై చిట్కాలు ఉపయోగించే ముందు తప్పని సరిగా పాచ్ టెస్ట్ చేయండి. ఈ మిశ్రమాన్ని చేతి వెనుక భాగంలో లేదా చెవి వెనుక భాగంలో చిన్నగా రాసి ఎలాంటి అలర్జీ, దురద రాకపోతే మాత్రమే వాడాలి)