ఖాళీ కడుపుతో వ్యాయామం చేస్తున్నారా..? ఈ జాగ్రత్తలు తీసుకుంటున్నారా..?

ఆరోగ్యంగా ఉండాలనుకునేవారు.. బరువు తగ్గాలని చూసేవారు తరచూ వ్యాయామం చేస్తారు. ఇలా వ్యాయామం చేసే పద్ధతుల్లో ఇటీవల ఫాస్టెడ్ కార్డియో అనే కొత్త విధానం పాపులర్ అయ్యింది. ఉదయం నిద్రలేచిన వెంటనే లేదా చాలా సేపు తినకుండా ఉన్న తర్వాత చేసే వ్యాయామం. ఖాళీ కడుపుతో చేసే వ్యాయామం వల్ల శరీరానికి ఉపయోగాలు ఉంటాయని కొంతమంది నిపుణులు చెబుతున్నారు.

మన శరీరం సాధారణంగా ఆహారం తిన్న తర్వాత అందులోని కార్బోహైడ్రేట్లు, ముఖ్యంగా గ్లూకోజ్‌ను శక్తిగా మార్చుతుంది. కానీ ఎక్కువసేపు తినకుండా ఉన్నప్పుడు శరీరంలో గ్లూకోజ్ నిల్వలు తక్కువగా ఉంటాయి. అప్పుడు శరీరం శక్తి కోసం కొవ్వు నిల్వలను వాడుతుంది. ఖాళీ కడుపుతో వ్యాయామం చేస్తే శరీరానికి తినడానికి ఏం ఉండదు కాబట్టి.. అవసరమైన శక్తిని తీసుకోవడానికి నేరుగా దాచిన కొవ్వును ఉపయోగించడం ప్రారంభిస్తుంది. అలా చేయడం వల్ల శరీరంలోని కొవ్వు తగ్గడంలో సహాయపడుతుంది.

ఖాళీ కడుపుతో వ్యాయామం చేసినప్పుడు గ్లూకోజ్ స్థాయి తక్కువగా ఉండడం వల్ల శరీరం ప్రత్యక్షంగా కొవ్వును శక్తిగా మార్చుతుంది. అలా బరువు తగ్గడం వేగంగా జరుగుతుంది. కొంత మందికి ఇది శక్తివంతమైన పద్ధతిగా మారుతుంది. చాలా మంది ఈ పద్ధతిని బరువు తగ్గే ప్రయోజనాల కోణంలో అనుసరిస్తున్నారు.

ఇన్సులిన్ అనేది మన శరీరంలోని షుగర్ స్థాయిని నియంత్రించే హార్మోన్. ఖాళీ కడుపుతో వ్యాయామం చేయడం వల్ల శరీరం ఇన్సులిన్‌ను సమర్థంగా ఉపయోగించడానికి సహాయపడుతుంది. ఇది డయాబెటిస్ వంటి జీవన శైలి సమస్యలను నివారించడంలో ఉపయోగపడుతుంది. అలాగే ఇది మెటబాలిజం‌ను మెరుగుపరచడంలో సహాయపడుతుంది.

కొన్ని పరిశోధనలు సూచిస్తున్నదాని ప్రకారం ఖాళీ కడుపుతో వ్యాయామం చేయడం వల్ల శరీర ఓర్పు మెరుగవుతుంది. శరీరం శక్తి కోసం కొవ్వునే ఉపయోగించడానికి అలవాటు పడుతుంది. దీని వల్ల ఎక్కువసేపు వ్యాయామం చేయగలగడం సాధ్యమవుతుంది. పరుగు, తేలికపాటి క్రీడలు, సైక్లింగ్ వంటి శారీరక శ్రమ ఎక్కువగా ఉండే పనుల్లో ఇది ఉపయోగపడుతుంది.

ఖాళీ కడుపుతో వ్యాయామం చేయడం కొన్ని సందర్భాల్లో అందరికీ సరిపోదు. కొంతమందికి ఇది తలనొప్పి, తలతిరగడం, నీరసం వంటి సమస్యలకు కారణం అవుతుంది. శరీరం తక్కువ శక్తితో ఉండే సమయంలో వ్యాయామం చేయడం వల్ల అలసటగా ఉండొచ్చు. ముఖ్యంగా దీర్ఘకాలిక అనారోగ్యం ఉన్నవారు డాక్టర్ సలహా తీసుకోవడం మంచిది. ఈ పద్ధతిని మొదలుపెట్టే ముందు తగిన జాగ్రత్తలు తీసుకోవాలి.

ఉదయం నిద్రలేచిన తర్వాత తినకుండానే చేసే వ్యాయామం ఫాస్టెడ్ వ్యాయామం కిందకి వస్తుంది. ఈ సమయంలో శరీరంలోని గ్లూకోజ్ స్థాయి తక్కువగా ఉంటుంది. ఎలాగైనా మొదట నిదానంగా ప్రారంభించాలి. ప్రథమ దశలో తక్కువ సమయం వ్యాయామం చేసి శరీర స్పందన ఎలా ఉందో చూసుకోవాలి. శరీరం అలవాటయ్యాక క్రమంగా సమయం పెంచుకోవచ్చు. నీటిని మాత్రం తగినంతగా తీసుకోవాలి.

(NOTE: ఇందులోని అంశాలు కేవలం అవగాహన కోసం మాత్రమే. నిపుణులు అందించిన సమాచారం ప్రకారం ఇక్కడ తెలియజేయడమైనది. ఆరోగ్యరీత్యా ఎలాంటి సమస్యలు ఉన్నానేరుగా వైద్య నిపుణులను సంప్రదించడం మంచిది)