అశ్వనీదత్ సెంటిమెంట్ మహేశ్‌కు కలిసొస్తుందా..!

సూపర్‌స్టార్ మహేశ్ బాబు నటిస్తోన్న మహర్షికి కొత్త విడుదల తేది వచ్చింది. ఏప్రిల్‌లోనే ఈ సినిమాను ప్రేక్షకుల ముందుకు తీసుకురావాలని దర్శకనిర్మాతలు ప్రయత్నించినప్పటికీ.. చిత్రీకరణలో జాప్యం వలన మే 9కు విడుదల వాయిదా పడింది. అయితే ఈ తేదిపై మహేశ్ అభిమానుల్లో ఆందోళన నెలకొంది. గతంలో మే నెలలో మహేశ్ నటించిన నాని, బ్రహ్మోత్సవం విడుదల కాగా.. ఆ రెండు చిత్రాలు బాక్సాఫీస్ వద్ద బోల్తా కొట్టాయి. దీంతో ఇప్పుడు మహర్షి కూడా అదే ఫలితాన్ని అందుకుంటుందేమోనని వారు ఫీల్ అవుతున్నారు.

ఇదిలా ఉంటే అశ్వనీదత్ సెంటిమెంట్ మహేశ్‌కు కలిసొస్తుందేమోనని కొందరు అభిప్రాయపడుతున్నాయి. మహర్షిని తెరకెక్కించిన నిర్మాతలలో అశ్వనీదత్ ఒకరు కాగా.. ఆయనకు మే నెల, అందునా 9వ తేది మంచి సెంటిమెంట్ ఉంది. 29సంవత్సరాల క్రితం అదే రోజున విడుదలైన జగదేకవీరుడు అతిలోకసుందరి నిర్మాతగా అశ్వనీదత్‌కు భారీ లాభాలను ఇచ్చింది. అలాగే గతేడాది మే9న విడుదలైన ‘మహానటి’ ఎంతటి విజయాన్ని సాధించిందో ప్రత్యేకంగా చెప్పాల్సిన అవసరం లేదు. అందుకే దే సెంటిమెంట్‌తో ఇప్పుడు మహర్షిని మే9న విడుదల చేయాలని అశ్వనీదత్ సూచించారట. మొత్తానికి మహర్షి ఎవరి సెంటిమెంట్‌ను బ్రేక్ చేస్తుందో చూడాలంటే రెండు నెలలు ఆగాల్సిందే.