నెట్టింట విజయ్ టెన్త్ మార్క్ షీట్ వైరల్.. ఏ సబ్జెక్టులో ఎన్ని మార్కులు వచ్చాయో తెలుసా!

తమిళనాడు రాజకీయాల్లో ప్రస్తుతం ఒకే పేరు మారుమోగుతోంది. ఆ పేరు ‘దళపతి’ విజయ్. వెండితెరపై తన నటనతో కోట్లాది మంది హృదయాలను గెలుచుకున్న ఆయన, ఇప్పుడు రాజకీయాల్లోనూ తన సత్తా చాటుతున్నారు. ఇటీవల జరిగిన 2026 అసెంబ్లీ ఎన్నికల్లో ఆయన స్థాపించిన ‘తమిళగ వెట్టి కజగం’ (TVK) పార్టీ అద్భుతమైన ప్రదర్శన కనబరిచింది. ఈ విజయంతో విజయ్ తమిళనాడు రాజకీయాల్లో అత్యంత శక్తివంతమైన నాయకుడిగా, భావి ముఖ్యమంత్రిగా అవతరించారు.

అయితే, ఆయన రాజకీయాల్లో సంచలనాలు సృష్టిస్తున్న వేళ.. సోషల్ మీడియాలో విజయ్ 10వ తరగతి మార్కుల జాబితా (Mark sheet) ఒకటి తెగ వైరల్ అవుతోంది. ఈ మార్క్‌షీట్ చూసిన నెటిజన్లు ఆశ్చర్యపోవడమే కాదు, జీవితంలో విజయానికి కేవలం పాఠశాల మార్కులు మాత్రమే కొలమానం కాదని చర్చించుకుంటున్నారు.

వైరల్ అవుతున్న సమాచారం ప్రకారం, విజయ్ తన పదో తరగతి బోర్డు పరీక్షల్లో ఒక సగటు విద్యార్థిగా నిలిచారు. ఆయన మొత్తం 1100 మార్కులకు గాను 711 మార్కులు సాధించారు. అంటే దాదాపు 65 శాతం మార్కులతో ఉత్తీర్ణులయ్యారు. ఆయన విద్యార్థిగా టాపర్ కాకపోయినప్పటికీ, క్రమశిక్షణ గల విద్యార్థిగా గుర్తింపు పొందారు. ఈ మార్క్‌షీట్‌లో అందరినీ ఆకర్షిస్తున్న విషయం ఏమిటంటే.. ఆయన ఏ సబ్జెక్టులో తక్కువ మార్కులు సాధించారు అనేది. లెక్కలంటే (Mathematics) చాలా మందికి భయం ఉంటుంది, విజయ్ విషయంలోనూ అదే నిజమైంది. ఆయన గణితంలో 200 మార్కులకు గాను కేవలం 95 మార్కులు మాత్రమే సాధించి, అత్యల్ప స్కోరును నమోదు చేశారు.

విజయ్ తన మాతృభాష అయిన తమిళంపై మంచి పట్టు ప్రదర్శించారు. తమిళంలో 200లకు గానూ 155 మార్కులు సాధించారు. ఇంగ్లీష్ భాషలో 200కు 133 మార్కులు, సైన్స్ లో 300కి 206 మార్కులు, సోషల్ స్టడీస్‌లో 200కి 122 మార్కులు వచ్చాయి. మొత్తం మీద 1100 మార్కులకు 711 మార్కులతో ఆయన తన పాఠశాల విద్యను విజయవంతంగా ముగించారు.

విజయ్ విద్యాభ్యాసం చెన్నైలోని ఫాతిమా పాఠశాలలో ప్రారంభమైంది. ఆ తర్వాత విరుగంబాక్కంలోని బాలలోక్ స్కూల్‌లో చదివారు. ఉన్నత విద్య కోసం ప్రతిష్టాత్మకమైన లయోలా కళాశాలలో విజువల్ కమ్యూనికేషన్ కోర్సులో చేరారు. అయితే, లోపల ఉన్న నటుడు ఆయనను నిలవనీయలేదు. తండ్రి ఎస్.ఏ. చంద్రశేఖర్ దర్శకత్వంలో సినిమాల్లోకి ప్రవేశించాలనే లక్ష్యంతో చదువును మధ్యలోనే ఆపివేశారు. ఆ పట్టుదలే నేడు ఆయనను దక్షిణాదిలోనే అత్యధిక పారితోషికం తీసుకునే నటుడిగా నిలబెట్టింది.

విజయ్ మార్క్‌షీట్ వైరల్ కావడానికి ప్రధాన కారణం అందులో ఉన్న తక్కువ మార్కులు కావు, ఆ మార్కుల వెనుక ఉన్న విజయగాథ. పరీక్షల్లో తక్కువ మార్కులు వచ్చినంత మాత్రాన జీవితం ముగిసిపోదని, మనలో ఉన్న ప్రతిభను గుర్తించి సరైన మార్గంలో వెళ్తే ఆకాశమే హద్దుగా రాణించవచ్చని విజయ్ ప్రయాణం నిరూపిస్తోంది. నాడు లెక్కల్లో తడబడిన అదే విద్యార్థి, నేడు తమిళనాడు రాజకీయ లెక్కలను మారుస్తూ ముఖ్యమంత్రి పీఠం వైపు అడుగులు వేస్తుండటం గమనార్హం. ఈ మార్క్‌షీట్ ఇప్పుడు పరీక్షల ఒత్తిడిలో ఉన్న విద్యార్థులకు, తక్కువ మార్కులు వచ్చాయని బాధపడే యువతకు ఒక గొప్ప స్ఫూర్తిదాయక పాఠంగా మారింది.

మరిన్ని జాతీయ వార్తల కోసం ఇక్కడ క్లిక్ చేయండి..