‘పుష్ప’ను వదులుకునేందుకు బాధపడ్డా.. కానీ తప్పలేదు

అల్లు అర్జున్ హీరోగా సుకుమార్ తెరకెక్కిస్తోన్న చిత్రం ‘పుష్ప’. ఈ చిత్రంలో ఓ కీలక పాత్ర కోసం కోలీవుడ్ నటుడు విజయ్ సేతుపతిని ఫైనల్ చేసినట్లు మొదటి నుంచి టాక్ నడిచింది. అయితే ఆ తరువాత కొద్ది రోజులకే ఈ మూవీ నుంచి విజయ్ తప్పుకున్నట్లు మరోసారి వార్తలు వినిపించాయి. ఇక పుష్ప నుంచి ఈ నటుడు తప్పుకోవడంపై పలు రకాల పుకార్లు కూడా వచ్చాయి. ఇదిలా ఉంటే పుష్ప నుంచి తాను తప్పుకున్నట్లు ఇటీవల ఓ ఇంటర్వ్యూలో వెల్లడించిన విజయ్‌.. అందుకు గల కారణాన్ని కూడా వెల్లడించారు.

డేట్లను అడ్జెస్ట్ చేయలేకే పుష్ప నుంచి తాను తప్పుకున్నానని విజయ్ సేతుపతి తెలిపారు. డేట్ల విషయంపై సుకుమార్‌ని వ్యక్తిగతంగా కలిశానని.. అవి ఎలా ఉన్నా తాము మేనేజ్ చేసుకుంటామని ఆయన తనకు చెప్పారని అన్నారు. అయితే మాట ఇచ్చి తరువాత టీమ్‌ని ఇబ్బంది పెట్టడం ఇష్టం లేకనే ఈ మూవీ నుంచి తాను తప్పుకున్నట్లు విజయ్ వెల్లడించారు. ఇక ఈ సినిమా కథ చాలా బావుందని.. ఈ ప్రాజెక్ట్‌ని వదులుకునేందుకు బాధపడ్డా, తప్పలేదని వివరించారు. కాగా ఎర్రచందనం స్మగ్లింగ్ నేపథ్యంలో పుష్ప తెరకెక్కుతోంది. ఇందులో బన్నీ లారీ డ్రైవర్ పాత్రలో కనిపించుండగా.. రష్మిక హీరోయిన్‌గా నటిస్తోంది. మైత్రీ మూవీ మేకర్స్, ముత్తంశెట్టి క్రియేషన్స్ సంయుక్తంగా నిర్మిస్తోన్న ఈ చిత్రానికి దేవీ శ్రీ ప్రసాద్ సంగీతం అందిస్తున్నారు.