Tollywood: ముత్యాల ముగ్గు ఫేమ్ శ్రీధర్‌ చివరి రోజుల్లో అంత దారుణ స్థితికి వెళ్లారా..?

తెలుగు సినీ ప్రేక్షకులకు ‘ముత్యాల ముగ్గు’ శ్రీధర్ గా సుపరిచితుడైన నటుడు శ్రీధర్ జీవితం ఎన్నో ఆసక్తికరమైన ఘట్టాలతో నిండి ఉంది. ప్రముఖ దర్శకుడు బాపు గారికి ఇష్టమైన నటుడు ఈయన. ‘ముత్యాల ముగ్గు’చిత్రం విజయం తర్వాత పరిశ్రమకు మరో మంచి కథానాయకుడు వచ్చాడన్న ఆశాభావం కలిగింది. అయితే, ఆరంభంలో హీరోగా విజయాలు సాధించిన శ్రీధర్, ఆ తర్వాత నిలదొక్కుకోలేకపోవడానికి గల కారణాలు, ఆయన చివరి రోజులు ఎలా గడిచాయో ఈ కథనంలో తెలుసుకుందాం. కృష్ణా జిల్లాలోని గన్నవరం తాలూకు కొమ్మమూరు గ్రామంలో 1939లో సూరపనేని రామయ్య, వెంకటసుబ్బమ్మ దంపతులకు శ్రీధర్ జన్మించారు. నిండైన విగ్రహం, చక్కని ముఖ కళతో ఆయన ఆకర్షణీయంగా కనిపించేవారు. ఆడుతూ పాడుతూ బాల్యం గడిపి, హైస్కూల్ విద్య పూర్తి చేశారు. ఆ తర్వాత హైదరాబాద్ వచ్చి వి.వి. కాలేజీలో బి.ఏ. చదివారు. 1961లో సెక్రటేరియట్‌లో పబ్లిక్ వర్క్స్ డిపార్ట్మెంట్‌లో జాబ్ సంపాదించారు. ఈ సమయంలోనే నాటకాల మీదకు ఆయన ఆసక్తి మళ్లింది. ఆంధ్ర నాటక పరిషత్ నిర్వహించిన పోటీల్లో పాల్గొని, 1966లో ఇంటర్ స్టేట్ కల్చరల్ ఎక్స్చేంజ్ ప్రోగ్రామ్స్ ద్వారా మైసూర్, కేరళ రాష్ట్రాల్లో “ఆంధ్రశ్రీ” నాటకాన్ని ప్రదర్శించి అందరి ప్రశంసలు పొందారు.

కాగా శ్రీధర్ తమ్ముడు శేషగిరిరావు చెన్నైలో ఇంజనీర్ గా పనిచేసేవారు. ఆయన సలహాతో శ్రీధర్ చెన్నై చేరుకున్నారు. ఎన్టీఆర్ ఆశీస్సులతో “తెల్లా పెళ్లామా” (1968) చిత్రంతో ఇండస్ట్రీ ఎంట్రీ ఇచ్చారు. ఈ చిత్రంలో “తెలుగు జాతి మనది నిండుగా వెలుగు జాతి మనది” పాటలో కాలేజీ స్టూడెంట్‌గా కనిపించారు. 1969 నుంచి “సిఐడి రాజు”, “విజయం మనదే”, “రౌడీలకు రౌడీలు”, “ధర్మదాత”, “రైతు బిడ్డ” వంటి చిత్రాల్లో నటించారు. జగ్గయ్య హీరోగా నటించిన “శభాష్ పాపన్న”లో విలన్‌గా, శోభన్ బాబు “మైనర్ బాబు”లో మొదట మెయిన్ విలన్‌గా ఎంపికైనప్పటికీ, చివరకు చిన్న పాత్రకే పరిమితమయ్యారు. “విశాలి” చిత్రంలో హీరోగా నటించడంతో ఆయన కెరీర్ కొత్త మలుపు తిరిగింది. ఆ తర్వాత “జీవితాశయం”, “ప్రేమలో పెళ్లిళ్లు”, “అభిమానవంతులు” తదితర చిత్రాల్లో మంచి పాత్రలు పోషించారు. శ్రీధర్ సౌమ్యుడు, మితభాషి, మందస్మితుడు. ఆయన స్వభావానికి తగ్గ పాత్ర “ముత్యాల ముగ్గు” చిత్రంలో లభించింది. సినిమాలో శ్రీరామచంద్రుడిలా కనిపించారు. ఈ చిత్రం 25 వారాలు ఆడి ఘన విజయం సాధించి, శ్రీధర్‌కు, హీరోయిన్ సంగీతకు మంచి పేరు తెచ్చింది. అయితే, ఇంతటి విజయం తర్వాత కూడా శ్రీధర్‌కు కొత్త అవకాశాలు రాలేదు. 107 రోజులకు పైగా “ముత్యాల ముగ్గు” విజయ వార్తలు వినడం తప్ప, ఒక్క కొత్త చిత్రం కూడా ఆయనకు దక్కలేదు.

మళ్ళీ దర్శకుడు బాపు, “భక్త కన్నప్ప” చిత్రంలో శ్రీధర్‌ను దృష్టిలో పెట్టుకుని ఒక రఫ్ క్యారెక్టర్‌ను సృష్టించారు. ఆ పాత్రను అద్భుతంగా పోషించిన శ్రీధర్, ఆ తర్వాత బిజీ అయ్యారు. “అడవి రాముడు”లో ఆయన పాత్ర కూడా పేరు తెచ్చింది. ఎన్టీఆర్ తో “డ్రైవర్ రాముడు”, “జస్టిస్ చౌదరి”, “శ్రీరామ పట్టాభిషేకం”, “బంగారు మనిషి” చిత్రాల్లో నటించారు. హీరో కృష్ణ నటించిన అనేక చిత్రాల్లోనూ మంచి పాత్రలు పోషించారు. “అమెరికా అమ్మాయి”, “పల్లెసీమ” చిత్రాల్లో హీరోగా నటించారు. అయితే, నటుడికి ఉండాల్సిన కనీస అవగాహన మొదట్లో లేకపోవడంతో, దర్శకులను, నిర్మాణ సంస్థలను ఎన్నుకోవడంలో శ్రీధర్ ప్రత్యేక శ్రద్ధ చూపించలేదు. “పెళ్ళి కాని పెళ్ళి”, “సీత గీత దాటితే”, “మార్పు”, “అంగడిబొమ్మ” వంటి ప్రయోగాత్మక చిత్రాల్లో హీరోగా నటించినా, అవి ఆశించిన విజయం సాధించలేదు. “డ్రైవర్ రాముడు”లో సెకండ్ హీరో వేషం ఇస్తానని చెప్పి ఎన్టీఆర్, “శ్రీరామ పట్టాభిషేకం”లో గుహుడి పాత్రను శ్రీధర్‌తో చేయించడం ఆయన కెరీర్‌కు కొంత మైనస్ అయ్యింది. “ఫ్యామిలీ టైప్” పాత్రలకే పనికి వస్తాడనే ముద్ర పడింది. “భక్త కన్నప్ప”, “రాముడు రంగడు” చిత్రాల్లో లాగా రఫ్ క్యారెక్టర్లు, యాక్షన్ హీరో పాత్రలు చేయాలని ఆశించినా, ఆయన కోరిక తీరలేదు. శ్రీధర్ నటించిన చిత్రాల్లో బాపు “గోరంతదీపం” ఒకటి, ఇందులో వాణిశ్రీ సరసన నటించారు. “ఒక వేణువు వినిపించెను” పాట “అమెరికా అమ్మాయి” చిత్రంలో శ్రీధర్‌పై చిత్రీకరించబడింది. కోదండరామిరెడ్డి తొలి చిత్రం “సంధ్య”లో హీరోగా నటించారు. “ఈనాడు” చిత్రాన్ని మొదట శ్రీధర్ హీరోగానే తీద్దామని కృష్ణ అనుకున్నప్పటికీ, కథలో మార్పులు జరిగి ఆ పాత్రను కృష్ణ పోషించారు. “కరుణామయుడు”, “యశోదకృష్ణ”, “సీతామహాలక్ష్మి”, “బొమ్మరిల్లు”, “సీతారామ కళ్యాణం”, “జాతర”, “కోడళ్ళొస్తున్నారు జాగ్రత్త”, “కలియుగ రావణాసురుడు”, “మాయదారి కృష్ణుడు”, “అల్లూరి సీతారామరాజు” వంటి చిత్రాల్లోని పాత్రలు శ్రీధర్‌కు మంచి పేరు తెచ్చాయి.

శ్రీధర్ వ్యక్తిగత జీవితం విషయానికి వస్తే, చిత్ర పరిశ్రమలోకి రాకముందే 1965 జూన్ 17న రత్నకుమారిని వివాహం చేసుకున్నారు. వీరికి నవభారతి, కృష్ణశ్రీ, విజయలక్ష్మి అనే ముగ్గురు ఆడపిల్లలు. సినిమాల్లో అవకాశాలు తగ్గడంతో, చలనచిత్ర పరిశ్రమ హైదరాబాద్ కు తరలిరాకముందే, శ్రీధర్ హైదరాబాద్ చేరుకున్నారు. దూరదృష్టితో అప్పుడే రియల్ ఎస్టేట్ రంగంలో అడుగుపెట్టి ఆర్థికంగా స్థిరపడ్డారు. చివరికి ఆయనకు మేకప్ వేసుకునే తీరిక కూడా లేకుండా పోయింది. నాగార్జున హీరోగా రామ్‌గోపాల్ వర్మ తీసిన “గోవిందా గోవిందా” శ్రీధర్ నటించిన చివరి చిత్రం. చివరి రోజుల్లో ఆయనకు మానసిక సమస్యలు వచ్చాయని, ఆర్థికంగా ఇబ్బందులు పడ్డారని జరిగిన ప్రచారంలో నిజం లేదని సీనియర్ జర్నలిస్టులు చెబుతున్నారు. ఆర్థికంగా ఎటువంటి ఇబ్బందులు లేకుండానే, చివరి రోజుల్లో ఊపిరితిత్తుల క్యాన్సర్‌తో బాధపడ్డారు. అపోలో ఆసుపత్రిలో చికిత్స పొందుతూ, గుండెపోటు రావడంతో 2007 జూలై 11న శ్రీధర్ కన్నుమూశారు.

(ఈ కథనం సీనియర్ ఫిల్మ్ జర్నలిస్టులు అందించిన సమాచారం ఆధారంగా అందించాం)