Pathaan: చిక్కుల్లో షారుక్ ఖాన్ మూవీ.. దీపికా పదుకోన్‌‌పై మండిపడుతున్న బీజేపీ నేతలు
ట్విట్టర్‌లో బాయ్ కాట్ పఠాన్ సినిమా అని ట్రెండ్‌ అవుతోంది. దీపికా పదుకొనే దుస్తులపై హిందూ సంఘాలు తీవ్ర ఆగ్రహం వ్యక్తం చేస్తున్నాయి. కాషాయం బిక్నీ ధరించి డ్యూయెట్‌ సాంగ్‌లో నటించడంపై మండిపడుతున్నారు బీజేపీ నేతలు.
Rajeev Rayala | Edited By: Ravi Kiran
Updated on: Dec 15, 2022 | 8:39 AM
కింగ్‌ఖాన్‌ షారూఖ్‌ , దీపికా పదుకోన్‌ నటించిన పఠాన్ సినిమా లోని భేషరమ్‌ సాంగ్‌పై వివాదం మరింత రాజుకుంది. ఈ పాటను చాలా అశ్లీలంగా చిత్రీకరించారని హిందూ సంఘాలు మండిపడుతున్నాయి. ట్విట్టర్‌లో బాయ్ కాట్ పఠాన్ సినిమా అని ట్రెండ్‌ అవుతోంది. దీపికా పదుకొనే దుస్తులపై హిందూ సంఘాలు తీవ్ర ఆగ్రహం వ్యక్తం చేస్తున్నాయి. కాషాయం బిక్నీ ధరించి డ్యూయెట్‌ సాంగ్‌లో నటించడంపై మండిపడుతున్నారు బీజేపీ నేతలు. ఈ సినిమాను బ్యాన్‌ చేయాలని డిమాండ్‌ చేస్తున్నారు. హిందువుల మనోభావాలను ఈ పాట గాయపర్చిందని ఆరోపిస్తున్నారు.
విడుదలైన కొద్ది గంటల్లోనే ఈ పాట యూట్యూబ్‌‌‌‌‌‌‌‌లో మిలియన్‌ వ్యూస్‌‌‌‌‌‌‌‌తో దూసుకెళ్తోంది. . కానీ, ఈ పాటలో దీపికా ధరించిన కాషాయ రంగు బికినీపై మాత్రం వివాదం చినికిచినికి గాలివానగా మారుతోంది. ఈ మధ్య బాలీవుడ్ పాటలు ఇన్ స్టా రీల్స్ కంటే చెత్తగా ఉన్నాయని కొంతమంది విమర్శిస్తున్నారు. బేషరమ్ పాట లోని అభ్యంతరకరమైన సీన్లను తొలగించాలని మధ్యప్రదేశ్‌ హోంశాఖ మంత్రి నరోత్తమ్‌ మిశ్రా డిమాండ్‌ చేశారు. లేదంటే మధ్యప్రదేశ్‌లో సినిమా ప్రదర్శనకు అనుమతిపై ఆలోచిస్తామన్నారు. దీపికా పదుకోన్‌ జేఎన్‌యూలో తుక్డే తుక్డే గ్యాంగ్‌కు మద్దతిచ్చారని , ఇలాంటి పాటలో నటించి మరోసారి హిందువుల మనోభావాలు గాయపర్చారని అన్నారు.
బాలీవుడ్‌లో పఠాన్ లాంటి చెత్త సినిమాలు ఫ్లాప్‌ అవుతున్నాయని , ఇలాంటి సినిమాలను ప్రేక్షకులు బహిష్కరించాలని అన్నారు హిందూ మహాసభ అధ్యక్షుడు స్వామి చక్రపాణి. బీజేపీని టార్గెట్ చేయడానికే కాషాయ రంగు బికినీ వేసి బేషరమ్ రంగ్ అంటూ పాటను విడుదల చేశారని కొందరు షారుక్ ను ట్రోల్ చేస్తున్నారు. అయితే, ఈ పాటలో దీపికా మరో రెండు రంగుల బికినీలు కూడా ధరించింది, దీనిని రాజకీయం చేయాల్సిన అవసరం లేదని మరికొందరు అంటున్నారు.
