Aditya Om: మన ప్రాంతం కాదు.. మన రాష్ట్రం కాదు.. కేవలం తెలుగువాళ్లు ఆదరించారని.. నువ్వయ్యా రియల్ హీరో

రీల్ హీరోల మాయలో పడి.. మనం కొంతమంది రీల్ కమ్ రియల్ హీరోలను పట్టించుకోవడం మర్చిపోతున్నాం. అలాంటివారిలో ఒకరు ఆదిత్య ఓం. ఉత్తర ప్రదేశ్ ప్రాంతానికి చెందిన ఈ  హీరో.. లాహిరి లాహిరి సినిమాతో.. తెలుగు చిత్రసీమలో తెరంగేట్రం చేశాడు. ఆయన తండ్రి ఐఏఎస్.. తల్లి సమాజ్‌వాదీ పార్టీలో కీలక నాయకురాలు. అంతేకాదు ఆయన బందుగణం అంతా బ్యూరోక్రాట్స్‌గా, జడ్జిలుగా సేవలు అందిస్తున్నారు. అయినా సినిమాలో పాత్ర కోసం.. ఆదిత్య ఓం ఎంతో కష్టపడినట్లు లాహిరి లాహిరి సినిమా డైరెక్టర్ వైవిఎస్ చౌదిరి తెలిపారు. అతను ఎంతో డెడికేషన్ ఉన్న వ్యక్తి అని కొనియాడారు.

అయితే మంచి ఆరంభమే లభించినా.. ఆదిత్య ఓం కెరీర్ అంత ఆశాజనకంగా సాగలేదు. 2002లో వచ్చిన లాహిరి లాహిరి లాహిరిలో తర్వాత అతనికి చెప్పకోగదగ్గ హిట్ పడలేదు. అయినా కానీ తనను నటుడిగా ఆదరించిన తెలుగు ప్రేక్షకుల రుణం తీర్చుకుంటున్నాడు ఈ యాక్టర్. సేవా కార్యక్రమాలలో ఎంతో యాక్టివ్‌గా ఉండే ఆదిత్య ఓం.. తెలంగాణలోని గిరిజన గ్రామమైన చెరుపల్లిని దత్తత తీసుకున్నాడు. తన సంస్థ “ఎడ్యులైట్‌మెంట్”తో విద్యా సంస్కరణల కోసం కీలకంగా పని చేస్తున్నాడు. గ్రామంలో ఒక లైబ్రరీని నిర్మించాడు. డిజిటల్ సేవా కేంద్రాన్ని ప్రారంభించాడు. గ్రామంలోని పిల్లలకు   ల్యాప్‌టాప్‌లు అందిచాడు. విలేజ్ మొత్తం సోలార్ లైట్లను ఏర్పాటు చేయించాడు. చెరుపల్లితో పాటు చుట్టుపక్కల ప్రాంతాల్లో..  కలుషితమైన నీటి ద్వారా సంక్రమించే వ్యాధులతో ప్రజలు ఇబ్బంది పడటాన్ని గుర్తించిన ఆదిత్య ఓం..  RO వాటర్ ప్లాంట్ నిర్మాణానికి పూనుకున్నారు. ఈ ప్రాజెక్టును త్వరగా పూర్తి చేసి సంక్రాంతి వరకు ప్రజలకు స్వచ్చమైన నీటిని అందించేందుకు ఆయన వడివడిగా ముందుకు సాగుతున్నారు. అందుకే ఆదిత్య ఓంను రియల్ హీరో అని కీర్తిస్తున్నారు చెరుపల్లి గ్రామవాసులు. అతడిని ఆదర్శంగా తీసుకుని.. ఒక్కో హీరో.. ఇలా ఒక వెనకబడిన గ్రామాన్ని దత్తత తీసుకుంటే తెలంగాణ రూపే మారిపోతుంది అంటున్నారు.

ఇటీవలే ఆదిత్య ఓం తెలుగు బిగ్ బాస్ 8లో సందడి చేసిన విషయం తెలిసిందే. ప్రస్తుతం ఆయన పర్యావరణ సంరక్షణ ప్రాముఖ్యతను తెలిపే.. బంధీ అనే చిత్రం చేస్తున్నారు. త్వరలో ఈ చిత్రం ప్రేక్షకుల ముందుకు రానుంది.

మరిన్ని సినిమా వార్తల కోసం ఇక్కడ క్లిక్ చేయండి