Ramya Nambeesan:దర్శకురాలిగా మారిన నటి.. అందరినీ ఏకిపారేసిందిగా..!

రమ్యా నంబీషన్.. ఈ పేరు చెప్పగానే టాలీవుడ్ ప్రేక్షకులు ఇట్టే గుర్తుపట్టేయకపోవచ్చు. కానీ పిజ్జా సినిమా చూసిన వారు ఈ అమ్మడును కచ్చితంగా గుర్తు పెట్టుకుంటారు. తెలుగులో రెండు, మూడు చిత్రాల్లో నటించినప్పటికీ.. ఈ భామ ఇక్కడ పెద్దగా క్లిక్ కాలేకపోయింది. అయితే తమిళం, మలయాళంలో మాత్రం రమ్యకు మంచి ఫాలోయింగ్ ఉంది. ఇదిలా ఉంటే ఇటీవలే రమ్య నంబీషన్ ఎన్‌కోర్ పేరుతో ఓ యూట్యూబ్‌ ఛానెల్‌లో ప్రారంభించిన ఈ హీరోయిన్.. తాజాగా మరో అవతారమెత్తింది. దర్శకురాలిగా తన ప్రతిభను బయటపెట్టింది రమ్య.

‘అన్‌ హైడ్’ పేరుతో రమ్య తీసిన షార్ట్ ఫిలిం తాజాగా విడుదలైంది. మూడు నిమిషాల పాటు సాగిన ఈ షార్ట్ ఫిలింలో సమాజంలో మహిళలు ఎదుర్కొంటున్న సమస్యలను చూపించడంతో పాటు.. పురుషులు ఎలా ఉండాలో కూడా వివరించింది. ఇక ఈ లఘు చిత్రానికి భద్రీ వెంకటేష్ డైలాగ్‌లు రాయగా.. రమ్య సోదరుడు రాహుల్ సుబ్రమణ్యం సంగీతం అందించారు. ఈ షార్ట్‌ ఫిలింలో రమ్య, శ్రిత శివదాస్ నటించారు. ప్రస్తుతం ఈ లఘు చిత్రంలో యూట్యూబ్‌లో హల్‌చల్ చేస్తుండగా.. సర్వత్రా ప్రశంసలు వెల్లువెత్తుతున్నాయి. అర్థవంతంగా, అద్భుతంగా.. రమ్య ఈ లఘు చిత్రాన్ని తెరకెక్కించిందని నెటిజన్లు కూడా తమ అభిప్రాయాలను వ్యక్తపరుస్తున్నారు. మొత్తానికి అన్ హైడ్‌తో తనలో ఇన్నిరోజులు హైడ్ అయి ఉన్న టాలెంట్‌ను బయటపెట్టేసింది రమ్య. ఇక ఈ లఘు చిత్రం ఇచ్చిన ఊపుతో రమ్య భవిష్యత్‌లో ఓ చిత్రాన్ని తెరకెక్కించినా ఆశ్చర్యపోవక్కర్లేదని కొంతమంది కామెంట్లు పెడుతున్నారు.