Priyanka Gandhi: పోటీ చేసిన ఫస్ట్‌ టైమే ప్రియాంక రికార్డ్.. గాంధీ కుటుంబ నుంచి పార్లమెంటుకు 10వ సభ్యురాలు!

రెండు దశాబ్దాల క్రితం గాంధీ – నెహ్రూ కుటుంబం వారసురాలిగా రాజకీయాల్లోకి వచ్చిన ప్రియాంక గాంధీ.. తొలిసారి ప్రత్యక్ష ఎన్నికల బరిలోకి దిగి, రికార్డు సృష్టించారు. కేరళలోని వయనాడ్ లోక్‌సభ ఉప ఎన్నికలో సమీప అభ్యర్థిపై 3.94 లక్షలకు పైగా ఓట్ల ఆధిక్యంతో ఘన విజయం సాధించారు. తన సోదరుడు రాహుల్ గాంధీ రాజీనామా చేసిన స్థానంలో పోటీ చేసి విజయాన్ని నమోదు చేసుకున్నారు. రాహుల్ సాధించిన 3.64 లక్షల ఓట్ల మెజార్టీని దాటేసి రికార్డ్ సృష్టించారు. ‘ప్రజా ప్రతినిధిగా ఈ ప్రయాణం కొత్తేమో కానీ.. ప్రజల తరఫున పోరాటం కొత్త కాదు అంటూ జనంలోకి దూసుకెళ్లారు ప్రియాంక. 30 ఏళ్లు గృహిణిగా పిల్లల సంరక్షణ, కుటుంబ బాధ్యతల విషయంలో ఏమాత్రం వెనకడుగు వేయని ప్రియాంక, తాజాగా ప్రజా సమస్యలపైనా పోరాడేందుకు సిద్ధమయ్యారు. “నేనో ఫైటర్.. మీ తరఫున బలమైన గొంతుకనవుతా..” అని ఆమె చేసిన వ్యాఖ్యలే ప్రజలను ఆమె దగ్గరకు చేర్చాయి.

ప్రియాంక గాంధీ నెహ్రూ-గాంధీ కుటుంబంలో రాజకీయాల్లోకి వచ్చిన 10వ సభ్యురాలు. పార్లమెంటుకు చేరిన ప్రియాంక కంటే ముందు గాంధీ కుటుంబం నుంచి జవహర్‌లాల్ నెహ్రూ, ఇందిరా గాంధీ, ఫిరోజ్ గాంధీ, సంజయ్ గాంధీ, రాజీవ్ గాంధీ, సోనియా గాంధీ, మేనకా గాంధీ, వరుణ్ గాంధీ, రాహుల్ గాంధీలు రాజకీయాల్లోకి వచ్చారు. ప్రియాంక గాంధీ ఇప్పుడు తన రాజకీయాలను దేశంలోని దక్షిణ ప్రాంతం నుండి ప్రారంభించడం విశేషం. ప్రియాంక గాంధీకి రాజకీయ జీవితంలో ఇది మొదటి ఎన్నిక. ఇక్కడ ఆమె సీనియర్ సిపిఐ నాయకుడు సత్యన్ మొకేరి, బీజేపీకి చెందిన నవ్య హరిదాస్‌పై పోటీ చేశారు.

తన సోదరుడు రాహుల్‌గాంధీలా ప్రియాంక గాంధీ ఘనవిజయాన్ని పునరావృతం చేయగలదా అనే దానిపైనే అందరి దృష్టి నెలకొంది. అయితే 2019 ఎన్నికల్లో రాహుల్ గాంధీ 4,31,770 ఓట్లతో, 2024 సాధారణ ఎన్నికల్లో 3,64,422 ఓట్లతో గెలుపొందారు. రాహుల్ గాంధీ అమేథీ నుంచి ఎంపీగా కొనసాగాలని నిర్ణయించుకోవడంతో ఈ ఏడాది ప్రారంభంలో వయనాడ్ సీటును ఖాళీ చేశారు. దీంతో జరిగిన ఉప ఎన్నికల్లో ప్రియాంక గాంధీ బరిలోకి దిగి చరిత్ర సృష్టించారు.

గాంధీ-నెహ్రూ కుటుంబం నుంచి పార్లమెంటుకు..

ప్రియాంక కంటే ముందు గాంధీ కుటుంబం నుంచి జవహర్‌లాల్ నెహ్రూ, ఇందిరా గాంధీ, ఫిరోజ్ గాంధీ, సంజయ్ గాంధీ, రాజీవ్ గాంధీ, సోనియా గాంధీ, మేనకా గాంధీ, వరుణ్ గాంధీ, రాహుల్ గాంధీలు రాజకీయాల్లోకి వచ్చారు. ప్రియాంక గాంధీ ఇప్పుడు తన రాజకీయాలను దేశంలోని దక్షిణ ప్రాంతం నుండి ప్రారంభించారు. ఆమె తన నానమ్మ, దేశ మాజీ ప్రధాని ఇందిరా గాంధీ, తల్లి సోనియా గాంధీ, అత్త మేనకా గాంధీ తర్వాత పార్లమెంటుకు చేరుకున్న నాల్గవ మహిళా సభ్యురాలు.

జవహర్‌లాల్ నెహ్రూ:

దేశానికి మొదటి, ఎక్కువ కాలం పనిచేసిన ప్రధానమంత్రి జవహర్ లాల్ నెహ్రూ. 1912 సంవత్సరంలో రాజకీయాల్లో క్రియాశీలకంగా మారారు. అయితే దేశానికి స్వాతంత్ర్యం వచ్చిన తర్వాత జరిగిన లోక్‌సభ ఎన్నికలలో ఆయన తన మొదటి ఎన్నికల్లో పోటీ చేశారు. ఆగస్టు 15, 1947 నుంచి మే 27, 1964 వరకు 16 ఏళ్లపాటు ప్రధానిగా ఉన్నారు.

ఇందిరా గాంధీ:

ఇందిరా గాంధీ కాంగ్రెస్ సెంట్రల్ వర్కింగ్ కమిటీ సభ్యునిగా రాజకీయాలు ప్రారంభించారు. కానీ ఆమె తన తండ్రి మరణం తర్వాత 1967లో ఉత్తరప్రదేశ్‌లోని రాయ్‌బరేలీ స్థానం నుండి తన మొదటి ఎన్నికల్లో పోటీ చేశారు. ఇందిరా గాంధీ1966-77 మధ్య, 1980 నుండి 1984 వరకు దేశానికి ప్రధానిగా ఉన్నారు. ఇందిరా గాంధీ తన హయాంలో ప్రతిపక్ష నాయకుల కదలికలను ఆపడానికి విధించిన ఎమర్జెన్సీ ఇప్పటికీ విమర్శలకు గురవుతోంది.

ఫిరోజ్ గాంధీ:

ఇందిరాగాంధీ భర్త ఫిరోజ్ గాంధీ దేశ స్వాతంత్య్ర ఉద్యమాలలో చాలా చురుకుగా ఉండేవారు. దేశానికి స్వాతంత్య్రం వచ్చిన తర్వాత జరిగిన తొలి లోక్‌సభ ఎన్నికల్లో కాంగ్రెస్‌ టికెట్‌పై ప్రతాప్‌గఢ్‌-రాయ్‌బరేలీ స్థానం నుంచి పోటీ చేసి గెలుపొందారు. ఆ తర్వాత 1957లో యూపీలోని రాయ్‌బరేలీ నుంచి ఎన్నికల్లో పోటీ చేశారు.

సంజయ్ గాంధీ:

ఇందిరా గాంధీ చిన్న కుమారుడు సంజయ్ గాంధీ తన యవ్వనం నుండి రాజకీయాలపై ఆసక్తిగా ఉన్నారు.విదేశాల నుండి తిరిగి వచ్చిన తర్వాత రాజకీయాల్లో చురుకుగా మారారు. ఎమర్జెన్సీ తర్వాత 1977 లోక్‌సభ ఎన్నికల్లో యూపీలోని అమేథీ నుంచి తొలి ఎన్నికల్లో పోటీ చేశారు. ఈ ఎన్నికల్లో ఘోరంగా ఓడిపోయారు. అయితే 1980లో జరిగిన లోక్‌సభ ఎన్నికల్లో మళ్లీ అమేథీ నుంచి పోటీ చేసి విజయం సాధించారు. కానీ అతను 23 జూన్ 1980న విమాన ప్రమాదంలో మరణించారు.

రాజీవ్ గాంధీ:

దేశ మాజీ ప్రధాని, రాజీవ్ గాంధీ తన తమ్ముడు సంజయ్ గాంధీ మరణానంతరం 1981లో అమేథీలో జరిగిన ఉప ఎన్నికల్లో విజయం సాధించడం ద్వారా తన రాజకీయ జీవితాన్ని ప్రారంభించారు. అయితే ఆ తర్వాత 1984లో ఇందిరాగాంధీ హత్య తర్వాత ఆయన పార్టీ బాధ్యతలు చేపట్టారు. అనంతరం ప్రధానమంత్రి పదవిని చేపట్టారు. అదే సమయంలో, ఇందిరా గాంధీ హత్య తర్వాత, దేశంలో జరిగిన సార్వత్రిక ఎన్నికల్లో ఆమె నాయకత్వంలో కాంగ్రెస్ భారీ మెజారిటీని సాధించింది. ఇది నేటికీ రికార్డు. అయితే 1991లో సార్వత్రిక ఎన్నికల ప్రచారంలో ఉండగా తమిళనాడులోని శ్రీపెరంబుదూర్‌లో రాజీవ్ గాంధీ హత్యకు గురయ్యారు.

మేనకా గాంధీ:

1984 సార్వత్రిక ఎన్నికల్లో సొంతంగా ప్రత్యేక పార్టీని స్థాపించడం ద్వారా మేనకా గాంధీ తన రాజకీయ జీవితాన్ని ప్రారంభించారు. 1984 సార్వత్రిక ఎన్నికల్లో ఆమె సంజయ్ గాంధీ నియోజకవర్గం అయిన అమేథీ నుంచి పోటీ చేశారు. ఆ తర్వాత 1989లో యూపీలోని పిలిభిత్ నుంచి ఎన్నికల్లో పోటీ చేశారు.

సోనియా గాంధీ:

సోనియా గాంధీ తన భర్త రాజీవ్ గాంధీ హత్య తర్వాత చాలా సంవత్సరాల తర్వాత రాజకీయాల్లోకి ప్రవేశించారు. 1997లో కాంగ్రెస్ ప్రాథమిక సభ్యత్వం తీసుకున్నారు. దీని తరువాత, ఆమె 1998 సంవత్సరంలో కాంగ్రెస్ అధ్యక్షురాలిగా ఎన్నికయ్యారు. 1999లో కాంగ్రెస్ కంచుకోటగా భావించే అమేథీ లోక్‌సభ స్థానం నుంచి ఆమె తొలిసారి ప్రత్యక్ష ఎన్నికల్లో పోటీ చేశారు. అమేథీ తర్వాత, 2004లో అమేథీ సీటును వదిలి రాయ్‌బరేలీ నుంచి ఎన్నికల్లో పోటీ చేశారు. ఆమె ఈ స్థానం నుంచి 2024 వరకు పార్లమెంటు సభ్యురాలిగా కొనసాగారు.

వరుణ్ గాంధీ:

గాంధీ కుటుంబ సభ్యులు, సంజయ్ గాంధీ కుమారుడు వరుణ్ గాంధీ 2004 సంవత్సరంలో తన రాజకీయ జీవితాన్ని ప్రారంభించారు. 2004లో పిలిభిత్ లోక్‌సభ స్థానం నుంచి ఎన్నికల్లో పోటీ చేసి విజయం సాధించారు. ఆ తర్వాత యూపీలోని సుల్తాన్‌పూర్ లోక్‌సభ స్థానం నుంచి గెలుపొందిన ఆయన పార్లమెంట్‌కు చేరుకున్నారు. 2024 సార్వత్రిక ఎన్నికల్లో సుల్తాన్‌పూర్‌ నుంచి ఆయన టికెట్‌ను బీజేపీ రద్దు చేసింది.

రాహుల్ గాంధీ:

రాహుల్ గాంధీ తన మొదటి ఎన్నికల్లో 2004లో కాంగ్రెస్ సంప్రదాయ స్థానమైన అమేథీ నుంచి పోటీ చేశారు. అతను ఈ స్థానం నుండి మూడుసార్లు ఎంపీగా ఎన్నికయ్యారు. కానీ 2019 సార్వత్రిక ఎన్నికల్లో బీజేపీ అభ్యర్థి స్మృతి ఇరానీ చేతిలో ఓడిపోయారు. 2019 లో అతను అమేథీ, వాయనాడ్ నుండి ఎన్నికలలో పోటీ చేశారు. అతను అమేథీ నుండి ఓడిపోయారు. కానీ వయనాడ్ నుండి ఎన్నికలలో రికార్డు సంఖ్యలో ఓట్లతో గెలిచారు. 2024 సార్వత్రిక ఎన్నికల్లో రాహుల్ గాంధీ యూపీలోని రాయ్‌బరేలీ తోపాటు వాయనాడ్ లోక్‌సభ స్థానాల నుండి పోటీ చేసి రెండు స్థానాలను గెలుచుకున్నారు. ప్రస్తుతం లోక్‌సభలో ప్రతిపక్ష నేతగా ఉన్నారు.

తాజాగా ప్రియాంక గాంధీ:

2024 ఎన్నికల నాటికి ప్రధాని మోదీకి ధీటుగా సమాధానం ఇవ్వగల బలమైన నేతగా ప్రియాంక మారారు. మాటల మాంత్రికురాలిగా, వ్యూహకర్తగా, ప్రజలను ఆకర్షించే ప్రసంగాలతో ప్రచారంలో తనదైన ముద్ర వేశారు. ఈ క్రమంలోనే కేరళ వయనాడ్‌ ఉపఎన్నిక బరిలో నిలిచారు. తన సోదరుడు రాహుల్ గాంధీ 3.64 లక్షల ఓట్ల మెజార్టీని దాటేసి చారిత్రాత్మక విజయాన్ని అందుకున్నారు.

మరిన్ని జాతీయ వార్తల కోసం ఇక్కడ క్లిక్ చేయండి..