ఐటీ ఉద్యోగినికి వేధింపులు.. గూగుల్‌లో ఆమె పేరుపై పోర్న్ సైట్స్..!

హైదరాబాద్‌‌కు చెందిన ఓ సాఫ్ట్ వేర్ ఉద్యోగిని సైబర్ మోసగాళ్ల వలలో పడింది. ఆమెను టార్గెట్ చేయడంతో.. మానసిక ఒత్తిడికి గురవుతోంది. ఎవరో తెలుసుకునే పనిలో సైబర్ క్రైం పోలీసులను ఆశ్రయించింది. అయినా ఫలితం లేకపోవడంతో ఏం చేయాలో తెలియక అయోమయంలో పడింది. ఉప్పల్‌‌కు చెందిన 33 ఏళ్ల ఒక మహిళ ఐటీ కంపెనీలో పనిచేస్తోంది. ఎప్పటి లాగే ఆఫీసుకు వెళ్లిన తనకు ఓ చేదు అనుభవం ఎదురైంది. తన తోటి ఉద్యోగిని చెప్పిన మాట విని షాక్‌కు గురైంది. ఆమె పేరును గూగుల్‌లో సెర్చ్ చేసిన వెంటనే.. ఫోర్న్ వెబ్ సైట్ లింకులు ఓపెన్ అవుతున్నాయని తోటి ఉద్యోగిని చెప్పడంతో.. ఒక్కసారిగా ఉలిక్కిపడింది. దీనిపై వెంటనే సైబర్ క్రైమ్ పోలీసులకు ఫిర్యాదు చేసింది. కేసు నమోదు చేసుకున్న వారు చర్యలు తీసుకుంటామని చెప్పినా.. ఎలాంటి ఫలితం లేకుండా పోయింది.

గుట్టుగా ఉన్నప్పుడే సమస్యను పరిష్కరించుకోవాలి అనుకుంది. కాని ఆఫీసులో అందరికి తెలిసిపోయింది. సహ ఉద్యోగులు తనను హేళన చేయడం మొదలు పెట్టారు. దీంతొ కెరీర్‌ను బలి తీసుకుంది. ఆఫీసుకు వెళ్లలేక జాబ్‌కి రిజైన్ చేసింది. తనకు ఎదురైన పరిస్థితిపై గూగుల్‌కు నోటీసులు పంపింది. వారు కూడా తామేం చేయలేమంటూ చేతులెత్తేశారు. అయితే తన పేరును సెర్చ్ చేసిన వెంటనే ఫోర్న్ సైట్లు ఓపెన్ కావడం పై సదరు సైట్ల నిర్వాహకులకు.. వెబ్ హోస్ట్ ప్రొవైడర్లకు నోటీసులు పంపించారు. అయితే సైట్ల నుంచి తన పేరును తొలగించడం తమ చేతుల్లో లేదని వారు కూడా చేతులు ఎత్తేశారు. దీంతో సుమారు రెండు సంవత్సరాలుగా ఆమె ఈ పరిస్థితిని అనుభవిస్తోంది. ఇప్పటికైనా ఇలాంటి ఘటనలు చోటుచేసుకోకుండా సైబర్ క్రైం పోలీసులు, వెబ్ సైట్ల నిర్వాహకులు చర్యలు తీసుకుంటే బాగుంటుందని బాధితులు అభిప్రాయపడుతున్నారు.