అన్నంత పనీ చేసిన ట్రంప్.. హెచ్-1బీ వీసాల ప్రక్రియ తాత్కాలికంగా రద్దు

అమెరికా ప్రెసిడెంట్ ట్రంప్ అన్నంత పనీ చేశారు. హెచ్-1 బీ వీసా జారీ ప్రక్రియను ‘సంస్కరించే యత్నం’లోభాగంగా ఈ సంవత్సరాంతం వరకు దీనిని తాత్కాలికంగా రద్దు చేస్తున్నట్టు ప్రకటించారు. మెరిట్ ఆధారిత ఇమ్మిగ్రేషన్ కి ‘స్వాగతం’ పలకాలని (అనుమతించాలని) తమ అధికారులను కోరారు. ఇతర వర్క్ వీసాలకు కూడా  ఈ రద్దు ప్రక్రియ వర్తిస్తుంది. ఇదే విషయాన్ని వైట్ హౌస్ ప్రకటించింది. అత్యధిక నైపుణ్యం గల సిబ్బందికి ప్రాధాన్యమిస్తూ.. అమెరికన్ ఉద్యోగులను పరిరక్షిస్తూ.. ఇందుకు ఉద్దేశించిన ఇమ్మిగ్రేషన్ వ్యవస్థను సంస్కరిస్తున్నట్టు ట్రంప్ ప్రభుత్వం పేర్కొంది. ఈ రిఫామ్స్ కింద హెచ్-1 బీ ప్రోగ్రామ్.. హయ్యెస్ట్ స్కిల్డ్ సిబ్బందిని, అత్యధిక వేతనాలతో ఆహ్వానించనుంది. అలాగే దేశంలో తక్కువ వేతనాలతో (నాన్-స్కిల్డ్) విదేశీ ఉద్యోగులను నియమించుకోవడానికి యజమానులకు అవకాశమిస్తున్న నిబంధనల్లోని లొసుగులను కూడా తొలగించాలని ట్రంప్ నిర్ణయించారు. ఇవన్నీ ఎప్పుడో క్లింటన్ కాలం నాటి నాలుగంచెల రూల్స్ అని, వీటిని మార్చివేస్తున్నామని ఆయన అన్నారు. హెచ్-1 బీ ఉద్యోగుల వేతనాల ప్రక్రియను కూడా సంస్కరించనున్నారు.

కాగా-వర్క్ వీసాల తాత్కాలిక రద్దు వల్ల అమెరికాలో సుమారు 5.25 లక్షల మంది జాబ్స్ కోల్పోతారని అంచనా. హెచ్-1 బీ, హెచ్-4,హెచ్-2 బీ వీసా, జె అండ్ ఎల్ వీసాలతో బాటు పలు నాన్-ఇమ్మిగ్రేషన్ వీసాలను ఈ ఏడాది ఆఖరువరకు నిలిపివేయనున్నారు. అమెరికన్లు మళ్ళీ జాబ్స్ పొందేందుకు వీలుగా ట్రంప్ ఈ చర్యలు తీసుకున్నారని అధికారవర్గాలు పేర్కొన్నాయి. కరోనా వైరస్ కారణంగా దేశం ఆర్థికంగా తీవ్రంగా నష్టపోయిందని ఈ వర్గాలు అభిప్రాయపడ్డాయి.