స్పెయిన్‌లోనే కరోనా తొలి కేసు..?

యావత్ మానవజాతిని వణికిస్తున్న కరోనా వైరస్ పుట్టినిల్లు చైనాలోని వుహాన్ నగరం. ఇది ప్రపంచవ్యాప్తంగా జనమెరిగిన సత్యం. అయితే తాజాగా బార్సిలోనా వర్సిటీ శాస్త్రవేత్తలు మాత్రం మరో వాదనను వినిపిస్తున్నారు. ఆ వైరస్ మహమ్మారిని మొట్టమొదటిగా గుర్తించింది స్పెయిన్‌లో అని అంటున్నారు. ఇటీవల చేసిన ఓ పరిశోధనలో తమకు ఈ విషయం తెలిసిందన్నారు.

గతేడాది మార్చి 12న సేకరించిన బార్సిలోనాలోని వ్యర్థజలాల నమూనాలతో వ్యాధికి కారణమైన వైరస్ ఉనికిని కనుగొన్నామని పరిశోధకులు తెలిపారు. ఇక చైనా డిసెంబర్ 2019లో డబ్ల్యూహెచ్ఓకు కరోనా వైరస్ గురించి వివరాలను తెలిపిన సంగతి విదితమే. ఆ తర్వాత ప్రపంచమంతా ఈ వైరస్ వ్యాప్తి చెంది ఎంతోమంది ప్రాణాలను హరించింది.

ఇదిలా ఉంటే స్పెయిన్ పరిశోధకులు.. ఆ దేశంలోని వివిధ నగరాల నుంచి మురుగునీటి నమూనాలను 2018 జనవరి- 2019 డిసెంబర్ మధ్య వేర్వేరు తేదీల్లో సేకరించగా.. వీటిల్లో కరోనా వైరస్‌కు సంబంధించిన జన్యువులను గుర్తించారు. ఆ సాంపిల్స్‌ను 2019 మార్చి 12న సేకరించగా.. దీనిపై సమీక్ష ఇంకా జరగాల్సి ఉందని చెబుతున్నారు. మరిన్ని నమూనాలను సేకరించి పరిశోధనలు విస్తృతంగా కొనసాగించాల్సిన అవసరం ఉందన్నారు.

ఇది చదవండి: ఇంట్లోనే స్వీయ నిర్బంధం.. తీసుకోవాల్సిన జాగ్రత్తలు.. ఇలా ఉంటేనే సేఫ్..