మీరూ 2026లో జాబ్ కొట్టాలంటే.. ఈ నైపుణ్యాలు అలవర్చుకోండి!
చేతిలో ఎన్ని డిగ్రీలు ఉన్నా కొందరికి సర్కార్ కొలువు అందనంత దూరంలో ఉంటుంది. ఇందుకు కారణాలు విజేతల లిస్టులో ఉన్న అలవాట్లు మీలో లేకపోవడమే. నిజానికి కోరిన కొలువు దక్కించుకుని విజయం సాధించాలంటే కొన్ని ప్రత్యేక స్కిల్స్ మీలో తప్పక బిల్డ్ చేసుకోవాలి. అవేంటో ఇక్కడ తెలుసుకుందాం..
Updated on: Jan 01, 2026 | 6:28 AM
ఎందరికో సర్కార్ కొలువు కొట్టాలనేది జీవితాశయం. అయితే కొందరికే ఇది సాధ్యం అవుతుంది. అందుకు కారణాలు అనేకం. ముఖ్యంగా ఈ పోటీ ప్రపంచంలో ఉద్యోగం సాధించాలంటే కేవలం చేతిలో డిగ్రీలు మాత్రమే ఉంటే సరిపోదు. మారుతున్న అవసరాలకు అనుగుణంగా ఎప్పటికప్పుడు అప్డేట్ అవుతుండాలి. సాంకేతికతతో పాటు వ్యక్తిగత నైపుణ్యాలను అంటే సాఫ్ట్ స్కిల్స్ కూడా పెంపొందించుకోవాలి. ఈ ఏడాది కెరీర్లో రాణించాలనుకునే వారు ఈ కింది నైపుణ్యాలతో మీ బంగారు భవిష్యత్తుకు బాటలు వేసుకోవచ్చు. అవేంటో ఇక్కడ తెలుసుకుందాం..
నిరంతర అభ్యాసం
నేర్చుకోవడం అనేది కేవలం చదువుతో మాత్రమే ఆగిపోకూడదు. నిజానికి ఇది జీవితకాలమంతా కొనసాగించవల్సిన ప్రక్రియ. అయితే ఉద్యోగం సాధించాలనే పట్టుదల ఉన్నవారికి ఈ లక్షణం ఒకింత ఎక్కువగానే ఉండాలి. ఎందుకంటే మారుతున్న పారిశ్రామిక అవసరాలకు అనుగుణంగా ఎప్పటికప్పుడు స్కిల్స్ కూడా నిరంతరం అభివృద్ధి చేసుకుంటూ ఉండాలి. ప్రస్తుతం ప్రపంచ వ్యాప్తంగా ఆర్టిఫిషియల్ ఇంటెలిజెన్స్, డేటా అనలిటిక్స్ వంటి సాంకేతికతలు వేగంగా విస్తరిస్తున్నాయి. ఈ క్రమంలో మార్కెట్ ట్రెండ్స్ను బట్టి స్కిల్స్ అప్డేట్ చేసుకుంటూ కొత్త విషయాలను నేర్చుకోవడం ద్వారా కెరీర్లో ఎదగగలరు.
కొత్తదనాన్ని ఆహ్వానించడం
మారుతున్న ప్రపంచ పోకడలకు అనుగుణంగా కొత్త ఆలోచనలు చేసే వారికే కంపెనీలు ప్రాధాన్యత ఇస్తున్నాయి. సృజనాత్మకతను, కొత్త విషయాల పట్ల మీకున్న ఆసక్తిని ఇంటర్వ్యూలలో ఉదాహరణలతో సహా వివరించడం అలవాటు చేసుకోవాలి. ఇది మీ కల నేరవేర్చడంలో ఎంతో తోడ్పడుతుంది.
ఉన్నత లక్ష్యాల పట్ల పట్టుదల
ఎదగాలనే కోరిక ఉంటే సరిపోదు అందుకు నిరంతరం కష్టపడాలి. పట్టుదలతో తగిన కృషి చేయాలి. చిన్న చిన్న లక్ష్యాలను సాధించుకుంటూ గమ్యం వైపు ముందుకు సాగాలి. అందుకు ఓపిక, పట్టుదల, అవకాశాలను అందిపుచ్చుకునే నేర్పు చాలా అవసరం. ఈ లక్షణాలు మిమ్మల్ని ఇతరుల కంటే ముందుంచుతాయి.
విశ్లేషణాత్మక ఆలోచన
ఏ సమస్యనైనా ఒకే కోణంలో కాకుండా, విభిన్న కోణాల్లో ఆలోచించడం అలవర్చుకోవాలి. ఎదుటివారి అభిప్రాయాలను కూడా పరిగణనలోకి తీసుకోవాలి. తద్వారా సరైన పరిష్కారాలు దొరుకుతాయి. మొండి వైఖరి తగదు. అయితే సాధించే వరకు వదలని అలవాటు మీ కెరీర్ ఎదుగుదలకు దోహదపడుతుంది.
లీడర్షిప్ లక్షణాలు, టీమ్ వర్క్
ఉద్యోగంలో భాగంగా నలుగురితో కలిసి పనిచేసే గుణం ప్రతి ఒక్కరికీ ఉండాలి. మీ అభిప్రాయాలను ఎవరైనా వ్యతిరేకించినప్పుడు కోపం ప్రదర్శించకూడదు. అందరినీ కలుపుకుపోయే ధోరణి అలవాటు చేసుకోవాలి. అప్పుడే మీరు సమర్థవంతమైన టీమ్ లీడర్గా రాణించగలరు. కాబట్టి ఉద్యోగ లక్ష్య సాధనతో సాంకేతిక నైపుణ్యాలతో పాటు సాఫ్ట్ స్కిల్స్ కూడా అలవర్చుకుంటే ఏ రంగంలోనైనా సులభంగా రాణించగలరు.
మరిన్ని విద్యా, ఉద్యోగ కథనాల కోసం క్లిక్ చేయండి.
