ఫ్రాంక్లిన్ టెంపుల్టన్ అనూహ్య నిర్ణయం… ఇన్వెస్టర్ల రూ. 30,800 కోట్ల ‘లాక్ డౌన్’ !
అమెరికాలోని ఫ్రాంక్లిన్ టెంపుల్టన్ అనూహ్య నిర్ణయం తీసుకుంది. ఏప్రిల్ 23 నుంచి ఇండియాలోని ఆరు ఫండ్లను నిలిపివేస్తున్నట్టు ఈ సంస్థ ప్రకటించింది. దీంతో ఇన్వెస్టర్లకు సంబంధించిన రూ. 30,800 కోట్లకు ‘లాక్’ పడినట్టే ! (స్తంభించినట్టే).. కరోనా వైరస్ కారణంగా తీవ్రమైన మార్కెట్ ఒడిదుడుకులు, లిక్విడిటీ నేపథ్యంలో తామీ నిర్ణయం తీసుకున్నట్టు ఈ సంస్థ తెలిపింది. కరోనా ప్రభావంతో అసలే ప్రపంచ వ్యాప్తంగా ఫైనాన్షియల్ మార్కెట్లు తీవ్రంగా సతమవుతున్న తరుణంలో ఈ సంస్థ ఈ నిర్ణయం తీసుకోవడం […]
అమెరికాలోని ఫ్రాంక్లిన్ టెంపుల్టన్ అనూహ్య నిర్ణయం తీసుకుంది. ఏప్రిల్ 23 నుంచి ఇండియాలోని ఆరు ఫండ్లను నిలిపివేస్తున్నట్టు ఈ సంస్థ ప్రకటించింది. దీంతో ఇన్వెస్టర్లకు సంబంధించిన రూ. 30,800 కోట్లకు ‘లాక్’ పడినట్టే ! (స్తంభించినట్టే).. కరోనా వైరస్ కారణంగా తీవ్రమైన మార్కెట్ ఒడిదుడుకులు, లిక్విడిటీ నేపథ్యంలో తామీ నిర్ణయం తీసుకున్నట్టు ఈ సంస్థ తెలిపింది. కరోనా ప్రభావంతో అసలే ప్రపంచ వ్యాప్తంగా ఫైనాన్షియల్ మార్కెట్లు తీవ్రంగా సతమవుతున్న తరుణంలో ఈ సంస్థ ఈ నిర్ణయం తీసుకోవడం ఇన్వెస్టర్లను భారీ షాక్ కి గురి చేసింది. ఫండ్లకు కవాటాలు మూసివేసిన ఫలితంగా పెట్టుబడిదారులు ఈ నెల 23 తరువాత నుంచి కొత్తగా కొనుగోళ్లు చేయలేరు. మరో విధంగా చెప్పాలంటే ఈ కటాఫ్ డేట్ అనంతరం ఎలాంటి ఆర్ధిక లావాదేవీలూ ప్రాసెస్ కాబోవు. ప్రస్తుత ఇన్వెస్టర్ల విషయంలో వీరి సొమ్ము మెచ్యురిటీ తీరేవరకు ఈ ఫండ్లలోనే ‘లాక్’ అయి ఉంటాయి.
బ్యాంకు డిపాజిట్లు, ఈజీ లిక్విడిటీతో పోల్చితే ఈ విధమైన ఫండ్లు ఎక్కువ రిటర్నులను అందజేస్తున్నందున తమ ‘హై ఇన్ కమ్ ఎసెట్ ఎలోకేషన్’ లో భాగంగా బడా పెట్టుబడిదారులు, కార్పొరేట్, రిటైల్ ఇన్వెస్టర్లు సాధారణంగా డెట్ ఫండ్స్ లో పెట్టుబడి పెడతారు. ప్రస్తుతం మూసివేస్తున్న ఫండ్స్ లో ‘ఫ్రాంక్లిన్ ఇండియా లో (low) డ్యూరేషన్ ఫండ్, ఫ్రాంక్లిన్ ఇండియా డైనమిక్ అక్రూవల్ ఫండ్, ఫ్రాంక్లిన్ ఇండియా క్రెడిట్ రిస్క్ ఫండ్, ఫ్రాంక్లిన్ ఇండియా షార్ట్ టర్మ్ ఇన్ కమ్ ప్లాన్, ఫ్రాంక్లిన్ ఇండియా షార్ట్ బాండ్ ఫండ్, ఫ్రాంక్లిన్ ఇండియా ఇన్ కమ్ ఆపర్త్యునిటీస్ ఫండ్’ ఉన్నాయి.
ఫండ్ల నిలిపివేత వార్త దేశ మ్యూచువల్ ఫండ్స్ ఇండస్ట్రీకి చిక్కులు తెస్తాయని నిపుణులు భావిస్తున్నారు. కరోనా సంక్షోభం నేపథ్యంలో ఒక ముఖ్యమైన సంస్థ ఇలా డెట్ పథకాలను నిలిపివేయడం ఇదే మొట్ట మొదటిసారి. లాక్ డౌన్ ప్రపంచ ఆర్ధిక వ్యవస్థను ఛిన్నాభిన్నం చేయడంతో రుణ చెల్లింపులపై తీవ్ర సందిగ్ధత నెలకొంది. ఫలితంగా ఇన్వెస్టర్లలో ఆందోళన పెరిగిపోయింది. డెట్ ఫండ్ పథకాల నుంచి తప్పుకోవడానికి వారు ప్రయత్నించారు. గత నెల ఏకంగా రూ. 1.94 లక్షల కోట్లు డెట్ ఫండ్ల నుంచి బయటికి వెళ్లాయి. ఈ మార్కెట్లలో లిక్విడిటీ కేపబిలిటీ పడిపోయిన దృష్ట్యా.. బాండ్ల అమ్మకాలు నిలిచిపోయాయి. రిజర్వ్ బ్యాంకు లాంగ్ టర్మ్ రెపో ఆపరేషన్స్ నిర్వహణ వంటి కీలక చర్యలు తీసుకున్నప్పటికీ ఫలితం లేకపోవడంతో ఫ్రాంక్లిన్ టెంపుల్టన్ ఈ అనూహ్య నిర్ణయం తీసుకొంది.
