ఓవైపు యుద్ధం.. మరోవైపు గోల్డ్‌, సిల్వర్‌ ETFల జోరు! ఇప్పుడు పెట్టుబడి మంచిదేనా?

మధ్యప్రాచ్యంలో పెరుగుతున్న భౌగోళిక రాజకీయ ఉద్రిక్తతలు ప్రపంచ ఆర్థిక మార్కెట్లపై ప్రభావం చూపుతున్నాయి. యుద్ధం లేదా రాజకీయ అనిశ్చితి పెరిగినప్పుడు పెట్టుబడిదారులు సాధారణంగా సురక్షిత పెట్టుబడుల వైపు మొగ్గు చూపుతారు. అందుకే బంగారం, వెండి వంటి విలువైన లోహాల ధరలు ఇటీవలి రోజుల్లో గణనీయంగా పెరిగాయి. ఈ పెరుగుదలతో బంగారం, వెండి ఆధారిత ఎక్స్ఛేంజ్ ట్రేడెడ్ ఫండ్స్ (ETFలు) కూడా మంచి లాభాలను చూపుతున్నాయి. కొన్ని ETFల విలువ కొద్ది రోజుల్లోనే 5 నుండి 10 శాతం వరకు పెరగడం పెట్టుబడిదారుల దృష్టిని ఆకర్షిస్తోంది.

సాధారణంగా యుద్ధ పరిస్థితులు లేదా ఆర్థిక అనిశ్చితి ఉన్నప్పుడు స్టాక్ మార్కెట్లు తీవ్ర హెచ్చుతగ్గులకు గురవుతాయి. అటువంటి పరిస్థితుల్లో పెట్టుబడిదారులు తమ డబ్బును రక్షించుకోవడానికి బంగారం, వెండి వంటి సేఫ్ హెవెన్ ఆస్తులలో పెట్టుబడి పెడతారు. దీనివల్ల వాటి డిమాండ్ పెరిగి ధరలు కూడా ఎగసిపడతాయి. ఈ పరిస్థితుల ప్రభావం ETFలలో కూడా స్పష్టంగా కనిపిస్తోంది. ETFలు బంగారం లేదా వెండి ధరలను నేరుగా అనుసరించే పెట్టుబడి సాధనాలు. అంతర్జాతీయ మార్కెట్లో లోహాల ధరలు పెరిగితే, వాటి ETFల నికర ఆస్తి విలువ (NAV) కూడా పెరుగుతుంది.

ఇటీవల విడుదలైన డేటా ప్రకారం వెండి ETFలు ఎక్కువ లాభాలను నమోదు చేశాయి. UTI సిల్వర్ ETF సుమారు 10.87 శాతం, టాటా సిల్వర్ ETF 10.80 శాతం, DSP సిల్వర్ ETF దాదాపు 8.81 శాతం పెరిగాయి. వెండి ధరలు సాధారణంగా బంగారం కంటే వేగంగా మారుతుండటంతో ETFల లాభాలు కూడా ఎక్కువగా కనిపిస్తున్నాయి. అదే సమయంలో గోల్డ్ ETFలు కూడా స్థిరమైన వృద్ధిని నమోదు చేశాయి. క్వాంటమ్ గోల్డ్ ఫండ్ ETF సుమారు 5.31 శాతం పెరిగితే, HDFC గోల్డ్ ETF, కోటక్ గోల్డ్ ETF దాదాపు 5.29 శాతం లాభాలను సాధించాయి. నిపుణుల అభిప్రాయం ప్రకారం.. తక్షణ లాభాల కోసం కాకుండా దీర్ఘకాల పెట్టుబడి దృష్టితో గోల్డ్ ETFలు స్థిరమైన ఎంపికగా పరిగణించవచ్చు. అయితే మార్కెట్ పరిస్థితులను గమనిస్తూ దశలవారీగా పెట్టుబడి పెట్టడం మంచిదని ఆర్థిక నిపుణులు సూచిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి