PPF: రూ.2.26 కోట్లు రావాలంటే.. ఏ వయసు నుంచి, ఎంత పెట్టుబడి పెట్టాలి?

చిన్న వయస్సులోనే పొదుపు ప్రారంభిస్తే, చక్రవడ్డీ శక్తి ఎంత పెద్ద సంపదను సృష్టించగలదో పబ్లిక్ ప్రావిడెంట్ ఫండ్ (PPF) మరోసారి నిరూపిస్తోంది. ముఖ్యంగా 25 ఏళ్ల వయస్సు నుంచే ప్రతి సంవత్సరం రూ.1.5 లక్షలు క్రమం తప్పకుండా పెట్టుబడి పెడితే, పదవీ విరమణ సమయానికి కోట్ల రూపాయల పన్ను రహిత నిధిని నిర్మించుకోవచ్చని ఆర్థిక నిపుణులు చెబుతున్నారు. ప్రస్తుతం RBI వడ్డీ రేట్ల కోతల నేపథ్యంలో బ్యాంకు ఫిక్స్‌డ్ డిపాజిట్‌లపై రాబడులు తగ్గుతున్నాయి. ఈ పరిస్థితుల్లో PPFపై లభిస్తున్న 7.1 శాతం పన్ను రహిత వడ్డీ పెట్టుబడిదారులను ఆకర్షిస్తోంది.

ప్రభుత్వం త్రైమాసికాల వారీగా ఈ వడ్డీ రేటును సమీక్షిస్తుంది. PPF ఖాతాకు 15 ఏళ్ల లాక్-ఇన్ పీరియడ్ ఉండగా, తరువాత 5 సంవత్సరాల చొప్పున పొడిగించుకునే అవకాశం ఉంది. ఒక వ్యక్తి 25 ఏళ్ల వయస్సు నుంచి 60 ఏళ్ల వరకు ప్రతి సంవత్సరం రూ.1.5 లక్షలు పెట్టుబడి పెడితే, మొత్తం పెట్టుబడి రూ.52.5 లక్షలు అవుతుంది. ప్రస్తుత 7.1 శాతం వడ్డీ రేటు ప్రకారం, సుమారు రూ.1.74 కోట్ల వడ్డీ లభించి, మొత్తం నిధి రూ.2.26 కోట్లకు చేరే అవకాశం ఉంది. ఈ మొత్తం పూర్తిగా పన్ను రహితం కావడం ప్రత్యేక ఆకర్షణగా మారింది.

అలాగే 15 సంవత్సరాలు నిరంతరంగా పెట్టుబడి పెడితే 40 ఏళ్ల వయస్సుకే సుమారు రూ.40.68 లక్షలు కూడబెట్టుకోవచ్చు. ఇందులో రూ.22.5 లక్షలు పెట్టుబడి కాగా, రూ.18.18 లక్షలు వడ్డీ రూపంలో లభిస్తాయి. అదే 50 ఏళ్ల వరకు కొనసాగిస్తే, మొత్తం నిధి రూ.1.03 కోట్లకు పెరిగే అవకాశం ఉంది. పీపీఎఫ్‌ను సురక్షిత పెట్టుబడిగా భావించడానికి ప్రధాన కారణం ఇది మార్కెట్ ఒడిదుడుకులకు లోబడకపోవడమే. స్టాక్ మార్కెట్‌ల మాదిరిగా ప్రమాదం లేకుండా స్థిరమైన రాబడిని అందిస్తుంది. ముఖ్యంగా పదవీ విరమణ ప్రణాళిక రూపొందించుకునే వారికి ఇది బలమైన దీర్ఘకాలిక పెట్టుబడి మార్గంగా నిపుణులు సూచిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి