కొత్త అద్దె నిబంధనలు నిజమేనా? మోడల్‌ టెనెన్సీ యాక్ట్‌ అంటే ఏంటి?

ఇటీవల సోషల్ మీడియాలో 2026 నుంచి కొత్త అద్దె నిబంధనలు అమల్లోకి వచ్చాయి అనే పోస్టులు విస్తృతంగా ప్రచారం అవుతున్నాయి. అయితే వాస్తవానికి ఇవి కొత్తగా ప్రవేశపెట్టిన నిబంధనలు కావని, ఇప్పటికే 2021లో కేంద్రం ఆమోదించిన మోడల్ టెనెన్సీ యాక్ట్‌ 2021 ఆధారంగా ఉన్న మార్గదర్శకాలేనని నిపుణులు స్పష్టం చేస్తున్నారు. ఈ చట్టం భారత అద్దె మార్కెట్‌ను క్రమబద్ధీకరించడానికి రూపొందించబడిన నమూనా మాత్రమే. ఇది దేశవ్యాప్తంగా స్వయంచాలకంగా అమల్లోకి రాదు. రాష్ట్ర ప్రభుత్వాలు దీనిని పూర్తిగా లేదా మార్పులతో అమలు చేయాలా అనే విషయంలో స్వేచ్ఛ కలిగి ఉంటాయి. అందువల్ల, ప్రతి రాష్ట్రంలో అద్దె నిబంధనలు భిన్నంగా ఉండే అవకాశం ఉంది.

వైరల్ అవుతున్న ముఖ్య నిబంధనలలో రెండు నెలల అద్దెకు సెక్యూరిటీ డిపాజిట్ పరిమితం, తప్పనిసరి రిజిస్ట్రేషన్, అద్దె పెంపుపై నియంత్రణ వంటి అంశాలు ఉన్నాయి. కానీ ఇవి అన్ని రాష్ట్రాల్లో అమలులోకి రావాలంటే ఆయా రాష్ట్రాలు ఈ చట్టాన్ని స్వీకరించాల్సి ఉంటుంది. ఈ చట్రం అమల్లోకి వస్తే అద్దె ఒప్పందాలు పూర్తిగా లిఖితపూర్వకంగా ఉండాలి. అద్దెదారులు, ఇంటి యజమానుల మధ్య వివాదాలు తగ్గించేందుకు ప్రత్యేక అద్దె కోర్టులు ఏర్పాటు చేసే ప్రతిపాదన కూడా ఉంది. అదేవిధంగా ఇంటి యజమానులు ముందస్తు నోటీసు లేకుండా ఇంట్లోకి ప్రవేశించలేరు, అద్దెదారులను ఖాళీ చేయించే ప్రక్రియకు స్పష్టమైన నియమాలు ఉంటాయి.

భారతదేశంలో అద్దె వ్యవస్థ ఇప్పటికీ అనధికారికంగా నడుస్తున్న నేపథ్యంలో ఈ చట్టం పారదర్శకతను పెంచే ప్రయత్నంగా భావించబడుతోంది. అయితే ఇది పూర్తిగా అమల్లోకి రావాలంటే రాష్ట్రాల చర్యలు కీలకం. ప్రస్తుతం తమిళనాడు, ఉత్తర్‌ప్రదేశ్‌, అస్సాం వంటి కొన్ని రాష్ట్రాలు మాత్రమే తమ సొంత మార్పులతో ఈ చట్రాన్ని అమలు చేసే దిశగా ముందుకు సాగాయి. మొత్తంగా సోషల్ మీడియాలో ప్రచారం అవుతున్నట్లుగా దేశవ్యాప్తంగా ఒకేసారి కొత్త అద్దె నిబంధనలు అమల్లోకి వచ్చినట్లు భావించడం సరైంది కాదని నిపుణులు హెచ్చరిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి