Indian Railways: రైలు ప్రయాణికులకు గుడ్న్యూస్.. రైల్వే కీలక నిర్ణయం.. ఆ టికెట్ ఛార్జీలు తగ్గింపు
ఇండియన్ రైల్వే ప్రతి రోజు లక్షలాది మంది ప్రయాణికులను గమ్యస్థానాలకు చేర్చుతుంది. ఇక ప్రయాణికుల కోసం భారత రైల్వే ఎన్నో సదుపాయాలను కల్పిస్తోంది..
Updated on: Mar 22, 2023 | 3:23 PM
ఇండియన్ రైల్వే ప్రతి రోజు లక్షలాది మంది ప్రయాణికులను గమ్యస్థానాలకు చేర్చుతుంది. ఇక ప్రయాణికుల కోసం భారత రైల్వే ఎన్నో సదుపాయాలను కల్పిస్తోంది. రైల్వేలు ఏసీ-3 ఎకానమీ క్లాస్ ఛార్జీలను తగ్గించాయి. ఇప్పుడు రైలులోని ఏసీ త్రీ ఎకానమీ కోచ్లో ప్రయాణించడం మళ్లీ చౌకగా మారింది. రైల్వే బోర్డు జారీ చేసిన సర్క్యులర్ ప్రకారం.. పాత వ్యవస్థనే పునరుద్ధరించాలని నిర్ణయించారు. ఈ నిర్ణయం బుధవారం నుంచి అమల్లోకి వచ్చింది. రైల్వే అధికారులు తెలిపిన ప్రకారం, ఆన్లైన్లో కౌంటర్లో టిక్కెట్లు బుక్ చేసుకున్న ప్రయాణీకులకు ముందస్తుగా బుక్ చేసిన టిక్కెట్ల కోసం అదనపు డబ్బు తిరిగి ఇవ్వబడుతుంది.
కొత్త ఆర్డర్ ప్రకారం.. ఈ ఎకానమీ క్లాస్ సీటు ధర సాధారణ ఏసీ-3 నుండి తగ్గించబడింది. అయితే, గతేడాది రైల్వే బోర్డు ఏసీ 3 ఎకానమీ కోచ్, ఏసీ 3 కోచ్ల ఛార్జీలను సమానంగా ఉంచుతూ సర్క్యులర్ జారీ చేసింది. కొత్త సర్క్యులర్ ప్రకారం.. ఛార్జీల తగ్గింపుతో ఎకానమీ కోచ్లో దుప్పట్లు, బెడ్షీట్లను అందించే విధానం కొనసాగుతుంది.
ఎకానమీ ఏసీ-3 కోచ్ చౌకైన ఎయిర్ కండీషనర్ రైలు ప్రయాణ సేవ. స్లీపర్ క్లాస్ ప్రయాణికులకు ‘ఉత్తమమైన, చౌకైన ఏసీ ప్రయాణం’ అందించడానికి ఎకానమీ ఏసీ-3 కోచ్ను ప్రవేశపెట్టారు. ఈ కోచ్ల ధర సాధారణ ఏసీ-3 సర్వీస్ కంటే 6-7 శాతం తక్కువ.
ఏసీ త్రీ కోచ్లలో బెర్త్ల సంఖ్య 72 కాగా, ఏసీ త్రీ ఎకానమీ బెర్త్ల సంఖ్య 80గా ఉంది. ఏసీ-3 ఎకానమీ కోచ్ బెర్త్ వెడల్పు ఏసీ 3 కోచ్ కంటే కొంచెం తక్కువగా ఉన్నందున ఇది సాధ్యమవుతుంది. ‘ఎకానమీ’ ఏసీ-3 కోచ్ ద్వారా తొలి ఏడాదిలోనే రైల్వేశాఖ రూ.231 కోట్లు ఆర్జించింది. గణాంకాల ప్రకారం.. ఏప్రిల్-ఆగస్టు, 2022లో మాత్రమే 15 లక్షల మంది ఈ ఎకానమీ కోచ్లో ప్రయాణించి రూ. 177 కోట్లు ఆర్జించారు.
రైల్వే ఆదాయాలపై ఎలాంటి ప్రభావం లేదు:
ఈ కోచ్ల పరిచయం సాధారణ ఏసీ-3 తరగతి నుంచి వచ్చే ఆదాయాలపై ప్రభావం చూపలేదని దీని నుంచి కూడా స్పష్టమైంది. అందుకే రైల్వే ఇప్పుడు ఏసీ త్రీ ఎకానమీ ఛార్జీలను తగ్గించింది.
మరిన్ని బిజినెస్ వార్తల కోసం ఇక్కడ క్లిక్ చేయండి..
