Cheque Bounce Cases: దేశంలో ఎన్ని చెక్ బౌన్స్ కేసులు పెండింగ్‌లో ఉన్నాయో తెలుసా..?
చెక్ బౌన్స్ కావడం అనే వార్తలను మనం తరచూ వింటుంటాము. ప్రముఖులు, రాజకీయవేత్తలు, సినీ నిర్మాతలు ఇచ్చిన చెక్కులు బౌన్స్ అయ్యాయంటూ కేసులు కూడా నమోదవుతాయి. దేశంలో కొన్ని ఆర్థిక లావాదేవీలు నిర్వహించడానికి చెక్కులు చాలా అవసరం. ప్రభుత్వ నిబంధనల ప్రకారం వాటిని అందజేస్తేనే పనులు జరుగుతాయి. కాగా..చెక్ బౌన్స్ కేసులు మన దేశంలో విపరీతంగా పెరిగాయి. దాదాపు 43 లక్షలకు పైగా పెండింగ్ లో ఉన్నట్టు నివేదికలు చెబుతున్నాయి.
Srinu | Edited By: Janardhan Veluru
Updated on: Dec 31, 2024 | 4:46 PM
బ్యాంకులో ఖాతా ఉన్నవారికి నిబంధనల మేరకు చెక్కుబుక్ లు మంజూరు చేస్తారు. ఎవ్వరికైనా డబ్బులు ఇవ్వాల్సి వచ్చినప్పుడు ఆ మొత్తాన్ని చెక్కుపై రాసి ఇవ్వవచ్చు. ఆ వ్యక్తి బ్యాంకులో ఆ చెక్కు వేసుకునేటప్పటికీ మీ ఖాతాలో సొమ్ములు ఉండాలి. లేకపోతే చెక్ బౌన్స్ అవుతుంది. అలాగే సరైన సంతకం లేకపోవడం, అక్షర దోషం, ఖాతా నంబర్ పొరపాటు, నకిలీ చెక్కు అందించడం కూడా బౌన్స్ కావడానికి కారణాలుగా ఉంటాయి. బ్యాంకింగ్ భాషలో చెక్ బౌన్స్ కావడాన్ని డిషనోర్డ్ చెక్ అంటారు. చట్ట ప్రకారం చెక్ బౌన్స్ ను శిక్షార్షమైన నేరంగా పరిగణిస్తారు.
మన దేశంలోని వివిధ కోర్టుల్లో డిసెంబర్ 18 నాటికి 43 లక్షలకు పైగా చెక్ బౌన్స్ కేసులు పెండింగ్ లో ఉన్నాయని నివేదికలు చెబుతున్నాయి. రాష్ట్రాల వారీగా అత్యధికంగా 6.4 లక్షల కేసులతో రాజస్థాన్ ప్రథమస్థానంలో కొనసాగుతోంది. తర్వాత స్థానాలలో మహారాష్ట్ర, గుజరాత్, ఢిల్లీ, ఉత్తర ప్రదేశ్, పశ్చిమ బెంగాల్ ఉన్నాయి. భారతీయ కోర్టుల్లోని పెండింగ్ లో ఉన్న కేసులలో ట్రాఫిక్ చలాన్లు, చెక్ బౌన్స్ లు ఎక్కువగా ఉంటాయి. అయితే ట్రాఫిక్ కేసులను వర్చువల్ కోర్టుల ద్వారా పరిష్కరించే అవకాశం ఉంది. దీంతో వాటిని పరిష్కరించడం కొంచెం సులభంగానే ఉంది. కానీ చెక్ బౌన్స్ ల కేసుల స్వభావం నేపథ్యంలో వాటికి సాధారణ కోర్టులలో మాత్రమే పరిష్కరించాలి.
చెక్ బౌన్స్ కేసుల పరిష్కారంలో జాప్యానికి అనేక కారణాలు ఉన్నాయని న్యాయశాఖ మంత్రి అర్జున్ రామ్ మేఘ్వాల్ తెలిపారు. తరచూ వాయిదాలు, పర్యవేక్షణ యంత్రాంగం లేకపోవడం, కాలపరిమితి లేకపోవడం, సాక్షులు తదితర అంశాలు దీనికి ప్రధానమన్నారు.
నెగోషియబల్ ఇన్ స్ట్రుమెంట్ యాక్ట్ కింద కేసులను త్వరితగతిన పరిష్కరించే మార్గాలను అన్వేషించడానికి సుప్రీంకోర్టు 2021 మార్చిలో పది మంది సభ్యుల కమిటీని ఏర్పాటు చేసింది. ప్రత్యేక చర్చల సాధన కోర్టులను ఏర్పాటు చేయాలని ఆ కమిటీకి ప్రతిపాదించింది. దీని సాధ్యాసాధ్యాలను అంచనా వేయడానికి మహారాష్ట్ర, రాజస్థాన్, గుజరాత్, ఢిల్లీ, యూపీలో పైలట్ ప్రాజెక్టులను అమలు చేయాలని సూచించింది. ఈ మేరకు 2022 మేలో ఏడాది పాటు 25 ప్రత్యేక కోర్టులలో పైలట్ అధ్యయనం నిర్వహించాలని ఆదేశించింది. అయితే ఆ కోర్టుల పురోగతి అస్పష్టంగానే ఉంది.
మరిన్ని బిజినెస్ వార్తల కోసం ఇక్కడ క్లిక్ చేయండి
