Cooking Oil Prices: సామాన్యులకు కేంద్రం గుడ్ న్యూస్.. భారీగా తగ్గనున్న వంటనూనె ధరలు.. పండక్కి ముందు పెద్ద ఊరట..

నిత్యావసర సరుకుల ధరలు విపరీతంగా పెరిగిపోయి సామాన్యుడి బ్రతుకు బండి భారంగా నడుస్తున్న తరుణంలో.. కేంద్ర ప్రభుత్వం శుభవార్త అందించింది.  రాబోయే దసరా, దీపావళి వంటి ప్రధాన పండుగల సీజన్‌ను దృష్టిలో ఉంచుకొని కేంద్ర ప్రభుత్వం కీలక నిర్ణయం తీసుకుంది. పెరిగిన ధరల భారం నుంచి ప్రజలకు ఊరట కల్పించే లక్ష్యంతో వంట నూనెలపై దిగుమతి సుంకాలను భారీగా తగ్గిస్తూ ఆదేశాలు జారీ చేసింది. దేశీయ మార్కెట్లో పెరుగుతున్న వంటనూనెల ధరలను అదుపులోకి తీసుకురావడమే ఈ చర్య వెనుక ప్రధాన లక్ష్యంగా చెప్పవచ్చు. ఇందుకు సంబంధించి కేంద్ర ఆర్థిక మంత్రిత్వ శాఖ ఉత్తర్వులు జారీ చేసింది. సన్‌ఫ్లవర్, సోయాబీన్, పామాయిల్ వంటి ముడి, రిఫైన్డ్ రకాలపై ప్రాథమిక కస్టమ్స్ సుంకాన్ని తగ్గించారు. ఈ సవరించిన నిబంధనలు తక్షణమే అమల్లోకి వస్తాయని ప్రకటించింది. వినియోగదారులు ఎక్కువగా ఉపయోగించే సన్‌ఫ్లవర్ ఆయిల్‌పై ప్రభుత్వం అత్యంత భారీగా సుంకాన్ని తగ్గించింది. క్రూడ్ సన్‌ఫ్లవర్ ఆయిల్ పై ప్రాథమిక కస్టమ్స్ సుంకాన్ని 10 శాతం నుంచి పూర్తిగా సున్నాకు తగ్గించారు. అంటే ఇకపై దీనిపై ఎటువంటి ప్రాథమిక పన్ను ఉండదని చెప్పవచ్చు.

రిఫైన్డ్ సన్‌ఫ్లవర్ నూనెపై బేసిక్ కస్టమ్స్ డ్యూటీని 32.5 శాతం నుంచి 22.5 శాతానికి తగ్గించారచు. అంటే 10 శాతం మేర తగ్గించారని చెప్పవచ్చు. అదే విధంగా ఇతర ముఖ్యమైన నూనెలపై కూడా పన్నుల కోత విధించారు. ముడి సోయాబీన్, పామాయిల్‌పై ఉన్న 10 శాతం సుంకాన్ని 5 శాతానికి తగ్గించారు. రిఫైన్డ్ సోయాబీన్, పామాయిల్‌పై ఉన్న 32.5 శాతం పన్నును 27.5 శాతానికి తగ్గించింది. అంతర్జాతీయ మార్కెట్లలో పరిస్థితులు, దేశీయ అవసరాలను బేరీజు వేసుకొని ప్రభుత్వం తీసుకున్న ఈ చర్యల వల్ల నూనెల దిగుమతి వ్యయం గణనీయంగా తగ్గుతుంది. దిగుమతి సుంకాలు తగ్గటం వల్ల మార్కెట్లో వంట నూనెల లభ్యత పెరిగి ధరలు తగ్గే అవకాశం ఉంది. నిత్యం పెరిగే ధరలతో సతమతమవుతున్న పేద, దిగువ మధ్యతరగతి కుటుంబాలకు ఈ నిర్ణయం ఆర్థికంగా కొంత వెసులుబాటును కలిగిస్తుంది. కుటుంబ బడ్జెట్‌లో నూనె ఖర్చు తగ్గడం వల్ల సామాన్యుడికి ఇది నిజంగా శుభవార్తగా చెప్పవచ్చు.

త్వరలో దసరా, దీపావళి లాంటి పండుగులు వస్తున్నాయి. ఈ రెండు అత్యంత ముఖ్యమైన పండగలుగా చెప్పవచ్చు. ఇప్పటికే ఉల్లిపాయలు, షుగర్, నిత్యావసర సరుకుల ధరలు పెరగడంతో సామాన్యులపై భారం పడుతోంది. ఈ క్రమంలో కేంద్రం తీసుకున్న నిర్ణయంతో వంట నూనె ధరలు దిగి రానున్నాయి. ఇటీవల యుద్ద పరిస్థితులు, ఎల్‌నివో ప్రభావం వల్ల వంటనూనె ధరలు పెరిగాయి. ఇప్పుడు కేంద్ర నిర్ణయంతో కాస్త ఊరట కలిగింది.