Ather IPO: ఐపీఓ బాటలో ఏథర్ ఎనర్జీ.. వచ్చే నెలలోనే ప్రారంభం..?
ఎలక్ట్రిక్ ద్విచక్ర వాహన తయారీ సంస్థ ఏథర్ ఎనర్జీ లిమిటెడ్ తన అత్యుత్తమ కంపల్సరీ కన్వర్టిబుల్ ప్రిఫరెన్స్ షేర్లను (సీసీపీఎస్) ఈక్విటీగా మార్చింది. ఈ చర్యలతో ఎంతో ఆసక్తిగా ఎదురుచూస్తున్న ఐపీఓ వైపు గణనీయమైన అడుగు వేసినట్లు అయ్యిందని పలు నివేదికలు వెల్లడిస్తున్నాయి. ఈ పబ్లిక్ ఇష్యూ ఏప్రిల్‌లో ప్రారంభించే మర్చంట్ బ్యాంకింగ్ వర్గాలు అంచనా వేస్తున్నాయి.
Srinu |
Updated on: Mar 11, 2025 | 4:50 PM
ఇటీవల యాక్సెస్ చేసిన కంపెనీల రిజిస్ట్రార్ (ఆర్ఓసీ) ఫైలింగ్ ప్రకారం కంపెనీ డైరెక్టర్ల బోర్డు మార్చి 8, 2025న ఒక తీర్మానాన్ని ఆమోదించింది. రూ.1.73 కోట్లకు పైగా బకాయి ఉన్న సీసీపీఎస్‌లను రూ.24.04 కోట్ల పూర్తిగా చెల్లించిన ఈక్విటీ షేర్లుగా మార్చడానికి ఆమోదం తెలిపింది. ఒక్కొక్కటి కేవలం రూ.1 ఫేస్ వ్యాల్యూ కలిగిన ఈ షేర్లు, ప్రస్తుత ఈక్విటీ షేర్లతో సమానంగా ఉంటాయి. సీసీపీఎస్ అనేవి ఒక రకమైన ప్రిఫరెన్స్ షేర్లు, వీటిని ఒక నిర్దిష్ట వ్యవధి తర్వాత లేదా కొన్ని సంఘటనలు జరిగిన తర్వాత ఈక్విటీ షేర్లుగా మార్చాలి. మార్చిన సీసీపీఎస్‌లలో కాలక్రమేణా జారీ చేసిన బహుళ సిరీస్‌లు ఉన్నాయి. అవి సిరీస్ సీడ్ (ఒకటి నుంచి నాలుగు), సిరీస్ ఏ నుంచి జీ, బోనస్ సీసీపీఎస్ వంటి అదనపు సిరీస్‌లు, వివిధ ఈ క్లాసెస్ (ఈ, ఈ1, ఈ2)గా ఉంటాయని నిపుణుుల వెల్లడిస్తున్నారు. సెబీ ఇష్యూ ఆఫ్ క్యాపిటల్ అండ్ డిస్‌క్లోజర్ రిక్వైర్మెంట్స్ (ఐసీడీఆర్) నిబంధనల ప్రకారం మార్కెట్ రెగ్యులేటర్‌కు రెడ్ హెర్రింగ్ ప్రాస్పెక్టస్ (ఆర్‌హెచ్‌పీ) దాఖలు చేయడానికి ముందు అన్ని సీసీపీఎస్‌లను ఈక్విటీగా మార్చాలి.
ఏథర్ ఎనర్జీ తన బకాయి ఉన్న సీసీపీఎస్‌లను ఈక్విటీగా మార్చాలనే నిర్ణయం, కంపెనీ తన పబ్లిక్ ఇష్యూ వైపు వేగంగా పురోగమిస్తోందని సూచిస్తుంది. 2026 ఆర్థిక సంవత్సరంలో ప్రారంభించే మొదటి వాటిలో ఒకటి కావచ్చని నిపుణులు అంచనా వేస్తున్నారు. గతేడాది సెప్టెంబర్‌లో మహారాష్ట్రలో ఎలక్ట్రిక్ ద్విచక్ర వాహన కర్మాగారాన్ని ఏర్పాటు చేయడానికి, రుణ తగ్గింపునకు నిధులను సేకరించడానికి ఏథర్ ముసాయిదా పత్రాలను దాఖలు చేసింది. డ్రాఫ్ట్ రెడ్ హెర్రింగ్ ప్రాస్పెక్టస్ (డీఆర్‌హెచ్పీ) ప్రకారం ఐపీఓలో రూ. 3,100 కోట్ల విలువైన ఈక్విటీ షేర్ల తాజా ఇష్యూ, ప్రమోటర్లు, పెట్టుబడిదారుల ద్వారా 2.2 కోట్ల ఈక్విటీ షేర్ల ఆఫర్-ఫర్-సేల్ కలయిక ఉంటుంది.
ఏథర్ ఎనర్జీ ఐపీఓను ప్రారంభిస్తే గత ఏడాది ఆగస్టులో భవిష్ అగర్వాల్‌కు చెందిన ఓలా ఎలక్ట్రిక్ మొబిలిటీ రూ.6,145 కోట్ల ఐపీఓను విడుదల చేసిన తర్వాత పబ్లిక్‌గా విక్రయించబడుతున్న రెండవ ఎలక్ట్రిక్ ద్విచక్ర వాహన సంస్థ అవుతుంది. 20 సంవత్సరాలకు పైగా దేశంలో ఒక ఆటోమేకర్ చేసిన మొదటి ఇష్యూ కూడా ఇదే అవుతుందని నిపుణులు చెబుతున్నారు. ఓలా ఎలక్ట్రిక్‌కు సంబంధించిన ఐపీఓలో రూ. 5,500 కోట్ల తాజా ఇష్యూ, 8.4 కోట్ల షేర్ల ఆఫర్ ఫర్ సేల్ ఉన్నాయి.
మరిన్ని బిజినెస్ వార్తల కోసం ఇక్కడ క్లిక్ చేయండి..
