అభినందన్‌తో బాగా మాట్లాడించిన పాక్

న్యూఢిల్లీ: అభినందన్‌ను భారత్‌కు అప్పగించే ముందు పాకిస్థాన్ ఓ వీడియోను ప్రత్యేకంగా చిత్రించింది. అభినందన్‌ను అప్పగించే సమయంలో ఈ వీడియోను పాక్ విడుదల చేసింది. ఇందులో పాక్ గురించి అభినందన్ బాగా మాట్లాడారు. నా పట్ల పాక్ సైన్యం ఎంతో గౌరవంగా వ్యవహరించింది అంటూ అభినందన్ ఆ వీడియోలో చెప్పారు. అయితే ఈ వీడియోను చూస్తే ఎడిట్ చేసినట్టు తేలికగా అర్ధమౌతుంది. పాకిస్థాన్ తన సైన్యానికి మంచి పేరు వచ్చేలా ఆ వీడియోను సిద్ధం చేసుకుందని ఈజీగా అర్ధమైపోతోంది.

ఆ వీడియోలో అభినందన్ మాట్లాడుతూ పారాచ్యూట్ సాయంతో కిందకు దూకి ఇబ్బందులు పడటం, పాక్ సైన్యం కాపాడటం గురించి పొగుడుతూ అభినందన్ వివరించారు. అయితే అభినందన్‌తో పాకిస్థాన్ ఈ విధంగా కావాలనే చెప్పించినట్టు కనిపిస్తోంది. ‘నేను కిందపడిపోగానే చాలామంది చుట్టుముట్టారు. వారి నుంచి కాపాడుకునేందుకు పరుగు పెట్టాను. ఆ సమయంలో ఇద్దరు పాక్ జవాన్లు వచ్చి నన్ను సేవ్ చేశారని అభినందన్ చెప్పారు. తనకు ప్రాథమిక చికిత్స అందించి పాక్ సైన్యం ఎంతో గౌరవంగా వ్యవహరించింది అంటూ అభినందన్ వీడియోలో చెప్పారు.