చదువులపై ‘యమ’ ఒత్తిడి.. ఇంట్లో ఉరివేసుకుని BTech విద్యార్థి ఆత్మహత్య

విశాఖపట్నం, నవంబర్ 15: ఆంధ్రప్రదేశ్‌లోని విశాఖపట్నంలో విషాదకర ఘటన చోటుచేసుకుంది. గాజువాక రాజీవ్ నగర్‌లో ఓ బీటెక్ విద్యార్థి ఆత్మహత్య చేసుకోవడం కలకలం రేపింది. చదువులో వెనుకబడుతున్నాననే ఆందోళనతో కొంతకాలంగా మానసిక ఒత్తిడికి గురైన విద్యార్థి ఈ అఘాయిత్యానికి పాల్పడినట్లు ప్రాథమిక సమాచారం.

గాజువాక రాజీవ్ నగర్‌కు చెందిన వెంకటరామ్ చరణ్ బీటెక్ చదువుతున్నాడు. ఇంట్లోనే ఉరివేసుకుని ఆత్మహత్య చేసుకున్నట్లు సమాచారం. ఈ ఘటనతో కుటుంబ సభ్యులు తీవ్ర విషాదంలో మునిగిపోయారు. వెంకటరామ్ చరణ్ కొంతకాలంగా చదువులో వెనుకబడుతున్నాననే ఆందోళనతో ఒత్తిడికి గురవుతున్నట్లు తెలుస్తోంది. ఈ క్రమంలోనే అతడు ఆత్మహత్యకు పాల్పడినట్లు ప్రాథమికంగా సమాచారం అందుతోంది. అయితే ఘటనకు సంబంధించిన పూర్తి వివరాలు పోలీసుల దర్యాప్తులో వెల్లడికావాల్సి ఉంది. సమాచారం అందుకున్న దువ్వాడ పోలీసులు ఘటనపై విచారణ చేపట్టారు. విద్యార్థి ఆత్మహత్యకు గల కారణాలు, ఇతర పరిస్థితులపై ఆరా తీస్తున్నారు. ఈ ఘటన స్థానికంగా తీవ్ర విషాదాన్ని నింపింది. విద్యార్థులపై చదువు, పరీక్షలు, మార్కుల ఒత్తిడి పెరుగుతున్న నేపథ్యంలో మానసిక ఆరోగ్యంపై కుటుంబ సభ్యులు, విద్యాసంస్థలు ప్రత్యేక శ్రద్ధ చూపాల్సిన అవసరం ఉందని ఈ ఘటన మరోసారి గుర్తుచేస్తోంది.