AP News: సికింద్రాబాద్ టూ గుంటూరు.. ఇకపై 3 గంటల్లోనే.! వివరాలు ఇవిగో

సికింద్రాబాద్ టూ గుంటూరు.. ప్రస్తుతం ఈ రూట్‌లో ప్రయాణం ఐదు నుంచి ఆరున్నర గంటల సమయం పడుతుంది. జన్మభూమి సూపర్‌ఫాస్ట్.. అలాగే గోల్కండ, ఇంటర్‌సిటీ ఎక్స్‌ప్రెస్‌లు లాంటివి ఈ రూట్‌లో తిరుగుతున్నాయి. అలాగే తెల్లారుజామున పరుగులుపెట్టే ట్రైన్‌ అయితే..

Guntur

Ravi Kiran |
Updated on: Jul 04, 2024 | 7:49 PM

సికింద్రాబాద్ టూ గుంటూరు.. ప్రస్తుతం ఈ రూట్‌లో ప్రయాణం ఐదు నుంచి ఆరున్నర గంటల సమయం పడుతుంది. జన్మభూమి సూపర్‌ఫాస్ట్.. అలాగే గోల్కండ, ఇంటర్‌సిటీ ఎక్స్‌ప్రెస్‌లు లాంటివి ఈ రూట్‌లో తిరుగుతున్నాయి. అలాగే తెల్లారుజామున పరుగులుపెట్టే ట్రైన్‌ అయితే 4 గంటల సమయం పడుతుంది. త్వరలోనే ఈ ప్రయాణ సమయం మరింత తగ్గనుంది. సికింద్రాబాద్-గుంటూరు రూట్‌లో నల్లపాడు-బీబీనగర్ మధ్య 248 కిమీ మేర 2వ రైల్వే లైన్ నిర్మాణం, విద్యుదీకరణ పనులు పట్టాలెక్కాయి. సుమారు రూ. 2853 కోట్ల ఈ ప్రాజెక్టును 4 దశల్లో పూర్తి చేయాలని రైల్వేశాఖ లక్ష్యంగా పెట్టుకుంది. ఆగష్టులో పనులు ప్రారంభం కానున్నాయి. ప్రాజెక్ట్ పూర్తయితే 3 గంటల్లోనే గమ్యస్థానానికి చేరుకోనున్నాయి రైళ్లు. ఈ రూట్ మధ్య ప్రస్తుతం సింగిల్ రైల్వే లైన్ ఉండటం వల్ల ఒక రైలు వస్తుంటే.. మరొకటి స్టేషన్‌లో ఆగాల్సిన పరిస్థితి వస్తోంది.

నల్లపాడు-బీబీనగర్ రూట్ మధ్య ప్రస్తుతం గూడ్స్ రైళ్ల ద్వారా రైల్వేశాఖకు మాంచి సౌకర్యం లభిస్తోంది. బొగ్గు, సిమెంట్ రవాణాతో పాటు వ్యవసాయ ఉత్పత్తుల రవాణా కూడా తోడవ్వడంతో ఆదాయం రెట్టింపు అవుతోంది. ఈ రూట్‌లో రెండో లైన్ వస్తే.. రామాపురం, జగ్గయ్యపేట, మేళ్లచెరువు, జాన్ పహాడ్, నడికుడి, విష్ణుపురం, నార్కెట్‌పల్లి, చిట్యాలలో ఉండే అన్ని పరిశ్రమలకు ప్రయోజనం చేకూరనుంది.

కాగా, సికింద్రాబాద్ టూ విజయవాడకు ప్రస్తుతం రెండు రైల్వే మార్గాలు అందుబాటులో ఉన్నాయి. ఒకటి ఖాజీపేట-ఖమ్మం లైన్, మరొకటి బీబీనగర్-నడికుడి రైల్వే లైన్. బీబీనగర్-నడికుడి-గుంటూరు మార్గంలో ప్రస్తుతం 148 కిలోమీటర్ల వేగంతో రైళ్లు పరుగులు పెడుతున్నాయి. కొత్త రైల్వే లైన్‌ను 160 కిలోమీటర్ల వేగం తట్టుకునే విధంగా నిర్మాణం చేస్తున్నారు రైల్వే అధికారులు. ఈ రూట్‌లో డబుల్ లైన్ అందుబాటులోకి వస్తే.. ఇక సికింద్రాబాద్ టూ గుంటూరు రెండున్నర నుంచి మూడు గంటలు సమయం పట్టే ఛాన్స్.

ఇవి కూడా చదవండి